06 ފެބުރުއަރީ 2023 - 08:09
ތުރުކީގެ އިރުމަތީގައި، ސީރިއާގެ ބޯޑަރު ސަރަހައްދުގައި އޮންނަ ގާޒީއަންތާބް އަށް ބާރުގަދަ ބިންހެލުމެއް އައިސް ބޮޑެތި ގެއްލުންތަކެއް ވެއްޖެ އެވެ.
އެމެރިކާގެ ޖިއޮލޮޖިކަލް ސާވޭ އިން ބުނި ގޮތުގައި މިއީ 7.8 މެގްނިޓިއުޓްގައި މި ބިންހެލުން އައީ ތުރުކީ ގަޑިން ފަތިހު 4:17 ގަ އެވެ.
މި ބާރުގަދަ ބިންހެލުމުގެ އަސަރު ތުރުކީގެ ވެރިރަށް އަންކާރާ އާއި އެހެން ސިޓީތަކުގެ އިތުރުން ސަރަހައްދުގެ އެހެން ގައުމުތަކަށް ވެސް ކުރި އެވެ.
ރިޕޯޓްތައް ބުނާ ގޮތުގައި، ބިންހެލުމާ އެކު ވަރަށް ގިނަ އިމާރާތްތައް ވެއްޓި އެތައް ބަޔަކު އެ ތަންތަނުގެ ދަށުގައި ތާށިވެފައި އެބަތިއްބެވެ.
ތުރުކީގައި ހުރި ބީބީސީގެ ރިޕޯޓަރަކު ބުނެފައިވާ ގޮތުގައި ގާތްގަނޑަކަށް 45 ސިކުންތު ވަންދެން ބިން ހެލުނެވެ. ތުރުކީގެ މޫސުމާ ބެހޭ އިދާރާއިން ބުނީ ބިންހެލުމުގެ ބާރުމިނަކީ 7.4 މެގްނިޓިއުޑް ކަމަށާއި ފުރަތަމަ އައި ބިންހެލުމުގެ ފަހުން ވެސް ވަރުގަދަ ލޮޅުންތައް އެރި ކަމަށެވެ.
ބިންހެލުމުގެ ސަބަބުން ލިބުނު ގެއްލުންތަކުގެ ތަފްސީލެއް އަދި ނުލިބެ އެވެ. އެކަމަކު ތުރުކީން ވަނީ އިމަޖެންސީ ހާލަތުގެ އެންމެ މަތީ ދަރަޖަ ކަނޑައަޅައި، އެހީގެ މަސައްކަތް ފަށައިފަ އެވެ. ބައެއް ރިޕޯޓް ބުނާ ގޮތުގައި އުސް އެތައް އިމާރާތެއް ވެއްޓި މީހުން މަރުވެފައިވެ އެވެ.
ތުރުކީން ވަނީ މި ވަގުތު އެ ގައުމަށް ބައިނަލްއަގުވާމީ އެހީ ބޭނުންވާ ކަމަށް ވެސް ބުނެފަ އެވެ.