24 ނޮވެމްބަރ 2022 - 23:38
ދޯހާ (ނޮވެމްބަރު 24) - ފީފާ ވޯލްޑް ކަޕުގެ ތާރީހުގައި ފަސް މުބާރާތެއްގައި ލަނޑު ޖެހި ފުރަތަމަ ފިރިހެން ފުޓުބޯޅަ ކުޅުންތެރިޔާގެ ޝަރަފް ކްރިސްޓިއާނޯ ރޮނާލްޑޯ ހޯދި މެޗުން މިރޭ ގާނާ އަތުން 3-2 އިން ޕޯޗުގަލް މޮޅުވެއްޖެ އެވެ.
މުޅި މެޗު ޕޯޗުގަލް އިން ކޮންޓްރޯލްކޮށްގެން ކުޅުނު ނަމަވެސް އެ ޓީމަށް ލަނޑެއް ޖެހޭ ގޮތްވީ ދެ ވަނަ ހާފުގަ އެވެ. ގާނާ އިން އެއްވަރުކުރި ނަމަވެސް ޕޯޗުގަލް އިން ތަފާތު ބޮޑުކުރި އެވެ. އެކަމަކު ގާނާ އިން އިތުރު ގޯލެއް ޖަހައި ޕޯޗުގަލް ހާސްކޮށްލި އެވެ.
މެންޗެސްޓާ ޔުނައިޓެޑުގެ ކޮންޓްރެކްޓް ބާތިލްކުރުމުން މިވަގުތު ކްލަބެއް ނެތި ހުރި ރޮނާލްޑޯ މީގެ ކުރިން ލަނޑު ޖެހީ 2006، 2010، 2014 އަދި 2018 ގެ ވޯލްޑް ކަޕުގަ އެވެ.
ދޯހާގައި މިރޭ ކުޅުނު މެޗުގެ ފުރަތަމަ ހާފުގައި ޕޯޗުގަލް އިން ގިނަ ވަގުތު ކުޅުނު ނަމަވެސް ގޯލު ޖަހަން މާ ގިނަ ފުރުސަތުތަކެއް ނުހޯދުނެވެ. ލިބުނު އެންމެ ހުސް ފުރުސަތުގައި ރޮނާލްޑޯ އަށް ބޯޅަ ލިބުމުގެ ކުރިން ގާނާގެ ކީޕަރު ލޯރެންސް އަޓީ ޒިގީ އެ ބޯޅަ ދިފާއު ކުރި އެވެ.
ޕޯޗުގަލް ލީޑު ނެގި ލަނޑު ރޮނާލްޑޯ ޖެހީ 65 ވަނަ މިނިޓުގައި ލިބުނު ޕެނަލްޓީއަކުންނެވެ. މިއީ ގާނާގެ ޑިފެންޑަރު މުހައްމަދު ސަލިސޫ، ބޯޅަ ހޯދަން އުޅުމުގެ ތެރޭގައި ރޮނާލްޑޯ އަށް ފައުލް ކުރުމުން ރެފްރީ ދިން ޕެނަލްޓީއެކެވެ. ސަލިސޫގެ ޓެކްލް އަމާޒުވީ ބޯޅައަށް ކަމަށް ބުނެ އެއް ބަޔަކު ވަނީ ރެފްރީ ވީއޭއާރްގެ އެހީ ނުހޯދުމުން ފާޑުކިޔައިފަ އެވެ.
ރޮނާލްޑޯގެ ގޯލުން ލީޑު ނަގައިފައި ވަނިކޮށް ގާނާ އިން ނަތީޖާ އެއްވަރުކުރީ އެ ޓީމުގެ މުހައްމަދު ކުޑޫސް 73 ވަނަ މިނިޓުގައި ހުރަސްކޮށްލި ބޯޅައަކުން ކެޕްޓަން އަންޑްރޭ އަޔޫ ޖަހައިދިން ގޯލުންނެވެ. ނަމަވެސް އޭގެ ހަތަރު މިނިޓު ފަހުން އަންޑްރޭ އަޔޫ ގެ ބަދަލުގައި އޭނާގެ ކޮއްކޮ ޖޯޑަން އަޔޫ ކުޅެން އެރުވިތާ މިނިޓެއް ނުވެ، ޕޯޗުގަލް އިން އަލުން ލީޑު ހޯދި އެވެ.
ދެ ވަނަ ފަހަރަށް ޕޯޗުގަލް އިން ލީޑު ނެގި ލަނޑު 78 ވަނަ މިނިޓުގައި ޖަހައިދިނީ ޔާއޯ ފީލިކްސް އެވެ. އޭނާ މި ލަނޑު ޖެހީ ބްރޫނޯ ފެނާންޑޭޒް ދިން ތުރޫ ޕާހެއް ހޯދައި އޭރިއާ ތެރެއަށް ވަދެ ގޯލްކީޕަރު ބޯ މަތިން ފޮނުވާލައިގެންނެވެ. އަދި އޭގެ ދެ މިނިޓު ފަހުން އެޓީމުގެ ތިން ވަނަ ލަނޑު ޖަހައިދިނީ ބަދަލު ކުޅުންތެރިއެއް ގޮތުގައި އެރި ޒުވާޏް ފޯވާޑް ރަފައެލް ލެއާއޯ އެވެ. މި ލަނޑު ޖަހަން ވެސް އެހީތެރިވީ ފެނާންޑޭޒް އެވެ.
މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައި ވަނިކޮށް ރޮނާލްޑޯގެ ބަދަލުގައި ޒުވާން ފޯވާޑް ގޮންކާލޯޯ ރާމޯސް އެރުވި އެވެ. ރޮނާލްޑޯ ބޭލުމާ އެކު މިނިޓެއް ނުވެ ގާނާގެ އޮސްމާން ބުކާރީ އެ ޓީމަށް ލަނޑެއް ޖަހައި ފަރަގު ކުޑަކޮށްދިނެވެ. ނަމަވެސް އިތުރު ވަގުތުގެ ގޮތުގައި ދެއްކި ނުވަ މިނިޓުގައި ވެސް އެ ޓީމަށް އެއްވަރު ކުރެވޭ ގޮތެއް ނުވި އެވެ.
ގުރޫޕް އެޗް ގައި މިރޭ އުރުގުއޭ އާއި ދެކުނު ކޮރެއާ ބައްދަލުކުރި މެޗު ނިމުނީ ލަނޑެއް ނުޖެހި އެއްވަރު ވެގެންނެވެ. ގުރޫޕް ސްޓޭޖުގެ ދެވަނަ މެޗުގައި ޕޯޗުގަލް ބައްދަލު ކުރާނީ އުރުގުއޭއާ އެވެ.