20 އެޕްރީލް 2023 - 10:09
ޕޯޗުގަލްގެ ބެންފީކާގެ މައްޗަށް ކުރި ހޯދައި އިޓަލީގެ އިންޓަ މިލާނުން ޔުއެފާ ޗެމްޕިއަންސް ލީގުގެ ސެމީ ފައިނަލުން ފުރުސަތު ހޯދުމާ އެކު، ސެމީގައި މިލާން ޑާބީ އެއް ފެނުމުގެ ފުރުސަތު ފަހިވެއްޖެ އެވެ.
އިންޓަ އިން ރޭ ބެންފީކާއާ 3-3 އިން އެއްވަރުވި ނަމަވެސް ސެމީ އަށް ދިޔައީ ފުރަތަމަ ލެގުން 2-0 އިން މޮޅުވެފައިވާތީ 5-3 ގެ އެގްރިގޭޓުންނެވެ. ސެމީގައި އިންޓަ ވާދަކުރަން ޖެހޭ، އެ ޓީމާ ވާދަވެރި އޭސީ މިލާން، އެ ހިސާބަށް ދަތުރުކުރީ އިޓަލީގެ އެހެން ޓީމެއް ކަމަށްވާ ނަޕޯލީގެ މައްޗަށް އަންގާރަ ދުވަހުގެރޭ ދެ ލެގުން ކުރި ހޯދައިގެންނެވެ.
މިއީ ޔޫރަޕުގެ އެންމެ ވާދަވެރި ޓީމުތަކުގެ ތެރޭ ހިމެނޭ އިންޓަ އާއި މިލާނުގެ ކުރިމަތިލުމެއް ޗެމްޕިއަންސް ލީގުގައި ފެންނާނެ ތިން ވަނަ ފަހަރެވެ. ކުރީ ދެ ފަހަރު ވެސް ކުރި ހޯދީ މިލާނެވެ.
އެގޮތުން 2002/2003 ގެ މުބާރާތް މިލާން ކާމިޔާބުކުރީ ސެމީގައި އިންޓައާ ފުރަތަމަ ލެގު 0-0 އިން އަދި ދެ ވަނަ ލެގު 1-1 އިން އެއްވަރުވި ނަމަވެސް އަވޭ ގޯލުން ކުރި ހޯދައިގެންނެވެ. ދެ ޓީމު ބޭނުންކުރަނީ އެއް ސްޓޭޑިއަމް ކަމަށް ވިޔަސް، ޔުއެފާ އިން ކަނޑައަޅާފައި އޮތީ ފަހު މެޗަކީ މިލާނުގެ އަވޭ ގޭމް ކަމަށެވެ.
މި ދެ ޓީމު ދެން ކުރިމަތިލީ 2004/2005 ގެ މުބާރާތުގެ ކުއާޓާ ފައިނަލުގަ އެވެ. ފުރަތަމަ ލެގު 2-0 އިން މިލާން ކާމިޔާބުކޮށް ދެ ވަނަ ލެގުގައި ވެސް 1-0 އިން އެ ޓީމު ލީޑުގައި އޮއްވާ އިންޓަގެ ސަޕޯޓަރުން ދަނޑަށް ފަޓާސް އުކުމުން ޔުއެފާ އިން ވަނީ މެޗު ހުއްޓާލައި 3-0 އިން މިލާން މޮޅުވީ ކަމަށް ނިންމައިފަ އެވެ. އެ ދުވަހު އިންޓަ ސަޕޯޓަރުން އެއްލި ފަޓާހެއް މިލާނުގެ ބްރެޒިލް ގޯލްކީޕަރު ޑިޑާގެ މޫނުގައި ޖެހުނެވެ.
އެ ފަހަރު މިލާން ފައިނަލަށް ދިޔަ ނަމަވެސް ލިވަޕޫލް އަތުން ޕެނަލްޓީ ޖަހައިގެން ބަލިވީ އެވެ.
އިންޓަ އިން ރޭ އަމިއްލަ ދަނޑުގައި ކުޅުނު މެޗުގެ 14 ވަނަ މިނެޓުގައި ނިކޯލޯ ބަރެއްލާ ލީޑު ނެގުމުން ބެންފީކާ އިން ކުރަން ޖެހޭ މަސައްކަތް ދެގުނަވި އެވެ. އެކަމަކު 38 ވަނަ މިނެޓުގައި އެ ޓީމުގެ ފްރެޑްރިކް އޯސްނެސް އެއްވަރުކޮށް އުއްމީދެއް ހޯދައިދިނެވެ. އެކަމަކު ދެ ވަނަ ހާފުގައި އިންޓަގެ ލޮޓާރޯ މާޓިނޭޒް އާއި ޔަކީމް ކޮރެއާ ތަފާތު ބޮޑުކުރި އެވެ. ބެންފީކާ އިން އެއްވަރުކުރީ ފަހު ވަގުތު އެންޓޯނިއޯ ސިލްވާ އާއި ޕެޓާ މުސާ ޖެހި ގޯލްތަކުންނެވެ.
ސެމީގައި އިންޓަ އާއި މިލާން ބައްދަލުކުރާ ފުރަތަމަ މެޗު އޮންނާނީ އަންނަ މަހުގެ 9 ވަނަ ދުވަހުގެރެ އެވެ. ދެ ވަނަ ލެގު އޮންނާނީ 16 ވަނަ ދުވަހުގެރެ އެވެ. ސެން ސީރޯގައި ދެ މެޗު ކުޅުނަސް މިލާނުގެ ހޯމް ގޭމަކީ ފުރަތަމަ މެޗެވެ.
މި ދެ ޓީމު މި ސީޒަނުގައި މިހާތަނަށް ތިން ފަހަރު ބައްދަލުކޮށްފަ އެވެ. ލީގުގައި މިލާން ފުރަތަމަ މެޗުން 3-2 އިން މޮޅުވިއިރު އިންޓަ އަނެއް މެޗުން 1-0 އިން މޮޅުވި އެވެ. އަދި އިޓާލިއަން ސުޕަ ކަޕުގައި އިންޓަ 3-0 އިން މޮޅުވި އެވެ.