22 ނޮވެމްބަރ 2022 - 17:23
ލުސެއިލް (ނޮވެމްބަރު 22) - ގަތަރު ވޯލްޑްކަޕްގެ ފައިނަލް ކުޅޭ ލުސެއިލް ސްޓޭޑިއަމްގައި މި އަހަރުގެ މުބާރާތުގައި ކުޅުނު ކުޅުނު ފުރަތަމަ މެޗުގައި ސައުދީ އަރަބިއްޔާ އިން ފަހަތުން އަރައި 2-1 އިން ވަރުގަދަ އާޖެންޓީނާ ބަލިކޮށްފި އެވެ.
ވީޑިއޯ އެސިސްޓެންޓް ރެފްރީ (ވީއޭއާރު) ގެ އެހީގައި ލިބުނު ޕެނަލްޓީއަކުން އާޖެންޓީނާ އިން ލީޑު ނެގީ މެޗުގެ 10 ވަނަ މިނިޓުގަ އެވެ. މި ޕެނަލްޓީ އެޓީމަށް ކާމިޔާބު ކޮށްދިނީ ކެޕްޓަން ލިއޮނެލް މެސީ އެވެ.
މި ލަނޑާ އެކު މެސީ ވަނީ އާޖެންޓީނާ އަށް ހަތަރު ވޯލްޑް ކަޕެއް ގައި ގޯލު ޖެހި ފުރަތަމަ ކުޅުންތެރިޔާއަށް ވެފަ އެވެ. އޭނާ ވަނީ 2006، 2014 އަދި 2018 ގެ ވޯލްޑް ކަޕް ގައި ގޯލު ޖަހައިފަ އެވެ. ގޯލެއް ނުޖެހުނީ 2010 ގައި ދެކުނު އެފްރިކާގައި ބޭއްވި މުބާރާތުގަ އެވެ.
ފުރަތަމަ ހާފު ޑޮމިނޭޓް ކޮށްގެން ކުޅުނު އާޖެންޓީނާ މި ހާފުގައި އިތުރު ތިން ލަނޑު ޖެހި އެވެ. ލައުޓާރޯ މާޓިނޭޒްގެ ދެ ލަނޑާއި މެސީ ޖެހި ލަނޑެއް ބަލައި ނުގަތީ އޮފްސައިޑް ވެގެންނެވެ. މި ހާފުގައި އާޖެންޓީނާގެ ކުޅުންތެރިން ވަނީ ހަތް ފަހަރު އޮފްސައިޑް ވެފަ އެވެ.
ފުރަތަމަ ހާފުގައި ސައުދީ އަރަބިއްޔާ އަށް އާޖެންޓީނާގެ ގޯލަށް ހަމަލާއެއް ފޮނުވާ ނުލެވުނު ނަމަވެސް، ދެވަނަ ހާފުގައި، 48 ވަނަ މިނިޓުގައި އެޓީމުގެ ފުރަތަމަ ހަމަލާއިން ސާލިހް އަލް ޝެހްރީ ވަނީ ސައުދީ އަށް އެއްވަރު ކޮށްދީފަ އެވެ. އޭގެ ފަސް މިނިޓު ފަހުން ސާލިމް އަލް ދައުސާރީ ސައުދީ އަށް ލީޑު ހޯދައިދިނީ އާޖެންޓީނާގެ ތިން ކުޅުންތެރިން ކައިރިން ނައްޓާލައިފަ އެވެ.
ފޭވަރިޓުންގެ ގޮތުގައި މުބާރާތަށް އައި އާޖެންޓީނާ އިން މުބާރާތަށް އައީ ކޯޗު ލިއޮނެލް ސްކަލޯނީ އާއެކު 36 މެޗުން ބަލި ނުވުމުގެ ރެކޯޑަކާ އެކު އެވެ. ނަމަވެސް ސައުދީ އިން ވޯލްޑް ކަޕާ ކުރިމަތިލަނީ މި މުބާރާތަކީ އަބަދުވެސް ސަޕްރައިޒިން ނަތީޖާތަކެއް ފެންނާނެ މުބާރާތެއްކަން ދެކިގެން ކަމަށް އެޓީމުގެ ކޯޗު ހާވޭ ރެނާޑް، މެޗަށް ނުކުތުމުގެ ކުރިން ވަނީ ބުނެފަ އެވެ.