24 ޖެނުއަރީ 2017 - 18:30
ބަންގްލަދޭޝްގައި އަންނަ މަހު އޮންނަ ޝެއިޚް ކަމާލް އިންޓަނޭޝަނަލް ކަޕުގައި ވާދަކުރުމުން ޓީސީ ސްޕޯޓްސް ކްލަބަށް ގިނަ ފައިދާތަކެއް ކުރާނެ ކަމަށް އެ ޓީމުގެ ކޯޗު މުހައްމަދު ނިޒާމް (ނިޒާމްބެ) ބުނެފި އެވެ.
އޭއެފްސީ މިންގަނޑަށް ބެލުމަށް ފަހު ލީގު ޗެމްޕިއަން މާޒިޔާ އާއި އެފްއޭ ކަޕް ޗެމްޕިއަން ވެލެންސިއާ އޭއެފްސީ ކަޕްގައި ބައިވެރިވާތީ މި މުބާރާތަށް ރާއްޖޭގެ ޓީމެއް ފޮނުވަން ލިބުނު ފުރުސަތު އެފްއޭއެމުން ދިނީ ލީގުގެ ދެ ވަނަ ހޯދި ޓީސީ އަށެވެ.
"ކުރިން އެނގިފައި އޮތް މުބާރާތެއް ނޫން މިއީ. އެކަމަކު އެފްއޭއެމުން މި ފުރުސަތު ދިނުމުން ޓީސީން ނިންމީ މީގެ ބޭނުން ހިފުމަށް ހަގީގަތުގައި. މިއީ ޓީސީގެ އިތުރުން ދިވެހި ފުޓްބޯޅަ އަށް ވަރަށް މުހިއްމު ކަމެއް. ބައިނަލްއަގްވާމީ މުބާރާތްތަކުގައި ބައިވެރިވުމުން އޭގެ ފައިދާ ބޮޑު،" މިއަދު ހަވީރު އެފްއޭއެމް ހައުސްގައި އޮތް ނޫސްވެރިންގެ ބައްދަލުވުމުގައި ނިޒާމް ބުންޏެވެ.
"ޓީސީ ކަހަލަ ޅަ ކްލަބަކަށް މީގެއިން ހޯދޭނެ ފައިދާ ވަރަށް ބޮޑު. އެއީ މި ޓީމުގެ ކުޅުންތެރިންނަށް ވަރަށް މުހިއްމު ބައިނަލްއަގްވާމީ ތަޖުރިބާ ގައުމީ ޓީމަށް ކުޅެން ބެލިޔަސް ގިނަ ކުޅުންތެރިންގެ މަދުވަނީ އިންޓަނޭޝަނަލް އެކްސްޕީރިއަންސް."
ދިގު ސީޒަނަކަށް ތައްޔާރުވަމުން އަންނައިރު ޕްރީ ސީޒަނުގެ ތައްޔާރީތަކުގެ ތެރެއިން ބައިނަލްއަގްވާމީ މުބާރާތެއް ލިބުމަކީ ބޮޑު ހިތްހަމަ ޖެހުމެއްގެ ގޮތުގައި ނިޒާމް ސިފަކުރެ އެވެ.
"100 ޕަސެންޓާ ގާތަށް އަޅުގަނޑަށް ބުނަން ކެރޭ މި މުބާރާތުން ޓީސީ އަށް ހޯދޭނެ އެއްޗެހި ގިނަ. އެއީ ދުނިޔޭގެ ބޮޑެތި ކްލަބްތަކުން ވެސް ޕްރީ ސީޒަނުގައި އިންޓަނޭޝަނަލް މުބާރާތްތައް ކުޅޭ. އޭގެ ފައިދާ އެ ޓީމުތަކަށް ވެސް ކުރޭ. ހަމަ އެ ގޮތަށް ބަލާއިރު ޓީސީ އަށް ވެސް މި މުބާރާތުގެ ސަބަބުން ޑޮމެސްޓިކް ލީގުގައި ކުރާ ފައިދާ ބޮޑުވާނެ،" ކުރިން ވިޔަންސާ އާއި ކަޅައިދޫ އަށް ކޯޗުކޮށްދިން ނިޒާމް ބުންޏެވެ.
މި މުބާރާތުގައި ވާދަކުރާ ޓީމުތައް އެއްކޮށް ފައިނަލްވާނީ އަންނަ މަހު އެއް ވަނަ ދުވަހު އެވެ. ބަންގްލަދޭޝް އިން ވަނީ މި މުބާރާތުގައި ވާދަކުރުމަށް ދެކުނު ކޮރެއާ އާއި ހޮންކޮންގެ އިތުރުން ފިލިޕީންސްގެ ކްލަބްތަކަށް ވެސް ދައުވަތުދީފަ އެވެ.
"މުބާރާތުގައި ބައިވެރިވާ ޓީމުތައް ފައިނަލެއް އަދި ނުވޭ. އެކަމަކު ކޯޗެއްގެ ހައިސިއްޔަތުން އަޅުގަނޑު ބުނެލަން ބޭނުމީ އަޅުގަނޑު ކޮންމެ މެޗަކަށް އަދި ކޮންމެ މުބާރާތަކަށް ނުކުންނާނީ ވެސް މޮޅުވާން،" އެފްއޭއެމް އިން މިދިޔަ ސީޒަނުގައި ހޮވި އަހަރުގެ އެންމެ މޮޅު ކޯޗުގެ މަގާމު ހޯދި ނިޒާމްބެ ބުންޏެވެ.
ރާއްޖޭން ވެސް ވަނީ މީގެ ކުރިން ބައިނަލްއަގްވާމީ ކްލަބްތަކަށް ދައުވަތުދީގެން މުބާރާތްތައް ބާއްވައިފަ އެވެ. އެންމެ ފަހުން އެގޮތަށް ބޭއްވި މުބާރާތަކީ 2015 ވަނަ އަހަރުހެ ޖެނުއަރީ މަހު ބޭއްވި ޕީޕަލްސް ކަޕެވެ.
"އަޅުގަނޑު ދެކޭ ގޮތުގައި ރާއްޖޭގެ ކްލަބްތަކަށް ލިބޭ އިންޓަނޭޝަނަލް މެޗުތައް އިތުރުކުރަން ބައިނަލްއަގްވާމީ މުބާރާތެއް ރާއްޖޭގައި ބޭއްވުމަކީ ވަރަށް މުހިއްމުކަމެއް. މިކަން ކުރުމުގައި ޓޫރިޒަމްގެ އެހީވެސް ހޯދިދާނެ ގޮތްގަކެއް އެބަހުރި. ޓޫރިޒަމް ތެރެއިން މި ފަދަ ކަންކަމަށް ފުރުސަތު ތަނަވަސްކުރެވެން އެބަހުރި،" ނިޒާމް ބުންޏެވެ.
ބަންގްލަދޭޝްގައި ކުރިއަށްދާ މި މުބާރާތް އޮންނާނީ އަންނަ މަހު 18 އިން މާޗް 1 އަށެވެ. މި މުބާރާތުގެ ހުރިހާ ހަރަދެއް ބަލާނީ މުބާރާތް އިންތިޒާމްކުރާ ފަރާތުންނެވެ. މި މުބާރާތުގެ ސަބަބުން އަންނަ މަހު 24 ގައި ފަށާ މާލޭ ލީގުގައި ޓީސީ ކުޅޭ ފުރަތަމަ މެޗު ރީ ޝެޑިއުލް ކުރާނެ ކަމަށް އެފްއޭއެމުން ބުނެ އެވެ.