19 ފެބުރުއަރީ 2023 - 12:43
ޖުމްހޫރީ ޕާޓީގެ ފަސް ޑެޕިއުޓީ ލީޑަރުންގެ މަގާމަށް 12 ބޭފުޅަކު ކުރިމަތިލައްވައި ވާދަވެރިކަން ބޮޑުވެއްޖެ އެވެ.
މިމަހުގެ 24 އިން 25 ވަނަ އަށް ބާއްވާ ޖޭޕީގެ ގައުމީ ކޮންފަރެންސްގައި އެ ޕާޓީގެ ލީޑަރާއި ނައިބު ލީޑަރުންނާއި އެހެނިހެން މަގާމުތަކަށް ބޭފުޅުން އިންތިހާބު ކުރާނެ އެވެ.
މަގާމުތަކަށް ކުރިމަތިލާފައިވާ ކެންޑިޑޭޓުންގެ ނަންތައް ޖޭޕީން އާންމުކޮށްފައިވާއިރު، އެ ޕާޓީގެ ލީޑަރު ކަމަށް ހަމައެކަނި ކުރިމަތިލައްވާފައި ވަނީ ޕާޓީ އުފެދުނީއްސުރެ އެ މަގާމުގައި ހުންނެވި ގާސިމް އިބްރާހިމެވެ. އެހެންވެ، އެ މަގާމު ގާސިމަށް މިހާރު ވަނީ ކަށަވަރުވެފަ އެވެ.
މިފަހަރު އެންމެ ވާދަވެރިކަން ބޮޑު، ޑެޕިއުޓީ ލީޑަރު ކަަމަށް ކުރިމަތިލެއްވި 12 ބޭފުޅުންގެ ނަންތައް ތަރުތީބުކޮށް މިހާރު ވަނީ ކެންޑިޑޭޓު ނަމްބަރުތައް ވެސް ދީފަ އެވެ. ކުރިމަތިލެއްވި ބޭފުޅުންގެ ތެރޭގައި މިހާރު ވެސް ޑެޕިއުޓީ ލީޑަރުގެ މަގާމް ފުރުއްވާ ބޭފުޅުން ވެސް ހިމެނިވަޑައިގަންނަވަ އެވެ.
ޑެޕިއުޓީ ލީޑަރުގެ މަގާމަށް ކުރިމަތިލެއްވި ކެންޑިޑޭޓުން:
1. އާއިޝަތު ނަހުލާ
2. ހުސެއިން ރަޝީދު ހަސަން
3. މޫސާ ނިޒާރު އިބްރާހިމް
4. އަމީން އިބްރާހިމް
5. އަހުމަދު ސައުދު
6. މުހައްމަދު އަހުމަދު ހުސެއިން (ހަނަފީ)
7. އަލީ ހަމީދު
8. ޔަޝްފާ އަބްދުލްޣަނީ
9. އިގްބާލް އާދަމް
10. ހަސަން މުޣުނީ
11. އަބްދުﷲ އަހުމަދު
12. އަލީ ޝާހު
ޖުމްހޫރީ ޕާޓީގެ ތަރުޖަމާނު އަލީ ސޯލިހު "މިހާރު"އަށް ވިދާޅުވި ގޮތުގައި ކުރިމަތިލެއްވި ގިނަ ބޭފުޅުން ދެކެވަޑައިގަންނަވާ ގޮތުގައި މިފަހަރު ގައުމަށް ހަމަޖެހުން ގެނެވެން އޮތީ ޖޭޕީއަށެވެ. އެހެންވެ، ޕާޓީގެ ކުރީ ސަފަށް ވަޑައިގަތުމަކީ މުހިންމު ކަމެއް ކަމަށް އެއިން ކޮންމެ ބޭފުޅަކު ވެސް ގަބޫލުކުރައްވާ ކަމަށް އޭނާ ވިދާޅުވި އެވެ.
ނައިބު ލީޑަރު ކަމަށް ޖޭޕީގެ ތެރެއިން ސީނިއަ ގިނަ ބަޔަކު ކުރިމަތިލައްވާފައި މިވަނީ ޕާޓީ ތެރޭގައި ދެ ފެކްޝަނެއް އޮވެ ހަރަކާތްތައް ހިންގުމުގައި ވެސް ވާދަވެރިކަން ބޮޑުވެފައިވާ ކަމަށް ޕާޓީގެ ތެރެއިން ބައެއް ބޭފުޅުން ވިދާޅުވަމުން އަންނަ ދަނޑިވަޅެއްގަ އެވެ.
ޖޭޕީގެ ތެރޭގައި ހިޔާލު ތަފާތުވުންތަކެއް އޮތް ކަމަށް ދެކެވޭ ވާހަކަތައް ދޮގުކުރައްވައި އަލީ ސޯލިހު ވިދާޅުވީ، ނައިބު ކަމަށް ކުރިމަތިލައްވާ ހުރިހާ އެންމެން ވެސް މަސައްކަތް ކުރައްވަނީ ގާސިމަށް ކަމަށެވެ.
"ހަމަ ކޮންމެ ބޭފުޅަކީ ވެސް އޮނަރަބަލް ގާސިމް އިބްރާހިމްއަށްޓަކައި މަސައްކަތް ކުރައްވާ ބޭފުޅުން. އެހެންވީމަ ވަކި ފިކުރެއްގެ މީހެކޭ އެހެން ބުނާނެ ގޮތެއް ނެތް،" އަލީ ސޯލިހު ވިދާޅުވި އެވެ.
ޖޭޕީގެ އެކި މަގާމުތަކުގެ 800 އެއްހާ މީހުން ބައިވެރިވާނެ ކަމަށް ބެލެވޭ ގައުމީ ކޮންފަރެންސްގެ ހުރިހާ ބައިވެރިންނަށް ނައިބު ލީޑަރުން ހޮވަން ވޯޓު ދެވޭނެ އެވެ. އެ މަގާމަށް އިންތިހާބު ކުރަނީ ފަސް އަހަރުގެ ދައުރަކަށެވެ.
ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީން ނިންމާ ގޮތެއް އިއުލާންކުރާނީ ވެސް މި ކޮންފަރެންސްގަ އެވެ. އަންނަ ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބުގައި ގާސިމް ވަކިން ވާދަކުރައްވާނީތޯ ނުވަތަ އަނެއްކާ ވެސް ކޯލިޝަން ވެރިކަމަކަށް ރައީސް އިބްރާހިމް މުހައްމަދު ސޯލިހްގެ ފަހަތްޕުޅަށް އަރާވަޑައިގަންނަވާނީތޯ އޮތީ ސުވާލު އުފެދިފަ އެވެ.
ގާސިމް މީގެ ކުރިން ވިދާޅުވެފައިވާ ގޮތުގައި އެ ޕާޓީގެ ބައިވެރިވުން ނެތި މިހާތަނަށް އެއްވެސް ބަޔަކަށް ވެރިކަމަކަށް ނާދެވެ އެވެ. 2008 ވަނަ އަހަރު އެމްޑީޕީ، 2013 ގައި ޕީޕީއެމް، އަދި 2018 ގައި މިހާރުގެ ސަރުކާރު އިންތިހާބުވީ ވެސް ޖުމްހޫރީ ޕާޓީއާ އެކު ކޯލިޝަން ހަދައިގެންކަން އޭނާ ފާހަގަކުރައްވަ އެވެ.
ރައީސް އިބްރާހިމް މުހައްމަދު ސޯލިހްގެ އަރިސް ބައެއް ބޭފުޅުން ގާސިމްއާ ބައްދަލުކުރެއްވި ނަމަވެސް، ގާސިމް ވަކި ގޮތެއް ނިންމެވި ކަމެއް އަދި ނޭނގެ އެވެ. ނަޝީދުގެ ގާތް ބޭފުޅުން ވެސް ގާސިމާ ބައްދަލުކުރައްވާފައިވާއިރު، ޖޭޕީ ސީނިއާ މެމްބަރުންގެ މެދުގައި ގާސިމް އިބްތިހާބަށް ނެރުމަށް މަޝްވަރާ ކުރަމުންދާ ކަމުގެ އަޑުތައް ވެސް ވަނީ ގަދަވެފަ އެވެ.