01 އެޕްރީލް 2023 - 17:53
އޭނާ މި އަހަރުގެ ރިޔާސީ އިންތިހާބުގައި ވާދަކުރައްވަން ނިންމެވުމާއެކު، އުފެދިފައިވާ ސިޔާސީ އޮއިވަރުގައި ޖުމްހޫރީ ޕާޓީ (ޖޭޕީ) ދޫކުރައްވާ ސަރުކާރުގެ އިސްވެރިން އެ ޕާޓީ އާއި ޕާޓީގެ ލީޑަޝިޕް ބަދުނާމު ނުކުރެއްވުމަށް ލީޑަރު ގާސިމް އިބްރާހިމް މިއަދު އެދިވަޑައިގެންފި އެވެ.
އޭނާގެ މި އިލްތިމާސް އައީ ޖޭޕީގެ ސްލޮޓްގައި ސަރުކާރުގައި ތިއްބެވި ބައެއް ބޭފުޅުން އެ ޕާޓީން ވަކިކޮށްދިނުމަށް އެދިވަޑައިގެން ފޮނުއްވާ ސިޓީތަކުގައި ގާސިމަށާއި ޖޭޕީ އަށް ނިސްބަތްވާ ގޮތަށް ބައެއް ވާހަކަތައް ހިމަނުއްވާތީ އެ ކަމުގެ ނުރުހުމުގައި ކުރެއްވި ޓުވީޓެއްގަ އެވެ.
"ސަރުކާރުގެ މަގާމުތަކުގައި ތިއްބެވި ޖޭޕީގެ ބައެއް ބޭފުޅުން އެ ބޭފުޅުންގެ މަގާމު ދިފާއު ކުރެއްވުމުގެ ނިޔަތުގައި ޕާޓީ އާއި ޕާޓީގެ ލީޑަޝިޕް ބަދުނާމު ނުކުރައްވާ، ކަމުގެ ހަގީގަތާ އެއްގޮތަށް ވަޒީފާގެ ބޭނުމަށްޓަކައި ޕާޓީން ވަކިވާކަން އިއުލާން ކުރެއްވުން ކީއްތޯ!؟" ގާސިމްގެ ޓުވީޓުގައި ވިދާޅުވި އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ގާސިމް ވާދަކުރައްވާނެ ކަމަށް އިއުލާން ކުރެއްވުމާއެކު، ޖޭޕީގެ ސްލޮޓުގައި ސަރުކާރުގައި ތިއްބެވި ބައެއް ބޭފުޅުން އަންނަނީ އެ ޕާޓީން ވަކިވެ ރައީސް އިބްރާހިމް މުހައްމަދު ސޯލިހަށް ތާއީދު ކުރައްވަމުންނެވެ.
އެ ބޭފުޅުންގެ ނިޔަތާ މެދު ގާސިމް މިއަދު ސުވާލު އުފެއްދެވި އެވެ. އޭނާ ވިދާޅުވި ގޮތުން ނަމަ އެ ބޭފުޅުން ޖޭޕީ ދޫކުރައްވަނީ "މަގާމު ދިފާއު ކުރެއްވުމުގެ ނިޔަަތުގަ" އެވެ.
ސަރުކާރުގެ ސްލޮޓުތަކުގައި ޖުމްހޫރީ ޕާޓީގެ ތިން މިނިސްޓަރަކު ތިއްބަވަ އެވެ. އެއީ ގާސިމްގެ އަނބިކަނބަލުން އަދި ޓްރާންސްޕޯޓް މިނިސްޓަރު އާއިޝަތު ނަހުލާ އާއި ފިޝަރީޒް މިނިސްޓަރު ޑރ. ހުސައިން ރަޝީދު ހަސަން އަދި ޓޫރިޒަމް މިނިސްޓަރު އަބްދޫﷲ މައުސޫމް އެވެ.
އޭގެ ތެރެއިން މައުސޫމް ވަނީ ރައީސް އިބްރާހިމް މުހައްމަދު ސޯލިހާއެކު ހުންނަވަން ނިންމެވިކަން އިއުލާން ކުރައްވައި ޕާޓީގެ ރަސްމީ ގްރޫޕުތައް ދޫކުރައްވައިފަ އެވެ. އާއިޝާ އާއި ހުސައިން މިހާތަނަށް ތިއްބެވީ ހިމޭނުންނެވެ.
ޖޭޕީގެ ސްލޮޓްގައި ސަރުކާރުގައި ތިއްބެވި ބައެއް އިސްބޭފުޅުންގެ ތެރެއިން މިހާތަނަށް އެ ޕާޓީ ދޫކުރެއްވި ބޭފުޅުންގެ ތެރޭގައި އިމިގްރޭޝަން ކޮންޓްރޯލަރު މުހައްމަދު އަހުމަދު ހުސައިން (ހަނަފީ) އާއި އެމްޓީސީސީގެ މެނޭޖިން ޑިރެކްޓަރު އާދަމް އާޒިމާއި އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހާއި އާޓްސް، ކަލްޗާ އެންޑް ހެރިޓޭޖް މިނިސްޓްރީގެ ޑެޕިއުޓީ މިނިސްޓަރު ވަލީދާ ވަލީދު އަދި ހަޔާ އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރު އާމިނަތު މުހައްމަދު ސަލީމާއި ޗައިނާގައި ހުންނަވާ ރާއްޖޭގެ ޑެޕިއުޓީ އެމްބެސެޑަރު ސޮބާހު ރަޝީދު ހިމެނިވަޑައިގަންނަވަ އެވެ.
ގާސިމް މި އަހަރުގެ ރިޔާސީ އިންތިހާބަށް ނުކުންނަވަނީ ކުރީގެ ރައީސް މުހައްމަދު ނަޝީދުގެ ތާއީދާއެކުގަ އެވެ. ގާސިމްގެ ރަނިންމޭޓަކަށް ހަމަޖައްސަވަން ނަޝީދުގެ ފަރާތްޕުޅުން ބޭނުންފުޅުވަނީ އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ކަމަށް ވެ އެވެ.
މި ފަހަރުގެ ރިޔާސީ އިންތިހާބަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހާއެކު ތިބުމަށް މިހާތަނަށް އެއްބަސްވީ އަދާލަތު ޕާޓީ އާއި އެމްޑީއޭ އެވެ. އަދި ޓޫރިޒަމް ދާއިރާގެ އެއް މަހުޖަނު ޗަމްޕާ މުހައްމަދު މޫސާ (އުއްޗު) ވަނީ ރައީސް އިބްރާހިމް މުހައްމަދު ސޯލިހާއެކު ހުންނެވި ކަން އިއްޔެ ހާމަކުރައްވައިފަ އެވެ.