10 ޑިސެމްބަރ 2022 - 21:26
ވޯލްޑް ޗެމްޕިއަންޝިޕަށް ކޮލިފައިވުމަށް ކުޅޭ ކޮލިފައިން ބުރުގެ ފުރަތަމަ މަރުހަލާ ކަމަށްވާ، ދެކުނު އޭޝިއާ ކޮލިފައިންގައި މިއަދު ކުޅުނު މެޗުތައް ކާމިޔާބުކޮށް ރާއްޖޭގެ އެއްވަނަ ފިރިހެން ކުޅުންތެރިޔާ މޫސާ މުންސިފް އަހުމަދު އޭޝިއާ ޗެމްޕިއަންޝިޕަށް ކޮލިފައިވެއްޖެ އެވެ.
ދެކުނު އޭޝިއާ މުބާރާތުގެ ދެވަނަ ބުރުގައި މިއަދު ކުޅުނު ދެ މެޗުގައި ވެސް މުންސިފްއާ ދެކޮޅަށް ނުކުތީ ބަންގްލަދޭޝްގެ ދެ ކުޅުންތެރިންނެވެ. ފުރަތަމަ މެޗު މުންސިފް ކާމިޔާބު ކުރީ 3-1 ސެޓުންނެވެ. ދެވަނަ މެޗު ކާމިޔާބު ކުރީ ސީދާ ތިން ސެޓުންނެވެ.
އަންނަ މަހު ގަތަރުގައި ބާއްވާ އޭޝިއަން ޗެމްޕިއަންޝިޕަށް ކޮލިފައި ވަނީ އަންހެން އަދި ފިރިހެން ޑިވިޝަނުން ވެސް ގަދަ 16ގައި ހިމެނޭ ކުޅުންތެރިންނެވެ. ރާއްޖޭގެ އެއްވަނަ އަންހެން ކުޅުންތެރިޔާ ފާތިމަތު ދީމާ އަލީ، އިއްޔެ ވަނީ އޭނާ ހިމެނުނު ގުރޫޕްގެ އެއްވަނަ ހޯދައި އޭޝިއާގެ މުބާރާތަށް ކޮލިފައި ވެފަ އެވެ.
މުބާރާތުގައި އިއްޔެ ކުޅުނު ދެ މެޗުން ވެސް މުންސިފް ބަލިވީ އެވެ. މުބާރާތް ބާއްވާ ގައުމު ނޭޕާލްގެ ކުޅުންތެރިޔާ އާ ދެކޮޅަށް ވެސް މުންސިފް ވަނީ ރަނގަޅު ކުޅުމެއް ދައްކައިފަ އެވެ.
ކަތަމަންޑޫގައި ކުރިއަށްދާ ކޮލިފައިން މުބާރާތުގައި ދެކުނު އޭޝިއާގެ ހަތް ގައުމުގެ ޓިޓީ ކުޅުންތެރިން ވެސް ބައިވެރި ވެއެވެ ގަތަރުގައި އަންނަ މަހު ބާއްވާ އޭޝިއާގެ މުބާރާތުން އެންމެ ގަދަ 26 ކުޅުންތެރިން ކޮލިފައި ވާނީ އަންނަ މެއި މަހު ދެކުނު އެފްރިކާގައި ބާއްވާ ވޯލްޑް ޗެމްޕިއަންޝިޕަށެވެ.
ރާއްޖެ ތަމްސީލު ކުރަނީ ދީމާ އާއި މުންސިފް އެކަންޏެވެ. ދީމާގެ މެޗުތަކުގައި އޭނާގެ ކޯޗެއްގެ ގޮތުގައި ވެސް އިރުޝާދު ދެނީ މުންސިފެވެ. މި ދެ ކުޅުންތެރިންނަކީ މިއަހަރުގެ މޯލްޑިވްސް ސްޕޯޓްސް އެވޯޑްގައި އެންމެ މޮޅު ޓީޓީ ކުޅުންތެރިންގެ އެވޯޑް ހޯދި ދެ ކުޅުންތެރިންނެވެ.