12 ޖެނުއަރީ 2017 - 19:42
މޮރިޝަސް ކޮމާޝަލް ބޭންކް އޮފް މޯލްޑިވްސް (އެމްސީބީ) އިން ވޯކްސް ކޯޕަރޭޝަން ލިމިޓެޑަށް ދޫކުރި 1.2 މިލިއަން ރުފިޔާގެ ކްރެޑިޓް ފެސިލިޓީއަކަށް ފައިސާ ނުދެއްކުމުގެ ސަބަބުން އިތުރަށް ދައްކަންޖެހުނު ފައިސާއާ އެކު 1.8 މިލިއަން ރުފިޔާ އެމްސީބީ އަށް ދިނުމަށް ވޯކްސް ކޯޕަރޭޝަންގެ މައްޗަށް ސިވިލް ކޯޓުން އިއްޔެ ހުކުމް ކޮށްފި އެވެ.
މިގޮތަށް ހުކުމް ކުރެއްވީ ޖެނުއަރީ 28، 2011 ގައި އެމްސީބީން ދޫކުރި ކްރެޑިޓް ފެސިލިޓީ އަށް ވޯކްސް ކޯޕަރޭޝަނުން ފައިސާ ނުދައްކާތީ، މިހާތަނަށް ދައްކަންޖެހޭ ފައިސާ ހޯދުމަށާއި އެ ކްރެޑިޓް ފެސިލިޓީ އަށް މޯގޭޖްކުރި އުޅަނދެއް ވިއްކާލުމުގެ ހައްގު ހޯދުމަށް އެމްސީބީން ކުރި ދައުވާއެއްގަ އެވެ.
ހުކުމުގައި ބުނެފައިވާ ގޮތުން ކްރެޑިޓް ފެސިލިޓީ އަށް މި މަހުގެ 11 ވަނަ ދުވަހާ ހަޔަމަށް، 1،811،216.40ރ. ދައްކަން ޖެހެ އެވެ.
މި ފައިސާ ދެއްކުމަށް ވޯކްސް ކޯޕަރޭޝަންގެ މައްޗަށް ހުކުމް ކޮށްފައި ވަނީ ލޯނުގެ އެއްބަސްވުމާ ވޯކްސް ކޯޕަރޭޝަނުން ޚިލާފުވުމުގެ ސަބަބުން ބޭންކުން ކުރަންޖެހުނު ޚަރަދުތަކާއި އިތުރަށް އަރަމުންދާ އިންޓަރެސްޓާއި ޖޫރިމަނާ ފައިސާ، ހުކުމް ކުރާ ދުވަހުން ފެށިގެން ހަ މަސް ދުވަހުގެ ތެރޭގައި ދެއްކުމަށް ވޯކްސް ކޯޕަރޭޝަނުން އެއްބަސްވުމުންނެވެ. އަދި ލޯނަށް ރަހުނުކުރި އުޅަނދު ވިއްކާލަން ބޭނުންވާ ކަމަށް ވޯކްސް ކޯޕަރޭޝަނުން ބުނުމުން އެ ހުއްދަ އެމްސީބީން ވަނީ ދީފަ އެވެ.
"ދެ ފަރާތުގެ މެދުގައި މި މައްސަލާގައި އެއްބަސްވި ގޮތުގެމަތިން 11 ޖެނުވަރީ 2017 ވަނަ ދުވަހުގެ ނިޔަލަށް 1،811،216.40ރ. އާއި އިތުރަށް އަރަމުންދާ އިންޓްރެސްޓާއި ޖޫރިމަނާއާ އެކު މި އެންމެހާ ފައިސާ މިއަދުން ފެށިގެން މީލާދީ 6 މަސް ދުވަހުގެ ތެރޭގައި ދަ މޮރިޝަސް ކޮމާޝަލް ބޭންކް އޮފް މޯލްޑިވްސް ޕްރައިވެޓް ލިމިޓެޑަށް ދައްކާ ޚަލާސްކުރުމަށް ވޯކްސް ކޯޕަރޭޝަން ލިމިޓެޑަށް އަންގައި ހުކުމްކޮށްފީމެވެ." ގާޒީ ފަރުހާދު ރަޝީދުގެ ހުކުމުގައިވެ އެވެ.