03 މެއި 2023 - 14:03
މާލޭ ސިޓީ ކައުންސިލުން 50،000 ގެއަށް ކޮތަޅު ހިލޭ ބަހަން ނިންމައިފި އެވެ.
ކުނި މެނޭޖު ކުރުމުގެ ގާނޫނުގެ ދަށުން ކޮންމެ ޕްލާސްޓިކް ކޮތަޅަކުން ދެ ރުފިޔާ ނަގާތީ އާއްމުންގެ ޝަކުވާ ބޮޑެވެ.
ސިޓީ ކައުންސިލްގެ ޖަލްސާގައި މޭޔަރު ޑރ. މުހައްމަދު މުއިއްޒު ވިދާޅުވީ މާލޭގެ ގޭބިސީތަކަށް ކޮތަޅު ބަހަން ނިންމީ ސަރުކާރުން ކޮތަޅުން ޓެކްސް ނަގަން ފަށުމުން ގިނަ ބައެއްގެ މަޝްވަރާގެ މަތިން އެއީ ކުރަން ރަނގަޅު ކަމެއްގެ ގޮތުގައި ފާހަގަ ކުރެއްވުމުން ކަމަށެވެ.
މާލެ އާއި ހުޅުމާލެ އަދި ވިލިމާލެއިން ކޮތަޅު ހަދިޔާކުރާނެ ގެތައް ކަނޑައަޅާނެ ގޮތެއް އަދި އިއުލާނެއް ނުކުރެ އެވެ.
ކައުންސިލްގެ ޖަލްސާގައި ފާސްކުރީ 25 ކޮތަޅު ހިމެނޭ ރީޔޫސަބަލް ކޮތަޅު ޕެކް ހެދުމަށެވެ. ކައުންސިލުން ބުނީ ކޮތަޅު ހެދުމަށް ގާތްގަނޑަކަށް 1.5 މިލިއަން ރުފިޔާ ހަރަދުވާނެ ކަމަށެވެ.
އެކި ކުލައިގެ ކޮތަޅު ހިމެނޭ ކޮތަޅު ބޮނޑީގައި އެކި ބާވަތުގެ ސާމާނު ގަންނައިރު ފަސޭހަ ވެގެންދާނެ ކަމަށް މުއިއްޒު ވިދާޅުވި އެވެ. އަދި ކައުންސިލުން ހަދާ އެ ކޮތަޅު ދިގު މުއްދަތަކަށް ބޭނުން ކުރެވޭނެ ކަމަށް ވެސް މޭޔަރު ވިދާޅުވި އެވެ.
މަޖިލީހުން ކޮތަޅު ބިލު ފާސް ކުރުމާ އެކު ކުނި އެޅުމަށް ހާއްސަ ކޮތަޅުތަކެއް ވެމްކޯއިން ވެސް ވަނީ ވިއްކަން ފަށައިފަ އެވެ.