11 ޖެނުއަރީ 2017 - 06:23
އެމެރިކާގެ ކަނެކްޓިކަޓްގެ 23 އަހަރުގެ އަންހެނަކަށް ހަރަކާތްތެރިވެ އުޅެން ދަތިވެ މަޑުމަޑުން ދަނީ ނުކުޅެދޭ ހާލަތަކަށް ދަނީ ބަދަލުވަމުންނެވެ. އޭނާ އަށް ޖެހިފައިވާ "މެނިކުއިން ޑިޒީޒް"ގެ ސަބަބުން ހަށިގަނޑުގެ ތެރެއިން އިތުރު ސްކެލިޓަން އެއް އުފެދެނީ އެވެ.
ޖާސްމިން ފްލޮއިޑް އަށް ފައިބްރޯޑިސްޕްލޭސިއާ އޮސިފިކަން ޕްރޮގްރެސީވާ (އެފްއޯޕީ) ކިޔާ މި ބަލި ޖެހިފައިވާކަން އެނގުނީ އުމުރުން ފަސް އަހަރުގަ އެވެ. މި ބައްޔަށް "މެނިކުއިން ޑީޒީޒް" ވެސް ކިޔަ އެވެ.
ފްލޮއިޑްގެ ބަލީގެ ސަބަބުން އޭނާގެ ލިގަމެންޓްތަކާއި މަސްތައް ވެސް ދުވަސްވާ ވަރަކަށް ކައްޓަށް ބަދަލުވަނީ އެވެ. މި ބަލި ޖެހުމުގެ ފުރުސަތު އޮންނަނީ ކޮންމެ އެއް މިލިއަން މީހުންގެ ތެރެއިން އެކަކަށެވެ. މި ބަލި ޖެހިފައިވާ 700 މީހަކު ދުނިޔޭގައި އެބަތިބި ކަމަށް ބެލެވެ އެވެ.
މި ބަލި ޖެހިފައިވާ މީހުންގެ އިތުރަށް އުފެދޭ ކަށިތައް އޮޕަރޭޝަން ކޮށްގެން ނެގޭކަށް ވެސް ނޯވެ އެވެ. ސަބަބަކީ އޭރުން ބަލި އިތުރަށް ގޯސްވެ ކަށިތައް ނެގި ހިސާބުގައިވާ ޒަޚަމުން ވަރަށް އަވަހަށް ކަށި އަލުން ފަޅާތީ އެވެ.
ފްލޮއިޑް ބުނި ގޮތުގައި އޭނާއަށް އެންމެ ގިނަ ވެގެން ވެސް ދުނިޔޭގައި ހުރެވޭނީ 45 އަހަރު ވަންދެން ކަމަށް ޑޮކްޓަރުން ވަނީ ބުނެފަ އެވެ. ސަބަބަކީ އޭނާގެ މައިބަދައިގެ ކަށިތައް މިހާރު ހިމަވަމުން ދާތީ އެވެ.
"އަހަރެންގެ ފުއްޕާމޭގައި މައްސަލައެއް ނެތް. އެކަމަކު އޭގެ ވަށައިގެންވާ ހިސާބުތަކުގައި މައްސަލަތައް އެބަހުރި،" ސީއެންއެން އަށް ދީފައިވާ އިންޓަވިއުއެއްގައި ފްލޮއިޑް ބުންޏެވެ.
ފްލޮއިޑް ބުނީ މި ކަށިތައް އުފެދެމުންދާތީ އޭނާގެ ދިރިއުޅުމަށް ވަރަށް ގިނަ ގޮތްގޮތުން އުނދަގޫތައް ފޯރާ ކަމަށެވެ. ޚާއްސަކޮށް ކެއުމުގެ ކަންތައް ކުރެވެނީ ވަރަށް އުނދަގުލުން ކަމަށާއި ދަތް އުނގުޅާ ސާފުތާހިރުވާން ވަރަށް ގިނަ ވަގުތު ނަގާ ކަމަށް އޭނާ ބުންޏެވެ. ނަމަވެސް މިހާރުގެ ހާލަތަށް ހޭނެން މަސައްކަތްކުރަމުންދާ ކަމަށް ފްލައިޑް ބުނެފައިވެ އެވެ.