01 މާޗް 2023 - 07:23
"އެވަޓާ: ދަ ވޭ އޮފް ވޯޓާ" ޕްރިމިއާ ކުރިތާ ގާތްގަނޑަކަށް ދެ މަސް ދުވަސް ފަހުން އަނެއްކާ ވެސް ބައިނަލްއަގްވާމީ ރެކޯޑެއް މުގުރާލައިފި އެވެ.
މިދިޔަ އަހަރުގެ ޑިސެމްބަރު މަހުގެ 16 ވަނަ ދުވަހު ނެރުނު އެ ފިލްމަކީ، މިހާތަނަށް އެންމެ ބޮޑު އާމްދަނީއެއް ހޯދި، 2009 ވަނަ އަހަރު ޖޭމްސް ކެމަރަން ޑައިރެކްޓުކޮށް ނެރުނު "އެވަޓާ" ފިލްމުގެ ދެވަނަ ބަ އެެވެ.
އެ ފިލްމަށް މިހާރު ވަނީ މުޅި ޔޫރަޕުން އެންމެ ގިނަ އާމްދަނީ ހޯދި ފިލްމުގެ ރެކޯޑު ލިބިފަ އެވެ. އެއީ "އެވަޓާ" ސީކުއެލްގެ ފުރަތަމަ ބައި ވެސް ފަހާލައިފަ އެވެ.
ޔޫރަޕްގެ އެއް ވަނައިގެ ތާރީހީ ރެކޯޑު ލިބުނަސް، ދުނިޔޭގެ ބޮކްސް އޮފީހުގައި، 2.27 ބިލިއަން ޑޮލަރުގެ އާމްދަނީއަކާ އެކު "އެވަޓާ 2" މިވަގުތު އޮތީ އެންމެ ގިނަ އާމްދަނީ ހޯދި ފިލްމުތަކުގެ ލިސްޓުގެ ތިން ވަނައިގަ އެވެ.
ދުނިޔޭގެ ލިސްޓުގައި އެއްވަނަ ހޯދަން "އެވަޓާ 2" ބޮކްސްއޮފީހުގައި އަދި ވަރަށް ދިގު ދަތުރެއް ކުރަންޖެހެ އެވެ. އެއްވަނައިގާ އޮތް "އެވަޓާ (2.9 ބިލިއަން ޑޮލަރު)" ގެ ރެކޯޑު މުގުރާލަން ބޭނުން ނަމަ، އަދި 650 މިލިއަން ޑޮލަރު ހޯދަން ޖެހޭނެ އެވެ.