16 ޖެނުއަރީ 2017 - 06:25
ޕާކިސްތާނުގެ ހެއާ ސްޓައިލިސްޓަކު އިސްތަށިގަނޑުގައި އަލިފާން ޖެހުމަށް ފަހު ސްޓައިލްކޮށްދޭތަން ފެންނަ ވީޑިއޯއެއް އެ ގައުމުގެ ނޫސްވެރިއެއް ކަމަށްވާ އުމަރު ގުރައިޝީ ސޯޝަލް މީޑިއާގައި އާއްމުކުރުމުން ގިނަ ބަޔަކަށް ހައިރާންކަން ލިބިއްޖެ އެވެ.
ބޯކޮށާ ބައެއް މީހުން އެމީހުންގެ އަމިއްލަ ސްޓައިލްތައް ގެންގުޅުނަސް ޕާކިސްތާނުގެ މި މީހާ އިސްތަށިގަނޑު ރީތިކުރަން ގެންގުޅެނީ ވަރަށް އާދަޔާޚިލާފު ގޮތެއްކަން މި ވީޑިއޯ އިން ފެނެ އެވެ.
ބޯކޮށަން އޭނާ ކައިރިއަށް ދާ މީހުންނަށް ބޯކޮށައިދެނީ އިސްތަށިގަނޑުގައި އަލިފާން ޖަހައިގެންނެވެ. އެމީހާ އެންމެ ފުރަތަމަ އިސްތަށިގަނޑު ފުނާ އަޅާލުމަށްފަހު ފުށް ކަހަލަ އެއްޗެއް ބޮލަށް އަޅާތަން ފެނެ އެވެ. އެއަށްފަހު ލޯޝަން ފާޑު އެއްޗެއް އުނގުޅަ އެވެ. ދެން ލައިޓަރު އަޅާފައި އިސްތަށީގަނޑުގައި ރޯކޮށްލަ އެވެ.
ދެން ފުނަލަކާއި ކަތުރެއް ބޭނުންކޮށްގެން އިސްތަށިގަނޑު ސްޓައިލްކުރުމުގެ މަސައްކަތް އެމީހާ ކުރާތަން ވީޑިއޯ އިން ފެނެ އެވެ. އޭރުވެސް އިސްތަށިގަނޑުގައި ހުންނަނީ ރޯވެފަ އެވެ. މި ވީޑިއޯ ގިނަ ބަޔަކު ބަލާފައި ވާއިރު އެއް ބަޔަކު ބުނެފައިވަނީ މިއީ މޮޔައަކު ނޫނީ ކުރާނެ ކަމެއް ނޫން ކަމަށެވެ. އަނެއްބަޔަކު މި މީހާގެ ހުނަރަށް ތައުރީފު ކޮށްފައިވެ އެވެ.