03 މެއި 2023 - 09:04
ތަރުހީބު ބޮޑުވެ، ސަޕޯޓަރުންގެ އެދުމުގެ މަތިން "ވަނާޖުބޭސާ" ފިލްމުގެ އިތުރު ޝޯއެއް އަންނަ ހުކުރު ދުވަހު އަޅުވަން ނިންމައިފި އެވެ.
ކުރު ވީޑިއޯތަކުންނާއި އިޝްތިހާރުތަކުން ވިދާލި ނަޒީރު ޝިހާމް (ކާއްޓޭ) އަދި ހުސެއިން ސާދު (މަޓޭ) ފުރަތަމަ ފަހަރަށް އެކްޓުކުރި ކޮމެޑީ ފީޗާ ފިލްމު، ދިވެހި ސިނަމާ އޮލިމްޕަހުގައި ޕްރިމިއާކުރީ މިދިޔަ މަހުގެ 25 ވަނަ ދުވަހު އެވެ. އަދި މިދިޔަ އާދިއްތަ ދުވަހު އެ ފިލްމުގެ އެންމެ ފަހު ޝޯ ވަނީ އަޅުވައިފަ އެވެ.
ކާއްޓޭ އާއި މަޓޭގެ އިތުރުން ސިފައިންގެ ޑްރާމާތަކުން މަޝްހޫރުވި މުހައްމަދު ސައީދު ވެސް އެ ފިލްމުގައި އުޅެ އެވެ. އެ ފިލްމުގައި އުޅުނު ކާސްޓުގެ ތެރެއިން ބޮޑު ސްކްރީން ފިލްމެއްގެ ތަޖުރިބާ ހުރި ހަމައެކަނި އެކްޓަރަކީ އެއީ އެވެ.
ފ. ނިލަންދޫގައި ޝޫޓުކުރި އެ ފިލްމުގައި ކާއްޓޭ، މަޓޭ އަދި ސައީދުގެ އިތުރުން ދެން އުޅުނީ އެ ރަށު މީހުންނެވެ. އަލަށް ސްކްރީނުން ފެނުނު އެ ކާސްޓު ވަނީ މުޅި އޮލިމްޕަސް ހެއްވާލާފަ އެވެ. ރައްޓެހިންނާއި އާއިލާއާ އެކު ގޮސް ބަލައިލަން އެއީ އެއްވަނައިގެ ފިލްމެއް ކަމަށް އޯޑިއަންސްގެ ގިނަ މީހުން ބުނެ އެވެ.
ފިލްމުގެ އެންމެ ފަހު ޝޯ އެޅުވި ފަހުން ވެސް ސޯޝަލް މީޑިއާގައި ގިނަ ބަޔަކު އައީ އެ ފިލްމު ތަޖުރިބާކޮށްލަން ބޭނުންވާ ވާހަކަ ދައްކަމުންނެވެ. އެހެންވެ، ފިލްމުގެ ޕްރޮޑަކްޝަން ޓީމުން ވަނީ އަންނަ ހުކުރު ދުވަހުގެ ހަވީރު 4:00 ގައި "ވަނާޖުބޭސާ" ގެ ޝޯއެއް އަޅުވަން ނިންމައިފަ އެވެ. އެ ޝޯގެ ޓިކެޓު މިހާރު އޮލިމްޕަހުން ލިބޭނެ އެވެ.
"ޕާޓިކަލްސް ސްޓޫޑިއޯ"، "ދަ ސްޓޫޑިއޯ" އަދި "ވާންޗޯ އެންޓަޓެއިންމެންޓް" ގުޅިގެން އުފެއްދި އެ ފިލްމުގައި މައިގަނޑުކޮށް ފެންނަނީ އެއް ރަށަކަށް ޒިޔާރަތްކުރާ މުއްސަންޖަކާއި، ސެލެބްރިޓީއެއް އެ ރަށު އަންހެން ކުދިންތަކަކަށް ހިތްކިޔައި، ކައިވެނިކުރެވޭތޯ ކުރާ މަސައްކަތުގެ ތެރެއިން ދިމާވާ ހެއްވާމަޖާ ކަންތައްތަކެވެ.
ހިންދީ ފިލްމުތަކުގެ ގިނަ ރެފަރެންސްތަކެއް ވެސް ގެނެސްފައިވާ މި ފިލްމަކީ އޮލިމްޕަހުގައި 7.1 ޑޮލްބީ ސައުންޑު ބޭނުންކޮށްގެން އެޅުވި ފުރަތަމަ ދިވެހި ފިލްމެވެ.
ފިލްމު ބެލި މީހުން ބުނާގޮތުގައި، އަލަށް އެކްޓިންއަށް ނުކުތް ބަޔަކާ އަޅާބަލާއިރު މިއީ މޮޅު އަދި މަޖާ ފިލްމެކެވެ. .