20 ނޮވެމްބަރ 2022 - 23:25
އަލް ކޯރު ސިޓީ، ގަތަރު (ނޮވެމްބަރު 20) - ފީފާ ވޯލްޑް ކަޕް ހުޅުވަން ކުޅުނު މެޗުގައި އިކުއެޑޯއާ ވާދަކޮށް 2-0 އިން މުބާރާތް ބާއްވާ ގައުމު، ގަތަރު ބަލިވެ ހުތުރު ރެކޯޑަކާ ކުރިމަތިލާން ޖެހިއްޖެ އެވެ.
މިއީ ވޯލްޑް ކަޕް ގެ 92 އަހަރުވީ ދިގު ތާރީހުގައި، މުބާރާތް ބާއްވާ ގައުމެއް ކުޅުނު ފުރަތަމަ މެޗުން ބަލިވި ހަމައެކަނި ފަހަރެވެ. މީގެ ކުރިން އެންމެ ފުރަތަމަ ފަހަރަށް އޭޝިއާގައި ބޭއްވި މުބާރާތުގައި ޖަޕާނާއި ދެކުނު ކޮރެއާ ވެސް ވަނީ ފުރަތަމަ މެޗު ކާމިޔާބުކޮށްފައި ދެވަނަ ބުރަށް ދަތުރު ކޮށްފަ އެވެ.
ގަތަރާ ދެކޮޅަށް އެކުއެޑޯ އިން ވަނީ މެޗުގެ ތިން މިނިޓު ހަމަ ނުވަނީސް ލަނޑު ޖަހައިފަ އެވެ. ނަމަވެސް ކެޕްޓަން އެނާ ވެލެންސިއާ ބޮލުން ޖެހި ގޯލު ބަލައި ނުގަންނަންނަ ނިންމީ އޮފްސައިޑް ވުމުންނެވެ.
މެޗަށް އިންސާފު ކުރި އިޓަލީގެ ރެފްރީ ޑެނިއޭލޭ އޯސާޓޯ އެ ގޯލު ބަލައި ނުގަންނަން ނިންމީ، ތިން މިނިޓުގެ ވީޑިއޯ އެސިސްޓެންޓް ރެފްރީ (ވީއޭއާރު) ރިވިއު އަކަށް ފަހު އެވެ.
ފުރަތަމަ ގޯލު ބަލައި ނުގަތް ނަމަވެސް، ވެލެންސިއާ ވަނީ މާ ގިނައިރެއް ނުވެ ލަނޑެއް ޖަހައި އެޓީމަށް ލީޑު ހޯދައިދީފަ އެވެ. ވެލެންސިއާ އަށް ގަތަރުގެ ގޯލްކީޕަރު ސާދު އަލް ޝީބް ކުރި ފައުލަކާ ގުޅިގެން ލިބުނު ޕެނަލްޓީއަކުން 15 ވަނަ މިނިޓުގައި ލީޑު ނަގައިދިނުމަށް ފަހު، ލީޑު ފުޅާ ކޮށްދިނީ 31 ވަނަ މިނިޓުގައި އޭނާ ބޮލުން ޖެހި ގޯލަކުންނެވެ.
އުމުރުން 33 އަހަރުގެ ވެލެންސިއާ އަކީ އެކުއެޑޯގެ ގައުމީ ޓީމަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާ އެވެ. މި މެޗުގައި ޖެހި ދެ ގޯލާއެކު އޭނާގައުމީ ޓީމަށް ޖެހި ލަނޑުގެ އަދަދު ވަނީ 37 އަށް އަރައިފަ އެވެ.
ގަތަރަށް މި ހާފުގައި އެންމެ ހުސް ފުރުސަތެއް ލިބުނީ ފުރަތަމަ ހާފުގެ އެންމެ ފަހު ސިކުންތުކޮޅުގަ އެވެ. ކެޕްޓަން ހަސަން އަލް ހައިދޯސް ނެގި ހުރަހެއް މުޅިން ހުސްކޮށް ހުރެ ފޮނުވާލަން އެގައުމުގެ ގައުމީ ޓީމަށް އެންމެ ގިނަ ލަނޑު ޖަހައިދީފައިވާ އަލްމޮއީޒް އަލީ އަށް ލިބުނެވެ. ނަމަވެސް އޭނާ ބޮލުން ފޮނުވާލި ބޯޅަ ގޯލާ އަމާޒެއް ނުވި އެވެ.
ދެވަނަ ހާފުގައި ގަތަރު ފެނުނީ، ފުރަތަމަ ހާފަށް ވުރެ އިތުބާރާ އެކު ކުޅެމުން ގެންދިޔަ ތަނެވެ. އިކުއެޑޯ އަށް އިތުރު ގޯލެއް ނުދީ ހިފަހައްޓާލި ނަމަވެސް، ބާސެލޯނާގެ އެކަޑަމީ އިން ކޯޗިން ފެށި ފީލިކްސް ސަންޗޭޒްގެ ޓީމަށް ނަތީޖާ ބަދަލު ކޮށްލެވޭ ގޮތެއް ނުވި އެވެ.
ބަދަލު ކުޅުންތެރިއެއްގެ ގޮތުގައި ކުޅެން އެރި ގަތަރުގެ ފޯވާޑް މުހައްމަދު މުންތާރީ މެޗުގެ ފަހު ކޮޅު ނުރައްކާތެރި ހަމަލާއެއް ފޮނުވާލި އެވެ. އެހެން ނަމަވެސް އޭނާ ފޮނުވާލި ބާރު ހަމަލާ ދިޔައީ ގޯލުގެ ކުޑަ ތަންކޮޅެއް މަތިން ބޭރަށެވެ.
ގަތަރުން މުބާރާތަށް ކުރިމަތިލީ އެންމެ ފަހުގެ އޭޝިއާ ބައްރުގެ ޗެމްޕިއަނުންގެ ގޮތުގަ އެވެ. މީގެ ކުރިން ބޯލްޑް ކަޕް ގައި ނުކުޅުނު ނަމަވެސް، މިއަހަރުގެ މުބާރާތަށް އެޓީމުން ގިނަ ތައްޔާރީތަކެއް ވި އެވެ. އެހެން ނަމަވެސް ބައްރުތަކުގެ ކުޅުންތެރިންނާ ދެކޮޅަށް ގަތަރުގެ ތަޖުރިބާ މަދު ކަން ވަރަށް ބޮޑަށް މެޗުގައި ދެއްކި އެވެ. ގަތަރު ގައުމީ ޓީމުގައި ހިމެނެނީ މުޅިން ވެސް އެ ގައުމުގެ ލީގުގައި ކުޅޭ ކުޅުންތެރިންނެވެ. އެއާ ހިލާފަށް އިކުއެޑޯ ޓީމުގައި ޔޫރަޕުގެ އެންމެ މަތީ ލީގުތަކުގެ ތަޖުރިބާ ހުރި ކުޅުންތެރިން ހިމެނެ އެވެ.
ގަތަރާއި އިކުއެޑޯ ހިމެނޭ ގުރޫޕް އޭ ގައި ހިމެނޭ ނެދަލެންޑްސް އާއި ސެނެގާލް ބައްދަލުކުރާ މެޗް ކުޅޭނީ މާދަމާ ރޭ 9 ޖަހާއިރެވެ. އޭގެ ކުރިން އިރުއޮއްސި 6 ޖަހާއިރު ގުރޫޕް ބީގެ މެޗެއް ކުޅޭނެ އެވެ. ބަދަލުކުރާނީ އިންގްލެންޑާއި އިރާނެވެ.