28 ޖެނުއަރީ 2023 - 07:18
މި ފަހުން ޓްވިޓާއަށް ގެންނަން މަސައްކަތްކުރި ހުރިހާ ރަނގަޅު ބަދަލެއް ހުއްޓުވައި ކަންކަން ގޯސްކޮށްފައިވާ ކަމަށް ބުނެ ޓްވިޓާގެ އާ ވެރިޔާ ބިލިއަނަރު އިލޯން މަސްކަށް ޓްވިޓާގެ އެއް އެއް ފައުންޑަރު ބިޒް ސްޓޯން ފާޑު ކިޔައިފި އެވެ.
"ދަ ގާޑިއަން" އަށް ދިން އިންޓަވިއުއެއްގައި ބިޒް ބުނީ އޭނާ 2017 ވަނަ އަހަރު އަލުން ޓްވިޓާއާ ގުޅުމަށް ފަހު ކޮންޓެންޓް ސުޕަވައިޒް ކުރުމުގައި ރަނގަޅު ބަދަލުތަކެއް ގެނެސް ތަންފީޒުކުރަން ފެށި ކަމަށެވެ.
"އެ ދާއިރާއިން ގިނަ ކުރިއެރުންތަކެއް ހޯދިން. އެކަމަކު މިހާރު އެ ހުރިހާ ކަމެއް ވަނީ ނައްތާލާފައި،" އޭނާ ބުންޏެވެ.
ސްޓޯންގެ ނަޒަރުގައި، 44 ބިލިއަން ޑޮލަރަށް ޓްވިޓާ ގަނެ ކުންފުނީގެ ސީއީއޯގެ މަގާމުގައި ހުރި މަސްކަކީ ޓްވިޓާ ހިންގަން އެކަށީގެންވާ މީހެއް ނޫނެވެ.
މިދިޔަ އަހަރުގެ ޑިސެމްބަރު މަހު އީލޮން ލީކު ކުރި، "ޓްވިޓާ ފައިލްސް" ނުވަތަ އެ ކުންފުނީގެ އެތެރޭގެ ސިއްރު ޑޮކިއުމެންޓުތަކުގެ މައްސަލާގައި ވެސް ސްޓޯން ވާހަކަ ދެއްކި އެވެ. ޓްވީޓުތައް ރިވިއުކުރުމުގެ މަރުހަލާ އާއި އެމެރިކާގެ ކުރީގެ ރައީސް ޑޮނަލްޑް ޓްރަމްޕު ސަސްޕެންޑު ކުރުމާ ގުޅޭ ފައިލްތަކުގައި ކުންފުނީގެ މުވައްޒަފުންގެ ނަން ވެސް ހާމަކޮށްފައި ހުރުމުން ސްޓޯން ބުނީ އެއީ ކޮށްގެން ވާނެ ކަންކަން ނޫން ކަމަށެވެ.
އެ ލިޔުންތައް ހާމަކުރުމާ ގުޅިގެން ޓްވިޓާގެ ބައެއް މުވައްޒަފުންނަށް ވަނީ ފުރައްސާރައާ ކުރިމަތިލާން ޖެހިފަ އެވެ.
ޖޭކް ޑޯސީ އާއި އެހެން ކޯފައުންޑަރުންނާ އެކު 2006 ވަނަ އަހަރު ޓްވިޓާ ވުޖޫދުކުރުމުގައި އުޅުނު ސްޓޯން ބުނީ ސޯޝަލް މީޑިއާ ކުންފުންޏެއްގެ ވެރިއަކަށް ހުރުމަކީ އެހާ ފަސޭހަކަމެއް ނޫންކަމަށެވެ. އޭނާ ބުނީ އެއްބަޔަކު ތިބޭނީ ވަރަށް އުފަލުން ކަމަށާއި އަނެއްް ބަޔަކު ތިބޭނީ ވަރަށް ރުޅި އައިސްފައި ކަމަށެވެ.
ސްޓޯން ބުނި ގޮތުގައި، ޓްވިޓާ މާ ގިނަ ދުވަހު އޮންނާނެ ކަމާ މެދު ޝައްކު އުފެދޭ ކަމަށެވެ. މިހާރު ވެސް އެ ކުންފުނިން އަންނަނީ މާލީ ދަތިތަކަކާ ކުރިމަތިލަމުން ކަމަށާއި ކުންފުނި ސަލާމަތް ނުވިޔަސް، ޓްވިޓާގެ ކޮންސެޕްޓް ދެމި އޮންނާނެ ކަމަށް އޭނާ ބުންޏެވެ.