13 ނޮވެމްބަރ 2022 - 10:15
މޫސުމީ ބަދަލުތަކުގެ ސަބަބުން ފަގީރު ގައުމުތަކަށް ލިބޭ ގެއްލުންތަކަށް ބަދަލު ދިނުމަށް އެކަށައަޅާ ނިޒާމެއްގައި ފުރިހަމަ އަށް ބައިވެރިވާން ތައްޔާރަށް އޮތް ކަމަށް ޗައިނާ އިން ބުނެފި އެވެ.
މިސްރުގެ ޝަރްމުއް ޝައިޚްގައި މިހާރު ކުރިއަށް ދާ، އދ.ގެ މޫސުމީ ބަދަލުތަކާ ބެހޭ މިއަހަރުގެ މަހާސިންތާ، ކޮޕް27 ގައި ވާހަކަ ދައްކަވަމުން ޗައިނާގެ މޫސުމީ ބަދަލުތަކާ ބެހޭ މަންދޫބު ޝީ ޒެންހުއާ ވިދާޅުވީ އެފަދަ ނިޒާމެއްގައި ބައިވެރިވުމަށް ޗައިނާއަށް އެއްވެސް ހުރަހެއް ނެތް ކަމަށެވެ. އެހެން ނަމަވެސް، މޫސުމަށް އަންނަ ބަދަލުތަކުގެ ސަބަބުން ލިބޭ ގެއްލުންތައް ފޫބެއްދުމުގައި، މުއްސަނދި ގައުމުތަކުގެ ބައިވެރިވުން މިހާރަށް ވުރެ އިތުރު ކުރުމަށް އޭނާ ގޮވައިލެއްވި އެވެ.
ގެއްލުންތައް ފޫބެއްދުމުގައި އެހީތެރިވެދޭނެ ކަމަށް ޗައިނާ އިން މި ބުނީ، މޫސުމީ ބަދަލުތަކުން ލިބޭ ގެއްލުންތައް ފޫބެއްދުމަށް ޗައިނާ އިން އެހީތެރިކަން ފޯރުކޮށްދޭންޖެހޭނެ ކަމަށް، އެމެރިކާ އިން ބުނެފައިވަނިކޮށެވެ. އެމެރިކާގެ ރައީސް ޖޯ ބައިޑެންގެ، މޫސުމީ ކަންކަމާ ގުޅޭ ޚާއްސަ މަންދޫބު ޖޯން ކެރީ ވިދާޅުވީ ޗައިނާ އިން ޖައްވުގެ ތެރެއަށް ވިހަ ގޭސް ދޫކުރުން ކުރިއަށް އޮތް 30 އަހަރުގެ ތެރޭގައިވެސް އިތުރުކުރާ ނަމަ، އެކަމުން ލިބޭ ގެއްލުންތައް ފޫބެއްދުމަށް ޗައިނާގެ މާލިއްޔާއިން ހޭދަކުރަންޖެހޭނެ ކަމަށެވެ.
ޗައިނާގެ މަންދޫބު ވިދާޅުވީ ތަރައްގީވަމުން އަންނަ ގައުމުތަކުން ތިމާވެށީގެ ހިމާޔަތުގައި ކުރާ ކަންކަމަށް ޗައިނާ އިން މިހާރުވެސް އެތައް ސަތޭކަ މިލިއަން ޑޮލަރެއް ހޭދަކޮށްފި ކަމަށެވެ. ނަމަވެސް، މިހާރު ހިނގަމުންދާ ކޮޕް27ގެ މަހާސިންތާގައި، މިދިޔަ 25 އަހަރުގެ ގާތް ރަހުމަތްތެރިއާ ޖޯން ކެރީއާ އެކުގައި މަޝްވަރާ ކުރެއްވި އިރުވެސް، ކެރީ އެ މައްސަލަ ފާހަގަ ނުކުރައްވާ ކަމަށް ޝީ ވިދާޅުވި އެވެ.
އެމެރިކާގެ ގާނޫނު ހަދާ މަޖިލީހުގެ ރައީސް ނެންސީ ޕެލޯސީ ދާދި ފަހުން ތައިވާނަށް ކުރެއްވި ދަތުރާ ގުޅިގެން ވެސް، ޗައިނާ އާއި އެމެރިކާއާ ދެމެދު ތިމާވެށީގެ ދާއިރާ އިން ދަމަހައްޓަމުން އައި އެއްބާރުލުން ވަނީ މެދުކެނޑިފަ އެވެ. ޗައިނާގެ މަންދޫބު ޝީ ވިދާޅުވީ ނެންސީގެ ދަތުރުގެ ސަބަބުން، ޗައިނާ ރައްޔިތުންގެ އިހްސާސްތަކުގައި ވަރަށް ވޭން އެޅި ކަމަށާއި، ނަމަވެސް ތިމާވެށީގެ ދާއިރާ އިން ދެ ގައުމުގެ މެދުގައި ނުރަސްމީ މަޝްވަރާތައް ކުރިއަށް ދާ ކަމަށެވެ.
"އެއްވެސް އޮޅުމެއް ނެތް ގޮތުގައި ދެ ގައުމުގެ ދެމެދުގައި ކުރަމުން އައި މަޝްވަރާތަކުގެ ދޮރު ބަންދުކޮށްލީ އެމެރިކާ އިން. އެ ދޮރު ހުޅުވޭތޯ މަސައްކަތް ކުރަމުން މިއަންނަނީ އަހަރެމެން، ޗައިނާ އިން."
ޗައިނާއަކީ ދުނިޔޭގެ ދެ ވަނަ އަށް އެންމެ ބޮޑު އިގްތިސާދު ކަމަށް ވިޔަސް، ދުނިޔޭގެ ވިޔަފާރިއާ ބެހޭ ޖަމިއްޔާ، ވޯލްޑް ޓްރޭޑް އޯގަނައިޒޭޝަނުން އެ ގައުމު ގިންތި ކޮށްފައިވަނީ ތަރައްގީވަމުން އަންނަ ގައުމެއްގެ ގޮތުގަ އެވެ.