05 ޖެނުއަރީ 2023 - 11:25
ރިޔާދު (ޖެނުއަރީ 5) - ސައުދީ އަރަބިއްޔާގެ ޕްރޮފެޝަނަލް ލީގުގެ އައް ނަސްރު އަށް ދާދި ފަހުން ބަދަލުވި ޕޯޗުގަލްގެ ތަރި ކްރިސްޓިއާނޯ ރޮނާލްޑޯގެ ކުޅުން ދެކިލަން ކެތްމަދު ވެފައި ތިބި އެ ކްލަބުގެ ސަޕޯޓަރުންނަށް އިތުރު އިންތިޒާރެއް ކުރަން ޖެހިއްޖެ އެވެ.
ނަސްރު އިން އަމިއްލަ ދަނޑުގައި މިރޭ އަލް ތާއީއާ ދެކޮޅަށް ކުޅެން އޮތް މެޗުގައި ރޮނާލްޑޯ ކުޅޭނެ ކަމަށް ސަޕޯޓަރުން އުއްމީދުކޮށްގެން ތިބި ނަމަވެސް ރޮނާލްޑޯ އަދި ހުރީ ސަސްޕެންޝަނެއްގަ އެވެ. އެއީ މިދިޔަ އޭޕްރީލް މަހު މެންޗެސްޓާ ޔުނައިޓެޑާ އެކު ކުޅުނު އިނގިރޭސި ޕްރިމިއާ ލީގު މެޗެއްގައި އެވަޓަންގެ ސަޕޯޓަރެއްގެ ފޯނު ބިމަށް ޖެހި މައްސަލައިގައި ލިބުނު ދެ މެޗުގެ ސަސްޕެންޝަނެކެވެ.
މީޑިއާތަކުން ރިޕޯޓް ކުރާ ގޮތުގައި، ރޮނާލްޑޯ ކުޅޭނެ ކަމަށް ބަލައި މިރޭގެ މެޗަށް ހުރިހާ ޓިކެޓެއް ވަނީ ވިކި ހުސްވެފަ އެވެ.
ރޮނާލްޑޯ އަށް ސަސްޕެންޝް އައީ ވޯލްޑް ކަޕް ގައި ޕޯޗުގަލްގެ ފުރަތަމަ މެޗު ފަށަން ކުޑަތަން ވެފައި ވަނިކޮށެވެ. އިނގިރޭސި އެފްއޭ އިން ވަނީ އެ މައްސަލައިގައި ރޮނާލްޑޯ ދެ މެޗަށް ސަސްޕެންޑް ކޮށް، 50،000 ޕައުންޑް (60،000 ޑޮލަރު) އިން ޖޫރިމަނާ ކޮށްފަ އެވެ.
ފީފާގެ ގަވާއިދުގައި ވާގޮތުން ރޮނާލްޑޯ ކޮންމެ ގައުމެއްގެ ކްލަބަކަށް ބަދަލުވި ނަމަވެސް ސަސްޕެންޝަން ފުރިހަމަ ކުރަން ޖެހޭނެ އެވެ.
މި ސަސްޕެންޝަންގެ ސަބަބުން، ނަސްރު އިން މިރޭ ކުޅޭ މެޗާއި، އަންނަ ހަފްތާ ވާދަވެރި އަލް ޝަބާބާ ކުޅޭ މެޗުގައި ވެސް ރޮނާލްޑޯ އަށް ނުކުޅެވޭނެ އެވެ.
ސައުދީ ލީގުގައި އައް ނަސްރު މިވަގުތު އޮތީ 11 މެޗުން 26 ޕޮއިންޓް ހޯދައިގެން ތާވަލްގެ އެއް ވަނައިގަ އެވެ. ދެ ވަނައިގައި އޮތީ އެއް މެޗު މަދުން ކުޅެގެން 25 ޕޮއިންޓް ހޯދާފައިވާ އަލް ޝަބާބެވެ.