24 ފެބުރުއަރީ 2023 - 17:59
މި އަހަރުގެ ރިޔާސީ އިންތިހާބުގައި ޖުމްހޫރީ ޕާޓީގެ އެހީތެރިކަމަށް ބޭނުންވެފައި އޮތް ދެ ޕާޓީ ކަމަށްވާ، މިހާރުގެ ކޯލިޝަން ޕާޓްނަރު އެމްޑީޕީ އާއި އިދިކޮޅު ޕީޕީއެމްއާ މެދު ޖުމްހޫރީ ޕާޓީގެ ލީޑަރު ގާސިމް އިބްރާހީމް ވަރަށް ބޮޑަށް ޝަކުވާކުރައްވައިފި އެވެ.
އިންތިހާބުގައި ޖުމްހޫރީ ޕާޓީން އަމަލުކުރާނެ ގޮތެއް ނިންމުމަށް މިއަދު އެ ޕާޓީގެ ގައުމީ ކޮންފަރެންސް ފެށިއިރު، އެމްޑީޕީން ވަނީ ކޯލިޝަން ހެދުމަށް އެ ޕާޓީ އަށް ދައުވަތު ދީފަ އެވެ. އަދި ޕީޕީއެމްގެ މަޖިލިސް މެމްބަރު އަހުމަދު ތޯރިގް (ޓޮމް) ވަނީ އެ ޕާޓީގެ ފަރާތުން ގާސިމަށް ނުރަސްމީކޮށް ކޯލިޝަނުގެ ދައުވަތު ދެއްވައިފަ އެވެ.
މިއަދުގެ ޖަލްސާގައި ގާސިމް ވާހަކަ ފެށްޓެވީ، ޕީޕީއެމްގެ އަބްދުﷲ ޔާމީނުގެ ވެރިކަމުގައި، އޭނާ އާއި އޭރުގެ އިދިކޮޅު ސިޔާސީ ލީޑަރުންނަށް ލިބުނު އަނިޔާގެ ހަނދާންތައް އާކުރައްވަމުންނެވެ.
ގާސިމް ވިދާޅުވީ އެންމެ ފަހުން މިފަދަ ކޮންފަރެންސެއް ބޭއްވިއިރު އެކަން ކުރެވުނީ ވަރަށް އުނދަގުލުން ކަމަށާއި ގިނަ ސިޔާސީ ލީޑަރުން ތިއްބެވީ ހުކުމްތަކާއި ޖަލު ގޮޅިތަކުން ސަލާމަތް ނުވެވިފައި ކަމަށެވެ. އެއީ ހިތަށް ވެސް ގެންނަން ނުކެރޭ ފަދަ ސިޔާސީ ކޮޅިގަނޑެއް އައި ދުވަސްވަރެއް ކަމަށް ގާސިމް މިއަދުގެ ޖަލްސާގައި، އެ ދުވަސްތައް ސިފަކުރައްވަމުން ވިދާޅުވި އެވެ.
އޭރުގެ އިދިކޮޅު ލީޑަރުންގެ ގޮތުގައި ތިއްބެވި އެމްޑީޕީގެ ރައީސް މުހައްމަދު ނަޝީދާއި އަދާލަތު ޕާޓީގެ ރައީސް ޝޭހް އިބްރާހިމް އަބްދުﷲ އަށް ދައުވަތު ދެއްވައިގެން ބޭއްވި ޖަލްސާގައި ގާސިމް ވިދާޅުވީ އެއީ ވެސް ޔާމީނުގެ އަނިޔާވެރިކަމުގެ ޝިކާރަޔަކަށްވީ ބޭފުޅުން ކަމަށެވެ.
ގާސިމް ވިދާޅުވީ ޔާމީނުގެ ވެރިކަމުގައި، އޭނާގެ މައްޗަށް ކޯޓުން ޣައިރު ގާނޫނީ ހުކުމެއް ކުރީ، ހޮސްޕިޓަލުގައި އެޑްމިޓުކޮށްފައި އޮއްވާ ކަމަށާއި، ރާއްޖެ އާދެވޭނެ ގޮތެއް ނެގި ސިންގަޕޫރާއި ޖަރުމަނުގައި ގިނަ ދުވަސްތަކެއް ހޭދަކުރަން ޖެހުނު ކަމަށެވެ.
އެކަމަކު، އެ ވާހަކަތައް ދައްކަވަމުން ގެންދިޔައިރު ލޮލަށް ޖަމާވަމުން ދިޔަ ކަރުނަތައް ފޮހެލައްވައި ގާސިމް ވިދާޅުވީ އެއީ އެކަން އަބަދު ހިތުގައި ބާއްވައިގެން ހަސަދަވެރިވެގެން އުޅެން ޖެހޭ ސަބަބެއް ނޫން ކަމަށެވެ.
"އެއީ ފަހަތުން ދުވެ، ނުނެއްޓިގެން އުޅެން ޖެހޭ ކަމެއް ވެސް ނޫން،" އޭރުގެ އަނިޔާތަކަކީ ޕީޕީއެމްއާ އަލުން ގުޅެން އޮތް ހުރަހެއް ނޫން ކަމަށް އިޝާރާތްކުރައްވައި ގާސިމް ވިދާޅުވި އެވެ.
"އަޅުގަނޑުގެ ހަމަގައިމު ވެސް ހިތް ހަލާސް، އެއިން އެއްވެސް ބޭފުޅަކާ މެދު ހިތް ބުރަކަމެއް ނެތް."
ޖަލްސާގައި ގާސިމް ދެން ވިދާޅުވެދެއްވީ އެމްޑީޕީއާ އެކު ކުރެވުނު ހިތި ތަޖުރިބާތަކުގެ ވާހަކަތަކެވެ. އެމްޑީޕީއާ އެކު، 2008 ގެ އިންތިހާބުގެ ދެ ވަނަ ބުރުގައި ކޯލިޝަން ހެއްދެވި އެކަމަކު، 2013 ގައި އެ ފުރުސަތު ދޫކޮށްލެއްވުމަށް ފަހު، 2018 ގައި އަލުން އެ ޕާޓީއާ އެކު ކޯލިޝަން ހެއްދެވި ގާސިމް ވިދާޅުވީ ގިނަ ފަހަރަށް އެއްބަސްވާ ގޮތަކަށް ކަންކަން ނުވާ ކަމަށެވެ.
ގާސިމް ވިދާޅުވީ ކޮންމެ ފަހަރަކު ކޯލިޝަނެއްގެ ބައިވެރިންނާއެކު އެއްބަސްވެވެނީ ސަރުކާރުގެ ސިޔާސަތުތައް އެކުލަވައިލުމާއި ތަންފީޒު ކުރުމުގެ ހުރިހާ މަރުހަލާއެއްގައި އެ ޕާޓީގެ ވެސް ބައިވެރިވުން ބޭއްވުމަށް ކަމަށެވެ. އެގޮތުން މަޖިލީހާއި ކައުންސިލް އިންތިހާބުގައި އެއްކޮށް ވާދަކުރަން ވެސް އެއްބަސްވެވޭ ކަމަށާއި އެކަމަކު އެއިން ކަމެއް ހަގީގަތަކަށް ނުވާ ކަމަށް ގާސިމް ވިދާޅުވި އެވެ.
"އެ މައްސަލައިގައި ޖޭޕީގެ މެންބަރުންގެ ޝަކުވާ އިންތިހާއަށް ބޮޑު،" ގާސިމް ވިދާޅުވި އެވެ.
ރާއްޖޭގެ އެންމެ ބޮޑު އެއް މަހުޖަނު ވިދާޅުވީ ޖުމްހޫރީ ޕާޓީގެ އެހީއާ ނުލާ އެއްވެސް ބަޔަކަށް އިންތިހާބެއް ކާމިޔާބުނުކުރެވޭ ކަމަށާއި އެކަމަކު އެ ސަރުކާރަކުން ކުރާ ރަނގަޅު އެއްވެސް ކަމެއްގެ ތައުރީފެއް އެ ޕާޓީ އަށް ނުލިބޭ ކަމަށެވެ.
"މިކަންކަން ދަނީ ގިނަ ފަހަރަށް ކަނދިކަމަނާގެ މަސްތެލުން އިންނަ ގޮތަށް. މަސްކޮޅު މީރީއްޔާ ކަނދިކަމަނާގެ މޮޅުކަން. ރަހަ ގޯސްވެއްޖެ އާ އެހެން މީހުންގެ މައްސަލަ،" ގާސިމް ވިދާޅުވި އެވެ.
ގާސިމް ވިދާޅުވީ ސަރުކާރުގެ ވައުދުތައް ފުއްދަމުން އަންނަނީ ޖުމްހޫރީ ޕާޓީގެ ހިންގުންތެރި މިނިސްޓަރުންނާއި ކުންފުނިތަކުގެ ވެރިންގެ މަސައްކަތާ އެކު ކަމަށާއި އެކަމަކު އެ ކާމިޔާބީގައި އެ ޕާޓީއަށް ކްރެޑިޓެއް ދެން އެއްވެސް ބަޔަކު ބޭނުންނުވާ ކަމަށެވެ.
ޖުމްހޫރީ ޕާޓީން ބޭނުންވާ ހުރިހާ ކަމެއް އެގޮތަށް ކުރިޔަށް ގެންދެވުނަސް ރައްޔިތުންނާއި ގައުމީ މަސްލަހަތަށް ޓަކައި ކެތްތެރިކަމާއެކު މަޑުން ހުންނަވާ ކަމަށް ގާސިމް ވިދާޅުވި އެވެ.
"އަޅުގަނޑުމެން މި އަންނަނީ 2008 ވަނަ އަހަރުން ފެށިގެން އެފަދަ ތަޖުރިބާތަކެއް ކުރަމުން. ކުރިޔަށް އޮތްތަނުގައި އެ ކަންކަމުން އިބުރަތް ހާސިލްކުރާނަން،" ގާސިމް ވިދާޅުވި އެވެ.
މި އަހަރުގެ އިންތިހާބުގައި ޖުމްހޫރީ ޕާޓީ ވަކިން ވާދަކުރަން، އެ ޕާޓީގެ މެމްބަރުންތަކެއް ވަނީ މިއަދުގެ ކޮންފަރެންސަށް ގަރާރެއް ހުށަހަޅައިފަ އެވެ. އެނގިފައިވާ ގޮތުގައި ގާސިމް އިންތިހާބުގައި ވާދަކުރަން، ނަޝީދު ވެސް އަންނަނީ ބާރުއަޅުއްވަމުންނެވެ. ނަޝީދު ވަނީ އެމަނިކުފާނާ ވާދަކޮށް އެމްޑީޕީގެ ރިޔާސީ ޓިކެޓް ކާމިޔާބުކުރެއްވި މިހާރުގެ ރައީސް އިބްރާހިމް މުހައްމަދު ސޯލިހަށް ތާއީދުނުކުރައްވާނެ ކަމަށް ވިދާޅުވެފަ އެވެ.