10 ނޮވެމްބަރ 2022 - 11:19
މ. ސެންޑްރޯޒް ހުޅަނގުބައިގައި ހަދާފައިވާ ބިދޭސީން ތިބޭ އިމާރާތުގައި ރޭ ދަންވަރު ހިނގި އަލިފާނުގެ ހާދިސާގައި، ގިނަ ބަޔަކު މަރުވީ އެތަނުން ނުކުމެވޭނެ ގޮތެއް ނެތި ތާށިވެގެން ކަމަށް ބެލެވޭ ކަމަށް، އެ ސަރަހައްދުގައި ދިރިއުޅޭ ބައެއް މީހުން ބުނެފި އެވެ.
އެ އިމާރާތް ހުރި ސަރަހައްދުގައި ތިބި، ވަރަށް ގިނަ މީހުން ބުނާ ގޮތުގައި، އަލިފާންގަނޑު އެހާ ބޮޑުނުވެ ވެސް ވަރަށް ގިނަ އިރު ހުއްޓެވެ. އަލިފާންގަނޑު ބޮޑުވީ އަލިފާން ހިފިތާ ގާތްގަނޑަކަށް 10 ވަރަކަށް މިނެޓްގެ ތެރޭގައި ކަމަށް މަންޒަރު ދުށް މީހުން ބުނެ އެވެ.
"އެހެންވީމަ އެތެރޭގައި ތިބީ ސާޅީހަކަށް މީހުން ކަމަށް ވާނަމަ، ނުކުމެވޭނެ ގޮތެއް އޮތް ނަމަ 10 މިނެޓްގެ ތެރޭގައި ސަލާމަތްވީސް،" އެކަކު ބުންޏެވެ.
މި ހާދިސާގައި އެންމެން ވެސް އިއްތިފާގުވާ އެއް ކަމެއް އެބައޮތެވެ؛ އެއީ، އެ އެކޮމަޑޭޝަން ބްލޮކަކީ އިންސާނުން ދިރިއުޅެން އެކަށީގެން ނުވާ، އަދި ވެންޓިލޭޝަނެއް ނެތް، އަދި އަލިފާނުގެ މިކަހަލަ ހާދިސާއެއް ހިނގައިފި ނަމަ ދެން ސަލާމަތް ވެވޭނެ ގޮތެއް ވެސް ނެތް ތަނެއް ކަމެވެ.
މިހާތަނަށް ބެލެވިފައިވާ ގޮތުގައި، ޑެކެއް އަޅައިގެން އެތެރެ ހަދާފައިވާ އެ ތަނުގައި ކުދިކުދި ކޮޓަރިތައް ހަދައިގެން ގާތްގަނޑަކަށް ސާޅީހަކަށް މީހުން އުޅެ އެވެ. ބައެއް މީހުން ބުނި ގޮތުގައި ދެ ވަނަ ބުރިއާ ހަމައަށް އަރަން އޮންނަނީ ވަރަށް ދިގު، ދެ ފޫޓު ފުޅާ ސިޑިއެކެވެ. ފޮޓޯތަކުން ފެންނަ ގޮތުގައި ވެންޓިލޭޝަނަކަށް ހުރީ ކުޑަކުޑަ ދޮރެކެވެ. އެ ނޫން ދޮރެއް ވަށައިގެން ވެސް ނުހުންނަ ކަމަށް ވެ އެވެ. އެކަމަކު އޭސީއެއް ހަރުކޮށްފައި ހުއްޓާ ފެނެ އެވެ.
"މި ހިސާބުގައި އުޅޭތާ ކިތަންމެ ދުވަހެއް ވެއްޖެ. އެތަނަކަށް ދުވަހަކު ވެސް ނުވަންނަން. އެކަމަކު މި ހިސާބުގައި އިވޭނެ އެގޭގައި އެތައް ބަޔަކު އުޅެއޭ ކިޔައިގެން ވާހަކަ ދައްކާ އަޑު އަބަދުވެސް،" އެ ސަރަހައްދުގައި ދިރިއުޅޭ މީހަކު ބުންޏެވެ.
އިމާރާތުގެ ތިރީގައި ހުންނަނީ ގަރާޖެއް ހަދައިފަ އެވެ. ފުރަތަމަ ރޯވީ ގަރާޖުގައި ކަމަށް ވެ އެވެ.
އެ ސަރަހައްދުގައި ދިރިއުޅޭ ބައެއް މީހުން ބުނީ އަލިފާންގަނޑު ގަރާޖުގައި ރޯވެފައި ހުރިކަން، މަތީގައި އުޅޭ މީހުންނަށް ކުޑަ ވަގުތުކޮޅެއްގެ ތެރޭގައި އެނގުނެވެ. އޭރު ގަރާޖުގެ އެތެރޭގެ ހުޅުގަނޑު ހުރީ ބޭރަށް ނުކުމެފަ އެވެ.
"ދެން ނޯންނާނެ އެތަނުން ނުކުމެވޭނެ ގޮތެއް. އޭރު ސިޑި ގޮޅި އޮންނާނީ އަލިފާނުން ފުރިފައި،" އެކަކު ބުންޏެވެ.
"އެ ގޭގައި ދެން ނުކުމެވޭނެ ހަމަ އެއްވެސް ގޮތެއް ނޯންނާނެ. އެކަހަލަ ގަޑިއެއްގައި އެކަކަށް ހޭލެވިއްޖިއްޔާ އެހެން މީހުން ވެސް ހޭލެވޭނެ. އެހެންވީމަ ވަރަށް ޕެނިކް ވަގުތުކޮޅަކަށް ދާނީ. ބެލެވެނީ ހަމަ ނުކުމެވޭނެ ގޮތެއް ނެތިގެން މަރުވި މީހުން ކަމަށް. ސަލާމަތްވި މީހަކު ވިއްޔާ އެވީ ލިބުނު ކުޑަވަގުތުކޮޅެއްގެ ތެރޭގައި އަލިފާންގަނޑުގެ ތެރެއިން ދެމިގަނެގެން."