16 ޖެނުއަރީ 2023 - 14:11
ރާއްޖެ އާއި ކެމްބޯޑިއާއާ ދެމެދު ހަ އެއްބަސްވުމުގައި މިއަދު ސޮއިކޮށްފި އެވެ.
މި އެއްބަސްވުންތަކުގައި ސޮއި ކުރީ ރައީސް އިބްރާހީމް މުހައްމަދު ސޯލިހުގެ ދައުވަތަކަށް ކެމްބޯޑިއާގެ ބޮޑުވަޒީރު ސަމްދެކް އައްކާ މޮހަ ސެނާ ޕަޑައި ޓެކޯ ހުން ސެން ރާއްޖެ އަށް ކުރައްވާ ދެ ދުވަހުގެ ދަތުރުގައި، ރައީސް އޮފީހުގައި މިއަދު ބޭއްވި ރަސްމިއްޔާތުގަ އެވެ.
ސޮއިކުރި އެއްބަސްވުންތައް:
- ކެމްބޯޑިއާއިން ރާއްޖެ އަށް ހަނޑޫ އެތެރެކުރުން
- ޒުވާރި، މިރުސް، ދަނޑިއަލުވި އަދި ކެޝޫނަޓް ފަދަ ބާވަތްތައް އެތެރެކުރުން
- މޭވާގެ ބާވަތްތައް ރާއްޖެ އަށް އެތެރެ ކުރުން
- ފޭރާމާއި ދަތުރުފަތުރާ ގުޅުން ހުރި މުދަލާއި ލަކުޑި އެތެރެ ކުރުން
- ރާއްޖޭގައި ތައްޔާރުކުރާ ދަޅު މަހާއި ކަނޑު މަހުގެ އުފެއްދުންތައް ކެެމްބޯޑިއާ އަށް އެކްސްޕޯޓު ކުރުން
އެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ދެ ގައުމެއްގެ ދެމެދުގައި އޮންނަ އެންމެ މުހިންމު ގުޅުމަކީ އެ ދެ ގައުމުގެ ރައްޔިތުންގެ މެދުގައި އޮންނަ ބަދަހި ގުޅުން ކަމަށެވެ.
ކެމްބޯޑިއާގެ ބޮޑުވަޒީރުގެ މި ދަތުރުގައި ހަ ދާއިރާއަކުން އެއްބަސްވުންތަކުގައި ސޮއިކޮށްފައިވާކަން ފާހަގަކުރައްވައި، ރައީސް ވިދާޅުވީ ގިނަ ކަންތައްތަކަކާ ވެސް މަޝްވަރާ ކުރެވުނު ކަމަށެވެ. ރާއްޖެއަކީ ބޭރުން އެތެރެކުރާ މުދަލަށް ބަރޯސާވާ ގައުމަކަށް ވާތީ ވިޔަފާރީ ގުޅުން އިތުރަށް ބަދަހި ކުރުމަށް މަޝްވަރާ ކުރެވުނު ކަން ރައީސް ފާހަގަކުރެއްވި އެވެ.
ރައީސް ވިދާޅުވީ މި އެއްބަސްވުންތަކުގެ ސަބަބުން ކާބޯތަކެތީގެ އަގު ހެޔޮވެ، އެ ތަކެތީގެ ރައްކާތެރިކަން އިތުރަށް ކަށަވަރު ކުރެވޭނެ ކަމަށެވެ.
ރާއްޖެއެކޭ އެއްގޮތަށް ކެމްބޯޑިއާއަކީ ވެސް ޓޫރިޒަމް ކުރިއަރަމުން އަންނަ ގައުމަކަށް ވާތީ، އެ ދާއިރާގެ ކަންކަން ތަޖުރިބާކޮށްލުމުގެ ފުރުސަތަށް އެ ގައުމުން އެދިފައިވާތީ އެ ފުރުސަތު ދިނުމަށް ނިންމާފައިވާ ކަމަށް ވެސް ރައީސް ވިދާޅުވި އެވެ.
"ކެމްބޯޑިއާ އަށް ރާއްޖޭގެ ޓޫރިޒަމް ދާއިރާގައި މަސައްކަތްކުރުމަށް އިންޓާންޝިޕްގެ 20 ފުރުސަތު ދޭން ވަނީ ނިންމަވާފައި. މީގެ އިތުރުން ކޯސްޓްގާޑުން ހިންގާ ބޭސިކް ޑައިވް ކޯހުގައި ބައިވެރިވުމުގެ ފުރުސަތު ކެމްބޯޑިއާގެ ސިފައިންނަށާއި، އެމްއެންޔޫއިން ދެ ސްކޮލަޝިޕް ފުރުސަތު ވެސް އެ ގައުމަށް ދޭން ވަނީ ނިންމާފައި،" ރައީސް ވިދާޅުވި އެވެެ.
ކެމްބޯޑިއާގެ ބޮޑުވަޒީރު ވިދާޅުވީ އެ ގައުމުން ރާއްޖެ އަށް ސްކޮލަޝިޕްގެ 10 ފުރުސަތު ދޭން ނިންމާފައިވާ ކަމަށެވެ.
ރައީސް ވިދާޅުވީ މިއަދު އެއްބަސްވި ކަންކަމާ ދޭތެރޭ މަޝްވަރާ ކުރުމަށް ދެ ގައުމުގެ އޮފިޝަލުން ވަރަށް އަވަހަށް ބައްދަލުވުންތައް ބާއްވަން ފަށާނެ ކަމަށެވެ.