12 ނޮވެމްބަރ 2022 - 18:52
މާލޭގައި ގިނަ ބައެއްގެ މެދުގައި މަގުބޫލު "ލުއިބުއިން" ގެ އާ ކެފޭއެއް ހުޅުމާލޭގައި އިއްޔެ ހުޅުވައިފި އެވެ.
"ލުއިބުއިން މިންޓް" ގެ ނަމުގައި އެ ކެފޭ ހުޅުވީ ހުޅުމާލޭގެ އައުޓްޑޯ ސްޕޯޓްސް ކޮމްޕްލެކްސްގެ ބޭރުގަ އެވެ.
"ލުއިބުއިން" ގެ މެނޭޖިން ޑިރެކްޓަރު މުހައްމަދު މުޝްއިލް ވިދާޅުވީ، އައުޓްލެޓެއް ހުޅުމާލޭގެ އެ ސަރަހައްދުގައި ހުޅުވުމުން، ކަސްރަތުކޮށް، ދުވާ މީހުންނަށް ހާއްސަ ކޮށްގެން، ސިއްހަތަށް ފައިދާ ހުރި ބުއިންތަކާއި ލުއި ކާނާ ފޯރުކޮށްދެވޭނެ ކަމަށެވެ. އާ ކެފޭގެ ޑިޒައިން ކޮށްފައި ވަނީ، ކަސްޓަމަރުންނަށް އަވަހަށް ހިދުމަތް ދެވޭ ގޮތަށް ކަމަށް ވާތީ، އޯޑަރަށް މަޑުކުރަން ޖެހޭ ވަގުތު މަދުވާނެ ކަމަށް ވެސް އޭނާ ވިދާޅުވި އެވެ.
"އަޅުގަނޑުމެން ލުއިބުއިން ފެށީއްސުރެ އަބަދުވެސް ވިސްނަން، ސިއްހަތަށް ފައިދާ ހުރި އުފެއްދުންތައް ފޯރުކޮށްދިނުމަށް، އަބަދުވެސް މިސްރާބު ހުރީ އެދިމާލަށް،" މުޝްއިލް ވިދާޅުވި އެވެ.
އޭނާ ވިދާޅުވިގޮތުގައި، އަލަށް ހުޅުވި ކެފޭއިން އިތުރަށް ފެނާއި ހަކުރު ނާޅާ ހުންނަ ފްރެޝް ޖޫހާއި ސިއްހަތަށް ފައިދާ ހުރި ސޭންޑްވިޗް ފަދަ ތަކެތި ލިބޭނެ އެވެ. ސިއްހަތަށް ފައިދާ ހުރި އެހެނިހެން ލުއިކާނާ ވެސް ކުރިމަގުގައި ތައާރަފު ކުރާނެ ކަމަށް ވިދާޅުވި އެވެ.
ހުޅުމާލޭގައި ހުޅުވި އައުޓްލެޓްގެ އިތުރުން "ލުއިބުއިން" ގެ ދެ ތަނެއް މާލޭގައި ހުރެ އެވެ. އެއީ އާޓިފިޝަލް ބީޗުގައި 2013 ވަނަ އަހަރު ހުޅުވި ފުރަތަމަ ތަނާއި އައިޖީއެމްއެޗުގެ "ލުއިބުއިން ލައިޓް" އެވެ. މީގެ ފަސް އަހަރު ކުރިން ވެސް "ލުއިބުއިން" ގެ ތަނެއް ހުޅުމާލޭގައި ހުޅުވި އެވެ. އެކަމަކު، ފަހުން އެ ތަން ބަންދު ކުރުމަށް ފަހު، އެހެން ސަރަހައްދެއްގައި އާ ކެފޭއެއް ހުޅުވީ އެވެ.
