16 ނޮވެމްބަރ 2022 - 09:44
މިދިޔަ އަހަރުގެ ޖޫން މަހެވެ. ފުލުހުން މީޑިއާ ދީފައިވާ މައުލޫމާތަށް ބަލާއިރު ރާއްޖޭގައި މަކަރާއި ހީލަތުން މީހުންގެ އަތުން ފައިސާ އަތުލާ މައްސަލަތަކުގައި އެކެއްގެ ނަމުގައި 800 ނަންބަރު އޮތެވެ. ފުލުހުންނަށް ހުށަހަޅާފައިވާ މިފަދަ މައްސަލަތަކަށް ބަލާއިރު، 90 ޕަސެންޓް ސްކޭމް ކޯލްތައް އައިސްފައި ވަނީ ހަމައެކަނި ޖަލުންނެވެ.
ހުރިހާ ސްކޭމް ކޯލެއް ކުރަނީ ފޯނުގެ ޒަރިއްޔާ އިން ކަމަށްވާއިރު އެ ކޯލުތައް ޖޭމް ނުކުރެވެނީ ކީއްވެތޯ އޭގެ ދޮޅު އަހަރު ފަހުން ސުވާލު ކުރުމުން ވެސް ކަމާބެހޭ އިދާރާތަކުން ދައްކާ ވާހަކައަކީ މާފުށީގެ މައްސަލަ އެވެ.
ދާދި ފަހުން މީޑިއާ އަކުން ރިޕޯޓްކޮށްފައިވާ ގޮތުގައި ޓޫރިޒަމްގެ މަގްބޫލު ޑެސްޓިނޭޝަނެއްގައި ޖަލެއް ހުރުމުން އެ ޖަލު ޖޭމް ކުރާ ހިސާބުން މުޅި ސަރަހައްދުގެ ފޯނުތަކާއި ރޭންޖުތަކަށް ބުރޫ އަރާ ކަމަށާއި ޖަލު ހުރި ތަނުގެ ސަބަބުން އެތައް ބަޔަކަށް އޭގެ ސަބަބުން ގެއްލުންވާތީ ޖޭމް ނުކުރެވޭ ކަމަށް ޖަލު ބަލަހައްޓާ ފަރާތުން ވިދާޅުވެފައިވާ ކަމަށް ބުނެފައި ވެ އެވެ. މި ވާހަކަ އަށް ބަލާލާއިރު 2014 ވަނަ އަހަރުން ފެށިގެން ޖަލުގައި ޖޭމަރު ހަރުކުރުމަށް މަސައްކަތްކުރަމުން އަންނަކަން އެކަމާ ގުޅޭ ގޮތުން ރަސްމީ އިދާރާތަކުން މީޑިއާގައި ދައްކާފައި ހުރި ވާހަކަތަކުން ފާހަގަކުރެވެއެވެ. އެކަމަކު އެކި ސަބަބުތަކާ ހުރެ އަދިއަދަށް ދާން ވެސް މިކަން އޮތީ ނުކުރެވިފަ އެވެ.
ދެން އޮތީ ސިމްގެ ވާހަކަ އެވެ. އޮޅުވާލައިގެން ފައިސާ ހޯދަން ގުޅާ މީހުންގެ މައްސަލަ ތަހުގީގު ކުރުމުގައި ވެސް ދިމާވާ އެންމެ ބޮޑު އެއް ގޮންޖެހުމަކީ ސިމްތަކުގެ ރަޖިސްޓްރޭޝަންގެ މައްސަލަތަކާއި ލިމިޓެއް ނެތި ސިމް ވިއްކުން ކަމަށް ފުލުހުން ވަނީ ބުނެފަ އެވެ. މިކަމަށް ހައްލެއް ހޯދައިދިނުމުގެ ގޮތުން އެކްޓިވޭޓް ކޮށްފައި ހުންނަ ސިމްތައް ދޫކުރުން ޑިސެމްބަރު 1 އިން ފެށިގެން ހުއްޓާލަން ނިންމާފައިވާ ކަމަށް ދާދިފަހުން ކޭމް އިން ވަނީ ބުނެފަ އެވެ. އުއްމީދަކީ މި ބަދަލާ އެކު ސްކޭމް މައްސަލަތައް ތަހުގީގުކުރުމަށް ޕޮލިހުންނަށް ފަސޭހަވުމެވެ.
އެހެންނަމަވެސް އަދިވެސް ޖަލުގައި ފޯނު ބޭނުންކުރެވޭނެ މަގު ފަހިވެފައި އޮތުމުން އެކަން ކުރާ ވަކި މީހަކު އަތުލައިގަންނަން ބޮޑެތި ގޮންޖެހުންތައް އަދިވެސް އެބަހުއްޓެވެ. އެއް ގޮޅިއެއްގައި 20-30 މީހުން ތިބޭއިރު އޭގެ ތެރެއިން ސްކޭމް ކޯލް ކުރީ ސީދާ ކާކު ކަމެއް ހޯދައިގަތުމަކީ އުނދަގޫ ކަމެކެވެ. ވަކި މީހަކަށް ތުހުމަތު ކުރިޔަސް ޝަރުއީ މަރުހަލާގައި އެކަން ސާބިތު ކުރެވޭނެ ގޮތެއް ވެސް ނެތެވެ. ޖަލަށް ފޯނު ވެއްދުމަކީ "ފައިދާވާ" ބޮޑު ވިޔަފާރިއަކަށްވެ، ޖަލަށް ފޯނު ވައްދާ އަގުތައް ވެސް މިވަނީ 10،000ރ. އިން މަތީގަ އެވެ. ބައެއް ފަހަރު 20،000ރ. ހޭދަކޮށްފައިވާ ކަމަށް މީޑިއާތަކަށް މައުލޫމާތު ދީފައިވެ އެވެ.
ގޮންޖެހުން ހުރި ނަމަވެސް ޖަލަށް ފޯނުވެއްދުމާއި ޖަލުގައި ޖޭމަރު ހަރުކުރުމަކީ ސްކޭމް ކޯލް ހުއްޓުވަން ނުވަތަ ވަރަށް ބޮޑުތަނުން މަދުކުރަން އޮތް އެންމެ ބޮޑު ހައްލެވެ. ކަރެކްޝަނަލް އަށް "ގޮންޖެހުން" ހުރި ނަމަވެސް ތަޖުރިބާކާރުން ވިދާޅުވާ ގޮތުގައި ރާއްޖޭގައި ހުރި ޖޭމަރުތަކުން ބޭނުންވާ ރޭންޖުތަކަށް ސެޓް ކުރެވެއެވެ. މާނައަކީ ބޭނުންވާ ރޭޑިއަސްއެއްގައި އެއްވެސް ޑިވައިސްއެއް ބޭނުން ނުކުރެވޭ ގޮތަށް ބްލޮކް ކުރެވޭނެ ގާބިލްކަން ހުރުމެވެ. އަދި އޭގެ އިތުރުން ވެސް ޓެކްނޮލޮޖީގެ އެޑްވާންސް އެތައް ޓޫލެއް ކަމާބެހޭ ފަރާތްތަކަށް ހޯދެން ވެސް އެބަހުއްޓެވެ.
ސްކޭމް ކޯލްތަކަކީ މިހާރު އާންމު ދިރިއުޅުމާއި ގުޅިލާމެހިފައިވާ ކަމެކެވެ. މިކަމަށް ހޭލުންތެރިކުރުމުގެ ގޮތުން ފުލުހުންނާއި ބީއެމްއެލް އިން ހޭލުންތެރިކުރުވުމުގެ އެކި ޕްރޮގްރާމްތައް ހިންގަ އެވެ. އެފަދަ ކަންކަމާ ގުޅުންހުރި މައުލޫމާތުތައް ފޯރުކޮށްދެއެވެ. އެހެން ނަމަވެސް މިހާރު ވެސް ހުށަހެޅޭ މައްސަލަތަކަށް ބަލާއިރު އަދިވެސް އެކަށީގެންވާ މިންވަރަށް އާންމުން ހޭލުންތެރިވެފައެއް ނެތެވެ. އެހެންކަމުން ސްކޭމް ކޯލްތައް ހިންގަމުންދާ ދޮރުތައް ބަންދުކުރަން ޖެހެ އެވެ.