18 އެޕްރީލް 2023 - 13:28
އުރީދޫގެ ކަސްޓަމަރުން އެމް-ފައިސާ މެދުވެރިކޮށް ޒަކާތް ދެއްކޭނީ މިރޭގެ ނިޔަލަށް ކަމަށް އުރީދޫއިން ބުނެފި އެވެ.
އުރީދޫއިން ބުނި ގޮތުގައި މިރޭގެ 11:59ގެ ނިޔަލަށް އެމް-ފައިސާ މެދުވެރިކޮށް ޒަކާތް ދެއްކޭނެ އެވެ. އެމް-ފައިސާ މެދުވެރިކޮށް ޒަކާތް ދެއްކުމަށް އެމް-ފައިސާއަށް ލޮގިންކުރުމަށް ފަހު ޒަކާތް ދައްކަން ބޭނުންވާ ބާވަތެއް ހިޔާރުކުރަން ޖެހޭނެ އެވެ. އެއަށް ފަހު، އެމް-ފައިސާ ހިޔާރުކޮށް ވޮލެޓް ނަމްބަރު ޖަހައި ފޯނަށް އަންނަ އޯޓީޕީ އެންޓާކުރުމުން ޒަކާތް ދެއްކުނީ އެވެ.
އުރީދޫއިން އެމް-ފައިސާ މެދުވެރިކޮށް ޒަކާތް ދެއްކޭނެ އިންތިޒާމުތައް ހަމަޖައްސާފައި ވަނީ ގޭގައި ތިބެގެން ފަސޭހައިން ޒަކާތް ދެއްކުމަށް މަގު ފަހިކޮށްދިނުމަށެވެ.
އެމް-ފައިސާ ނުގެންގުޅޭ ކަސްޓަމަރުންނަށް #909* އަށް ޑައިލް ކޮށްގެން ފިތުރު ޒަކާތް ދެއްކޭނެ އެވެ.
ރޯދަމަހަށް ހާއްސަކޮށް އުރީދޫއިން ވަނީ އެމް-ފައިސާ މެދުވެރިކޮށް ކެންސާ ސޮސައިޓީ، މޯލްޑިވްސް ޑެފް އެސޯސިއޭޝަން، ކުޑަކުދިންގެ ހިޔާ އަދި ފިޔަވަތިއަށް ފައިސާގެ އެހީތެރިކަން ފޯރުކޮށްދެވޭނެ އިންތިޒާމް ހަމަޖައްސާފަ އެވެ. އަދި މިޝަން ފޯ މައިގްރަންޓް ވޯކާސްއާ ގުޅިގެން އެމް-ފައިސާ މެދުވެރިކޮށް ބިދޭސީ މަސައްކަތްތެރިންނަށް ރޯދަ ވިއްލާ ޕެކެއް ހަދިޔާ ކުރުމުގެ ފުރުސަތު ވެސް ވަނީ ހުޅުވާލާފަ އެވެ.
އެމް-ފައިސާ އަކީ އުރީދޫގެ ޑިޖިޓަލް ވޮލެޓެވެ. އެ އެޕް މެދުވެރިކޮށް ގޭހާއި، ކަރަންޓު އަދި ފެން ބިލާއި ރެސްޓޯރަންޓްތަކާއި ފިހާރަތަކަށް ފައިސާ ދެއްކޭނެ އެވެ. އަދި އާއިލާ އާއި ރައްޓެހިންނަށް ވެސް އެމް-ފައިސާ މެދުވެރިކޮށް ފައިސާ ފޮނުވޭނެއެވެ.
އެމް-ފައިސާގެ ހިދުމްތަ ހުރިހާ ނެޓްވޯކެއްގެ ކަސްޓަމަރުންނަށް ވެސް ލިބޭނެ އެވެ.