04 ޑިސެމްބަރ 2022 - 16:14
ރ. ދުވާފަރު ކައުންސިލުން ހިންގާފައިވާ ބޮޑު ހިޔާނާތާ ގުޅިގެން ހުރިހާ ކައުންސިލަރުން ސަސްޕެންޑްކުރުމަށް ފަހު ކައުންސިލް ހިންގަން ހަވާލުކުރި ސެކްރެޓަރީ ޖެނެރަލް މުހައްމަދު ނާސިހް ވެސް ސަސްޕެންޑްކޮށްފި އެވެ.
ކައުންސިލަރުންގެ އެކައުންޓްތަކަށް މިލިއަނުން ދައުލަތުގެ ފައިސާ ޖަމާކުރި ކަމުގެ ތުހުމަތުގައި ސަސްޕެންޑްކުރީ އެލްޖީއޭ އިން ބެލި މައްސަލައާ ގުޅިގެންނެވެ. އެކަމަކު އެސްޖީ ސަސްޕެންޑްކުރީ ސިވިސް ސާވިސް ކޮމިޝަނުން ބަލާ މައްސަލައަކާ ގުޅިގެންނެވެ.
އެ ހިޔާނާތް އާންމުންނަށް ފަޅާއެރީ މިދިޔަ ޖުލައި މަހު ލޯކަލް ގަވަމެންޓް އޮތޯރިޓީ (އެލްޖީއޭ) އިން އާއްމުކުރި އިންޑެކްސް ރިޕޯޓަކުންނެވެ. އެސްޖީއަށް އަށް ވެސް ކުރަނީ ހިޔާނާތް ހިންގުމުގައި ބައިވެރިވެފައިވާ ކަމުގެ ތުހުމަތެވެ.
އެލްޖީއޭގެ ސީއީއޯ އަފްޝަން ލަތީފު "މިހާރު"އަށް ވިދާޅުވީ ދުވާފަރު ކައުންސިލްގެ އެސްޖީ ސަސްޕެންޑްކުރުމުން އެ ކައުންސިލް ހިންގުން އެހެން ބޭފުޅަކާ ހަވާލުކޮށްފައިވާ ކަމަށެވެ.
"ގާނޫނީ ގޮތުން ގަޑިން ގަޑިއަށް ކުރަން ހުރި ކައުންސިލްގެ މަސައްކަތްތައް އަތޮޅު ކައުންސިލާ ކޯޑިނޭޓް ކުރާނީ،" އަފްޝަން ވިދާޅުވި އެވެ.
އެލްޖީއޭގެ މޮނިޓަރިން ރިޕޯޓަކުން ފެންމަތިވެފައިވާ ގޮތުގައި ކޮވިޑު ފެތުރެމުން ދިޔަ ދުވަސްވަރު ދުވާފަރު ކައުންސިލުގެ މެމްބަރުން ގެންދެވީ އަމިއްލަ އެކައުންޓަށް މިލިއަނުން ފައިސާ ޖަމާކުރަމުންނެވެ.
ތިޖޫރިން ނަގުދު ފައިސާ ނަގައި އެކި ކަންކަމުގައި ބޭނުންކޮށް، އެއްވެސް ހިސާބެއް ނުބަލަހައްޓަ އެވެ. މުދާ ގަތުމާއި ކައުންސިލަށް ލިބޭ ބަޖެޓު ބޭނުން ކުރުމުގައި މާލިއްޔަތު ގާނޫނާއި ގަވައިދުތަކަށް އެއްވެސް ވަރަކަށް ބަލައިފައެއް ނެތެވެ. މުސާރަ ދިނުމާއި މުވައްޒަފުންގެ ކަންކަން ބަލަހައްޓަމުން ގެންދެވީ ސިވިލް ސާވިސް ކޮމިޝަންގެ ގާނޫނަކަށް ވެސް ބެލުމެއް ނެތި އެވެ.
އެލްޖީއޭ އިން އެކުލަވައިލި ހާއްސަ ރިޕޯޓަކުން ހާމަވި ގޮތުގައި ދުވާފަރު ކައުންސިލާއި ޑަބްލިއުޑީސީން ވަނީ މާލިއްޔަތު ގަވައިދާއި ސިވިލް ސާވިސް ގަވައިދު އަދި މާލީ ކަންކަމާ ގުޅުން ހުރި އެހެނިހެން ގާނޫނުތަކާ ހިލާފަށް އަމަލު ކޮށްފަ އެވެ.
އޭގެ ތެރޭގައި މާލީ ކަންކަމާ ގުޅޭ ލިޔެކިޔުންތައް ނުބެލެހެއްޓުމާއި މެމްބަރުންގެ އަމިއްލަ އެކައުންޓަށް ގިނަ އަދަދެއްގެ ފައިސާ ޖަމާކުރުމާއި އެއްވެސް ހުއްދައެއް އަދި ލިޔެކިޔުމެއް ނެތި ކައުންސިލަރުންނާއި ޑަބްލިއުޑީސީގެ މެމްބަރުންނާއި ބައެއް މުވައްޒަފުންނަށް ވެސް ވަނީ ނަގުދު ފައިސާ ފައިސާ ބެހުން ހިމެނެ އެވެ.