07 ފެބުރުއަރީ 2023 - 11:48
ގާޒިއަންޓެޕް (ފެބްރުއަރީ 7) - ތުރުކީ އާއި ސީރިއާގެ ބޯޑަރު ސަރަހައްދަށް އިއްޔެ އައި ބާރުގަދަ ބިންހެލުމުގައި ނިއުކާސަލް އާއި ޗެލްސީގެ ކުރިގެ ފޯވާޑް ކްރިސްޓިއަން އަޓްސޫ ގެއްލިއްޖެ އެވެ.
ތުރުކީގެ ސުޕަ ލީގުގެ ކްލަބް ހަޓައިސްޕޯ އަށް ކުޅެމުންގެންދާ ފޯވާޑް ގެއްލިފައި ވަނީ ވެއްޓިފައިވާ އިމާރާތްތަކުގެ ދަށުގައި ކަމަށް ބެލެވެ އެވެ. އެ ކްލަބްގެ ޓެކްނިކަލް ޑައިރެކްޓަރު ޓެނާ ސެޔުޓް ވެސް ވަނީ ގެއްލިފަ އެވެ.
ގާނާގެ ފޯވާޑް އަޓްސޫ ފެނިފައިވާ ކަމަށް އަޑު ފެތުރުނު ނަމަވެސް ހަޓައިސްޕޯގެ ނައިބު ރައީސް މުސްތޮފާ އޮޒާތު ވިދާޅުވީ އިމާރާތްތަކުގެ ދަށުން މިހާތަނަށް ހޯދި މީހުންގެ ތެރެއިން އަޓްސޫ އާއި ޓެނާ ނުހިމެނޭ ކަމަށެވެ.
އިނގިރޭސި ދެވަނަ ޑިވިޝަނުން 2017 ގައި ނިއުކާސަލް ޕްރިމިއާ ލީގަށް ކޮލިފައިކޮށް ދިނުމުގައި އޭރު ޗެލްސީގެ ލޯން އުސޫލުން އެ ކްލަބަށް ކުޅުނު އަޓްސޫ މުހިންމު ދައުރެއް އަދާ ކުރި އެވެ. މިދިޔަ އާދިއްތަ ދުވަހު ތުރުކީ ލީގުގައި ކަސިމްޕޯސާ އާ ދެކޮޅަށް 1-0 ން މޮޅުވި މެޗުގައި ހަޓައިސްޕޯގެ ލަނޑު ޖެހީ ވެސް އަޓްސޫ އެވެ.
ތުރުކީގެ ލިގަށް އޭނާ ބަދަލުވީ 2021 ގަ އެވެ. ނިއުކާސަލް އަށް 121 މެޗުގައި ކުޅެފައި ވެއެވެ.
