05 އެޕްރީލް 2023 - 10:58
މި އަހަރުގެ ސާފް ޗެމްޕިއަންޝިޕުގައި ބައިވެރިވުމުގެ ދައުވަތު ސައޫދީ އަރަބިއްޔާ އާއި މެލޭޝިއާ އަށް ދީފި އެވެ.
އިންޑިއާގެ ބެންގަލޫރުގައި ޖޫން 21 އިން ޖުލައި 3 އަށް ބާއްވާ ދެކުނު އޭޝިއާގެ ފުޓްބޯޅަ މުބާރާތުގައި ބައިވެރިވުމުގެ ފުރުސަތު ސަރަހައްދުން ބޭރު ދެ ގައުމަކަށް ދޭން ސައުތު އޭޝިއަން ފުޓްބޯޅަ ފެޑެރޭޝަން (ސާފް) އިން ނިންމީ މުބާރާތުގެ ފެންވަރު ރަނގަޅު މަތިކުރުމަށެވެ. އަނެއް ސަބަބަކީ، އަށް ޓީމު ހިމަނައިގެން ވާދަވެރި މުބާރާތެއް ރޭވުމެވެ.
އެންމެ ފަހުން ބޭއްވި މުބާރާތުގައި، ބައިވެރިވީ އެންމެ ފަސް ގައުމަކުން ކަމަށް ވުމުން، ފައިނަލް ކުޅުނީ ލީގު އުސޫލުން ބުރެއް ކުޅެ އެންމެ ގިނަ ޕޮއިންޓް ހޯދި ދެ ޓީމުގެ މެދުގަ އެވެ.
ފީފާ އިން ސްރީ ލަންކާ ސަސްޕެންޑްކޮށްފައިވާތީ، މި އަހަރުގެ މުބާރާތުގައި މި ސަރަހައްދުން ވާދަކުރަން އޮތީ ހަ ގައުމެވެ. އެއީ އިންޑިއާ، ދިވެހިރާއްޖެ، ޕާކިސްތާން، ބަންގްލަދޭޝް، ނޭޕާލް އަދި ބޫޓާނެވެ.
މިދިޔަ އަހަރުގެ ވޯލްޑް ކަޕުގައި ޗެމްޕިއަން އާޖެންޓީނާ 2-1 އިން ބަލިކޮށް މުޅި ދުނިޔެ ހައިރާންކޮށްލި ސައޫދީން، މުބާރާތުގައި ބައިވެރިިވިޔަސް ފޮނުވާނީ، 23 އަހަރުން ދަށުގެ ޓީމު ކަމަށް ބެލެވެ އެވެ. ބެލެވެނީ މެލޭޝިއާ އިން ވެސް އަމަލުކުރާނީ އެގޮތަށް ކަމަށެވެ.
މީގެ ތެރެއިން ސައޫދީ އަކީ، އޭޝިއާގެ ޗެމްޕިއަންކަން ތިން ފަހަރު ހޯދާފައިވާ އަދި މި ސަރަހައްދުގެ ގައުމުތަކާ ބަލާއިރު ފެންވަރުގެ ގޮތުން އެތައް ގުނައެއް މަތީ ގައުމެކެވެ. އެކަމަކު މެލޭޝިއާ އަކީ، ސަރަހައްދުގެ އެންމެ ވަރުގަދަ ދެ ޓީމު ކަމަށްވާ އިންޑިއާ އާއި ރާއްޖެއާ ދާދި އެއް ފެންވަރެއްގެ ގައުމެކެވެ.
މިހާތަނަށް ބޭއްވި 13 ސާފް ޗެމްޕިއަންޝިޕުގެ ތެރެއިން އަށް މުބާރާތް ކާމިޔާބުކުރީ އިންޑިއާ އެވެ. ފަހަކަށް އައިސް އެ ގައުމާ އެންމެ ބޮޑަށް ވާދަކުރާ ގައުމަކީ ރާއްޖެ އާއި އަފްގާނިސްތާނެވެ. އެކަމަކު އަފްގާނިސްތާން މިހާރު މެދުތެރޭ އޭޝިއާ އަށް ބަދަލުކޮށްފައިވާތީ ސާފް ޗެމްޕިއަންޝިޕުގައި ވާދަނުކުރެ އެވެ. އެހެންވެ އިންޑިއާ އަށް ކޮންމެ ފަހަރަކު ވެސް މުބާރާތް ކާމިޔާބުކުރަން އޮންނަނީ ފަހި ފުރުސަތެކެވެ.
އިންޑިއާ އިން ވަނީ މުބާރާތުން މާބޮޑު ފައިދާއެއް ނުކުރާތީ މި އަހަރުގެ މުބާރާތަށް 23 އަހަރުން ދަށުގެ ޓީމު ފޮނުވަން ވެސް ވިސްނާފަ އެވެ. އެކަމަކު ބެލެވޭ ގޮތުގައި އިންޑިއާގެ މިހާރުގެ ވިސްނުމަކީ، އެހެން ދެ ގައުމެއް ވާދަކުރާތީ ސީނިއާ ޓީމު ފޮނުވުމެވެ. ބޭރު ޓީމުތަކެއް ބައިވެރިކުރުމަކީ އިންޑިއާ އިން ހުށަހެޅި ވިސްނުމެއް ކަމަށް ރިޕޯޓްތައް ބުނެ އެވެ.