17 މެއި 2023 - 09:51
އިންޑިއާގައި މިހާރު ކުރިއަށް ގެންދާ ސައުތު އޭޝިއަން ޖޫނިއާ އަދި ކެޑޭޓް ޓޭބަލް ޓެނިސް ޗެމްޕިއަންޝިޕްގައި ވާދަކުރާ ރާއްޖޭގެ ޓީމުތަކުން ޖޫނިއާ ފިރިހެން ޑަބަލްސް އާއި ކެޑޭޓް އަންހެން އަދި ފިރިހެން ޑަބަލްސް އިވެންޓުން ލޯ މެޑަލް ހޯދައިފި އެވެ.
ދިވެހި ޓީމުތަކުން ވަނީ ޖޫނިއާ މިކްސްޑް ޑަބަލްސް އާއި ޖޫނިއާ އަންހެން ޑަބަލްސް އިން މި މުބާރާތުގައި ކުރިން ރިހި މެޑަލް ހޯދައިފަ އެވެ.
އިންޑިއާގެ އަރުނަޗާލް ޕްރަދޭޝް ސްޓޭޓްގެ ވެރިރަށް އިޓާނަގަރުގައި މިދިޔަ އާދިއްތަ ދުވަހު ފެށި މުބާރާތުގެ ޓީމު އިވެންޓުން ރާއްޖޭގެ ޖޫނިއާ އަންހެން އަދި ފިރިހެން ޓީމުން ލޯ މެޑަލް ހޯދި އެވެ.
އުމުރުން 19 އަހަރުން ދަށުގެ ޖޫނިއާ މިކްސްޑް ޑަބަލްސް އިން ރިހިލޯ މެޑަލް ހޯދީ ފާތިމަތު ދީމާ އަލީ އާއި އަޚްޔާރު އަހުމަދު ހާލިދުގެ ޕެއާ އެވެ. ފައިނަލްގައި ރާއްޖޭގެ ޕެއާ ބަލިވީ އިންޑިއާގެ ޖެއިން ޕަޔާސް އާއި ގޯރުޕާޑޭ ޔަޝާސްވީނީގެ ޕެއާއާ ވާދަކޮށް 3-1 ސެޓުންނެވެ.
ޖޫނިއާ އަންހެން ޑަބަލްސްގައި ރިހި މެޑަލް ހޯދީ ދީމާ އާއި މިޝްކާ މުހައްމަދު އިބްރާހިމްގެ ޕެއާ އެވެ. ރާއްޖޭގެ ޕެއާ ފައިނަލަށް ދިޔައީ ސްރީ ލަންކާގެ ކޮރޮއްޓާ ގަމަގޭ ދިވްޔާ އާއި ކުލައްޕުވަވަޑޫ ލެސާނީގެ ޕެއާ ސީދާ ތިން ސެޓުން ބަލިކޮށްފަ އެވެ. ނަމަވެސް އިންޑިއާގެ ގޯރުޕާޑޭ ޔަޝާސްވީނީ އާއި ސައިނީ ސުހާނާގެ ޕެއާ އަތުން ފައިނަލްގައި ބަލިވީ އެވެ.
ޖޫނިއާ ފިރިހެން ޑަބަލްސްގައި ލޯ މެޑަލް ހޯދީ ރާއްޖޭން ވާދަކުރި އަޚްޔާރާއި މުހައްމަދު ތާބިން ސުޖާއުގެ ޕެއާ އެވެ. ސްރީ ލަންކާގެ ގަމަގޭ ބަޓާގޮޑާ ތިސުމް އުދަޔަ އާއި ޕީރިސް ގެސަންދޫގެ ޕެއާ 3-1 ސެޓުން ބަލިކޮށް ސެމީ ފައިނަލަށް ދިޔަ ނަމަވެސް ސެމީގައި ބަލިވީ އިންޑިއާގެ ޕެއާ އަތުންނެވެ. އިންޑިއާގެ ސްރިވަސްތަވާ ދިވްޔަންޝް އާއި މޯދީ ޖާޝް އަތުން ރާއްޖޭގެ ޕެއާ ބަލިވީ ސީދާ ތިން ސެޓުންނެވެ.
އުމުރުން 15 އަހަރުން ދަށުގެ ކެޑޭޓް އަންހެން ޑަބަލްސްގައި ލޯ މެޑަލް ހޯދީ މިޝްކާ އާއި އައިޝަތު ޒާރާ ޝާހިލްގެ ޕެއާ އެވެ. މިޝްކާ އާއި ޒާރާ ސެމީ ފައިނަލް މެޗުން ބަލިވީ ނޭޕާލްގެ ސުޝްމިތާ ކަޑްކާ އާއި ޝްރެސްތާ ސުބާޝްރީގެ ޕެއާ އަތުން ސީދާ ތިން ސެޓުންނެވެ.
ކެޑޭޓް ފިރިހެން ޑަބަލްސް އިން ލޯ މެޑަލް ހޯދީ އުމީރު މުހައްމަދު މުއިއްޒާއި އައުން އިބްރާހިމް ލަތީފް އެވެ. ރާއްޖޭގެ މި ޕެއާ ސެމީގައި ބަލިވީ ބަންގްލަދޭޝްގެ ހަސީބް އަބްދުލް ހާޝިމް އާއި ރަހްމާން އެމްޑީ މަތާބުރު އަތުން ސީދާ ތިން ސެޓުންނެވެ.
ކެޑޭޓް މިކްސްޑް ޑަބަލްސް އިވެންޓުގައި ކުޅުނީ އުމީރު އާއި މިޝްކާ އެވެ. ރާއްޖޭގެ މި ޕެއާ ބަލިވީ ފުރަތަމަ މެޗުގައި ބަންގްލަދޭޝްގެ ހަސީބް އަބްދުލް ހާޝިމް އާއި ސިގްމާ މުސްރަތު ޖަންނަތާ ވާދަކޮށް 3-2 ސެޓުންނެވެ.
މުބާރާތުގެ ސިންގަލްސް އިވެންޓުތައް މިއަދު ކުރިއަށް ގެންދާއިރު، ޖޫނިއާ އަންހެން ސިންގަލްސްގެ ކުއާޓާގައި ދީމާ ނުކުންނާނީ ސްރީލަންކާގެ ކުލައްޕުވަވަޑޫ ލެސާނީއާ ދެކޮޅަށެވެ. ޖޫނިއާ ފިރިހެން ސިންގަލްސްގެ ކުއާޓާގައި އަޚްޔާރު ނުކުންނާނީ ބަންގްލަދޭޝްގެ ރިދޯއީ މުހުތަސިން އަހުމަދާ ދެކޮޅަށެވެ. އަދި ކެޑޭޓް އަންހެން ސިންގަލްސްގައި މިޝްކާ ވާދަކުރާނީ ސްރީލަންކާގެ އަލަގިޔަވަދޫ ތަމަޑީ ކަވިންދިޔާއާ އެވެ.