11 ޖެނުއަރީ 2017 - 08:58
އާ ސީޒަނަށް ނިއު ރޭޑިއަންޓް ވަރުގަދަކުރުމުގެ ގޮތުން އެ ކްލަބުން ފިލިޕީންސް ލީގުގެ ލަނޑު ލިސްޓުގެ ކުރި ހޯދާފައިވާ ސްޕެއިން ފޯވާޑެއް ކަމަށްވާ އެޑްރިއަން ގަލާޑޯ ވަލްޑެސް އަދި ޖަޕާނުގެ މިޑްފީލްޑަރެއް ކަމަށްވާ ކެއިސޫކޭ އޮގާވާ ގެންނަން ނިންމައިފި އެވެ.
ދެ ކުޅުންތެރިން ވެސް މިއަދު މެންދުރު ރާއްޖެ އައިސް ޓީމާ ގުޅޭނެ އެވެ. ނިއުގެ އެގްޒެޓިވް ކޮމިޓީ މެމްބަރު އައްބާސް ޝަރީފް ވިދާޅުވީ ދެ ކުޅުންތެރިންނާ އެކު ވެސް އެއްބަސްވުމަކަށް އައިސްފައިވާ ކަމަށާއި އެކަމަކު ކޮންޓްރެކްޓުގައި ސޮއިކުރާނީ މާލޭގައި ހަދާ ފިޒިކަލް އަދި މެޑިކަލް ޓެސްޓުން ފާސްވުމުން ކަމަށެވެ.
"މި ކުޅުންތެރިން އަޅުގަނޑުމެން މި ގެންނަނީ ވަރަށް ބޮޑަށް ބަލައި ފެންވަރު ހުރިކަން ސާބިތުވުމުން. އެ ކުޅުންތެރިންގެ ހުނަރުވެރިކަމާ މެދު އެއްވެސް ސުވާލެއް ނެތް. އެކަމަކު އަޅުގަނޑުމެން ކޮންޓްރެކްޓުގައި ސޮއިކުރާނީ ފިޒިކަލް ޓެސްޓުންނާއި މެޑިކަލް ޓެސްޓުން ފާސްވުމުން،" ހައި ކޯޓުގެ ކުރީގެ ފަނޑިޔާރު އައްބާސް ވިދާޅުވި އެވެ.
ނިއު އަށް ގެންނަ ބިދޭސީ ކުޅުންތެރިންގެ ފިޒިކަލް ޓެސްޓް ހެދުމަށް ހަމަޖެހިފައިވަނީ ތަޖުރިބާކާރު ފިޓްނަސް އިންސްޓްރަކްޓަރު މުހައްމަދު ފަޔާޒް (ފިއްޓޭ) ގެ ބެލުމުގެ ދަށުން އޭނާގެ ފިޓް4ލައިފް ފިޒިކަލް ފިޓްނަސް ސެންޓަރުގަ އެވެ.
ނިއު އަށް ގެންނަ ސްޕެއިން ފޯވާޑް އެޑްރިއަން، 29، މިދިޔަ ދެ ސީޒަން ކުޅުނީ ފިލިޕީންސްގެ ސެރެސް އެފްސީީ އަށެވެ. މިދިޔަ ދެ ސީޒަނުގައި ވެސް ފިލިޕީންސް ލީގުގެ ރަންބޫޓް ހޯދީ އޭނާ އެވެ. އެގޮތުން 2015 ވަނަ އަހަރު 18 ގޯލް އަދި މިދިޔަ އަހަރު 30 ގޯލް ޖެހި އެވެ. އެޑްރިއަން އަކީ މިދިޔަ އަހަރުގެ އޭއެފްސީ ކަޕުގެ ދެ ވަނަ އަށް އެންމެ ގިނަ ލަނޑު ޖެހި ކުޅުންތެރިޔާ އެވެ. މެޗަކުން ބަލިނުވެ ގްރޫޕް އެއް ވަނަ ޓީމުގެ ގޮތުގައި ސެރެސް ދެ ވަނަ ބުރަށް ދަތުރުކުރިއިރު އެޑްރިއަން އަށް ގޯލް ޖަހައި މޮޅު ކުޅުމެއް ދެއްކި އެވެ.
އޭގެ ކުރިން 2015 ވަނަ އަހަރުގެ އޭއެފްސީ ކަޕުގެ ޕްލޭއޮފުގައި ރާއްޖޭގެ މާޒިޔާ އަތުން މާލޭގައި 1-0 އިން ސެރެސް ބަލިވި މެޗުގައި ވެސް އެޑްރިއަން ކުޅުނެވެ.
ފުޓްބޯޅަ ކެރިއަރު 2009 ވަނަ އަހަރު ފެށި އެޑްރިއަން ވަނީ ސްޕެއިނުގެ ހަތަރު ވަނަ ޑިވިޝަނުގެ ރޭސިން ކްލަބް ޕޮޓުއެންސާއި އަލްޖެސިރަސް އެފްސީ އާއި ތިން ވަނަ ޑިވިޝަނުގެ އެތުލެޓިކޯ ސަންލުކުއޭނޯ އާއި ދެ ވަނަ ޑިވިޝަނުގެ ކަޑިޒްގެ ބީ ޓީމަށް ވެސް ކުޅެފަ އެވެ. އެ ޓީމުތަކާ އެކު ސްޕެނިޝް ކަޕުގައި ޖުމްލަ ފަސް މެޗު ކުޅުނުއިރު ސްޕެއިނުގެ ދަށް ޑިވިޝަންތަކުގައި 37 މެޗު އަދި ފިލިޕީންސް ލީގުގައި 22 މެޗު ކުޅެ 42 ގޯލް ޖަހާފައިވެ އެވެ.
ނިއު އަށް ގެންނަ ޖަޕާން މިޑްފީލްޑަރު އޮގާވާ، 30، އަކީ މިދިޔަ އަހަރު މިޔަންމާގެ ނެޝަނަލް ލީގު ޗެމްޕިއަން ޔަޑަނަބޮން އަށް ކުޅުނު ކުޅުންތެރިޔެކެވެ. ޑިފެންސަށް ވެސް ކުޅެވޭ އޮގާވާ ވަނީ ސިންގަޕޫރު ލީގާއި މެލޭޝިއާ ލީގާއި ތައިލެންޑް ލީގުގައި ކުޅެފަ އެވެ. މީގެ އިތުރުން ޔޫރަޕުގެ ދެ ގައުމު ކަމަށްވާ ލެޓްވިއާގެ ފުރަތަމަ ޑިވިޝަނުގައި އަދި ސާބިއާގެ ދެ ވަނަ ޑިވިޝަނުގައި ކުޅެފައިވެ އެވެ.
ނިއުގެ އާ ބޯޑާ އެކު ކްލަބް ވަރުގަދަކުރުމުގެ މަސައްކަތް އަންނަނީ ވަރަށް ބާރަށް ކުރަމުންނެވެ. އެގޮތުން ގޯލްކީޕަރު އިމްރާން މުހައްމަދާއި އަލީ ފާސިރު (ސެންޓޭ) އާއި އަހުމަދު އަބްދުﷲ (ލިލީ) އާއި އަކްރަމް އަބްދުލްގަނީގެ ސޮއި ހޯދާފައިވާއިރު އިތުރު ދިވެހި ކުޅުންތެރިން ވެސް ގުޅޭނެ ކަމަށް ނިއު އިން ބުނެ އެވެ.