10 ނޮވެމްބަރ 2022 - 00:47
މިހާރު ކުރިއަށް ގެންދާ "ލިޓަސް ގައުމީ ބިލިއާޑް މުބާރާތް 2022" ގެ ޑަބަލްސް އިވެންޓްގެ ޗެމްޕިއަންކަން ހަސަން ޝާޒް މުހައްމަދާއި އަހުމަދު އިޔާދު ސައީދުގެ ޕެއާ ރޭ ހޯދައިފި އެވެ.
ޝާޒް އާއި އިޔާދުގެ ޕެއާ ޗެމްޕިއަންކަން ހޯދީ، ފައިނަލްގައި އިސްމާއިލް ރަޒީން އާއި ހަސަން ޝަފްރާޒްގެ ޕެއާއާ ވާދަކޮށް، 9-4 ފްރޭމުން މެޗު ކާމިޔާބު ކޮށްގެންނެވެ.
ފައިނަލް މެޗުގައި އެންމެ ފުރަތަމަ ފްރޭމް ކާމިޔާބު ކުރީ ރަޒީން އާއި ޝަފްރާޒްގެ ޕެއާ އެވެ. ދެ ޕެއާ ވެސް ވަރަށް އެއްވަރުކޮށް ފެށި ނަމަވެސް 3-3 ފްރޭމުން އެއްވަރު ވެފައި ވަނިކޮށް، ޝާޒް އާއި އިޔާދުގެ ޕެއާ ވަނީ ޖެހިގެން އައި ތިން ފްރޭމް ކާމިޔާބުކޮށް ބޮޑު ލީޑެއް ނަގައިފަ އެވެ.
ރަޒީން އާއި ޝަފްރާޒްގެ ޕެއާ އަށް ހަތަރުވަނަ ފްރޭމެއް ކާމިޔާބު ކުރެވުނީ އެ އަށް ފަހު އެވެ. ނަމަވެސް އޭގެ ފަހުން އިތުރު ފްރޭމެއް ކާމިޔާބު ކުރެވޭ ގޮތެއް ނުވި އެވެ.
ޑަބަލްސް އިވެންޓްގެ ވިނާސް ބްރެކެޓްގެ ސެމީ ފައިނަލް ގައި ވެސް ވާދަކުރީ މި ދެ ޕެއާ އެވެ. އެ މެޗު 7-4 ފްރޭމުން ކާމިޔާބު ކޮށް، ފައިނަލްގެ ސީދާ ޖާގައެއް ހޯދީ ޝާޒް އާއި އިޔާދެވެ. އެއާއެކު ރަޒީން އާއި ޝަފްރާޒަށް ޖެހުނީ ލޫޒާސް ބްރެކެޓްގެ ސެމީ ފައިނަލް ގައި، ހުސެއިން ފަޔާޒާއި ޝަޒީން އަބްދުއް ސަމަދާ ދެކޮޅަށް ކުޅޭށެވެ. ރަޒީން އާއި ޝަފްރާޒް ފައިނަލަށް ދިޔައީ ވާދަވެރި ކުޅުމަކަށް ފަހު 7-6 ފްރޭމުން ހުސެއިން ފަޔާޒާއި ޝަޒީން ބަލި ކޮށްފަ އެވެ.
ހުސެއިން ފަޔާޒާއި ޝަޒީން، ލޫޒާސް ބްރެކެޓްގެ ސެމީ އަށް ދަތުރު ކުރީ، ސެމީ ފައިނަލް ޕްލޭއޮފް ގައި އިބްރާހިމް ޝަރީފާއި އަސްލަމް އަބްދުﷲ ގެ ޕެއާ ބަލި ކޮށްފަ އެވެ.
ހުސެއިން ފަޔާޒާއި ޝަޒީންގެ ޕެއާ ވަނީ ޕްލޭއޮފުގެ ޖާގަ ހޯދަން އަލީ ފަޔާޒާއި މުހައްމަދު ފަރީމް ބަލި ކޮށްފަ އެވެ. ޕްލޭއޮފުން ޖާގަ ހޯދަން ޝަރީފް އާއި އަސްލަމް ގެ ޕެއާ ވަނީ މުހައްމަދު ސާހިލް ހަމީދާއި ޝާފިއު އަބްދުﷲ ގެ ޕެއާ ބަލި ކޮށްފަ އެވެ.
މުބާރާތުގައި ކުރިއަށް އޮތީ މިކްސްޑް ޑަބަލްސް އިވެންޓެވެ. އެ އަށް ފަހު އެންމެ ފަހު އިވެންޓެއްގެ ގޮތުގައި ރައީސުލްޖުމްހޫރިއްޔާގެ ވާދައިގެ ތަށްޓަށް ކުޅެވޭ ޓީމް އިވެންޓް ކުރިއަށް ގެންދާނެ އެވެ.
ޖުމްލަ 10 ޕެއާ އާއެކު މިކްސްޑް ޑަބަލްސް އިވެންޓް މިއަދުގެ މެންދުރު ފަށާނެ އެވެ.