09 ނޮވެމްބަރ 2022 - 17:19
ށ. މާއުނގޫދޫގައި ރޭ ހިނގި މާރާމާރީއެއްގައި ޒަހަމްވި ޒުވާނާގެ ފުރަތަމަ އޮޕަރޭޝަން ކާމިޔާބުކަމަށް ކުޅުދުއްފުށީ ރީޖަނަލް ހޮސްޕިޓަލުން ބުނެފި އެވެ.
އެ ހޮސްޕިޓަލުން ނެރުނު ނޫސްބަޔާނެއްގައި ބުނީ މިއަދު ފަތިހު އެ ހޮސްޕިޓަލަށް، ވަޅީގެ ޒަހަމާއެކު ގެނެވުނު 31 އަހަރުގެ ޒުވާނާގެ ފުރަތަމަ އޮޕަރޭޝަން ކާމިޔާބުކަމާއެކު ނިންމާލާފައިވާ ކަމަށެވެ. އޭނާ ގެނެވުނީ ވާއަތު އަރިކައްޓަށް ލިބިފައިވާ ޒަހަމުތަކަކާއެކު ކަމަށް އެ ހޮސްޕިޓަލުން ބުނެ އެވެ.
އޭނާއަށް ވަގުތުން ފަރުވާދެވި އިތުރު ބެލުންތައް ބެލުމަށް ސީޓީ ސްކޭން ހެދުނު ކަމަށާއި އައިޖީއެމްއެޗްގެ ތަޖުރިބާކާރު ޑޮކްޓަރުންގެ ޓީމުން އަދި ކުޅުދުއްފުށީ ރީޖަނަލް ހޮސްޕިޓަލިގެ ސާޖަރީ ޑިޕާޓްމަންޓުން ފާހަގަވި ކަންތައްތަކަށް ބަލައި ޑައިގްނޯސްޓިކް ލެޕަރޮސްކޯޕިކް ސާޖަރީ ހެދުމަށް ނިންމުނު ކަމަށް އެ ހޮސްޕިޓަލުން ބުނެ އެވެ.
"މި ގޮތުން ބަނޑު ބޮޑަށް ކަފާނުލައި ކެމެރާގެ ޒަރީއާއިން އިތުރަށް ބެލިބެލުމުން، ފަލަ ގޮހޮރަށް ބޮޑެތި ގެއްލުންތަކެއް ލިބިފައިވާތީ އިތުރު އޮޕަރޭޝަނެއް ކުރުމަށް ނިންމުނެވެ،" އެ ހޮސްޕިޓަލުގެ ނޫސް ބަޔާނުގައި ވެ އެވެ.
ޖުމުލަ ތިން ގަޑިއިރުގެ މި އޮޕަރޭޝަން މިހާރު ނިންމައިލެވިފައިވާ ކަމަށާއި އޭނާގެ ބަލި ހާލަތު މިހާރު ރަނގަޅު ނަމަވެސް ފުރަތަމަ 24 ގަޑިއިރު އޮބްޒަވޭޝަންގައި އައިސީޔޫގައި ބޭއްވުމަށް ނިންމައިފައިވާ ކަމަށް ބުނެ އެވެ. އަދި ގޮހޮރަށް ގެއްލުން ލިބިފައިވާ ބައި ބުރިކޮށްލެވިފައިވާއިރު، މީގެ ދެ މަސް ފަހުން އަދި އިތުރު އޮޕަރޭޝަން އޭނާ ކުރަން ޖެހޭނެ ކަމަށް ޑޮކްޓަރުން ލަފާދޭ ކަމަށް ވެސް ބުނެފައި ވެ އެވެ.
މާއުނގޫދޫގައި ރޭ ހިނގި މާރާމާރީގައި ދެ މީހަކު ޒަހަމް ވި އެވެ. މި ޒުވާނާގެ އިތުރުން ދެން ޒަހަމްވީ 25 އަަހަރުގެ ޒުވާނެކެވެ.