25 އޮކްޓޯބަރ 2022 - 06:52
ބޮލީވުޑްގެ ތަރި، ޖާޔާ ބައްޗަނަކީ ޕަޕަރާޒީންގެ ކުރިމަތީގައި ވަރަށް ރުޅިގަދަ ތަރިއެކެވެ. ފޮޓޯއެއް ނަގަން ކެމެރާ ދިއްކޮށްލާ ކޮންމެ ފަހަރަކު އޭނާ ފެންނަނީ ކޮންމެވެސް ކަމަކާ ހިތްހަމަނުޖެހިފައި ނުވަތަ ރުޅިގަދަވެފައި ހުއްޓަ އެވެ. ބައެއް ފަހަރު ޕަޕަރާޒީންނާ ދިމާލަށް "ލަދެއް ނުގަނެހޭ" ކިޔާ ހަޅޭ ވެސް ލަވަ އެވެ. އެކަމަކު ޕަޕަރާޒީން ދެކެ ޖާޔާ މިހާ ރުޅި އަންނަންވީ ވަކި ކީއްވެ ހެއްޔެވެ؟
ޖާޔާ ވަނީ އޭނާގެ މާމަ ދަރިފުޅު ނަވްޔާ ގެނެސްދޭ ޕޮޑްކާސްޓް، "ވަޓް ދަ ހެލް ނަވްޔާ" ގެ އެޕިސޯޑެއްގައި ބައިވެރިވެ، އެކަމާ ވަރަށް ބޮޑަށް ވާހަކަ ދައްކައިފަ އެވެ.
ޖާޔާ ބުނީ އޭނާގެ އަމިއްލަ ދިރިއުމުގެ ކަންކަމުގެ ތެރެއަށް ވަދެ، އޭނާގެ ދިރިއުޅުމާ ގުޅޭ ކަންކަން ވިއްކައިގެން ކައިބޮއެ އުޅޭ މީހުން ދެކެ ވަރަށް ރުޅި އަންނަ ކަމަށެވެ. އެމީހުންނަށް ވަރަށް ނަފްރަތުކުރާ ކަމަށް ބުނެ ޖާޔާ ވަނީ އެމީހުންގެ ހުރިހާ އަމަލުތަކާ މެދު ވެސް ވަރަށް ހިތްހަމަނުޖެހޭ ކަމަށް ބުނެފަ އެވެ. އަދި އެމީހުންނާ ދިމާލަށް އަބަދުވެސް އޭނާ ބުނާ ވާހަކައަކީ އެކަން ކުރަން އެއްވެސް ލަދެއް ނުގަނެތޯ ކަމަށް ޖާޔާ ބުންޏެވެ.
އެކަމަކު ޖާޔާ ބުނީ އޭނާގެ ފިލްމީ މަސައްކަތާ ގުޅޭ ކަންކަމުގައި ވާހަކަ ދެއްކިޔަސް މައްސަލައެއް ނެތް ކަމަށެވެ.
މިދިޔަ ހަފްތާގެ ތެރޭގައި ޖާޔާ އާއި އޭނާގެ މާމަ ދަރި، "ލަކްމޭ ފެޝަން ވީކް" ގައި ބައިވެރިވާން ދިޔަ ތަނުގައި ތިބި ޕަޕަރާޒީންނަށް ވެސް ވަރަށް ހުތުކޮށް ޖާޔާ ވާހަކަ ދެއްކި އެވެ. އެ އިވެންޓުގައި ބައިވެރިވުމަށް އެތަނަށް އެމީހުން ވަންނަން ދިޔައިރު ޕަޕަރާޒީންގެ ޓީމުގައި ހިމެނޭ ކެމެރާމަނަކު، ފޮޓޯއެއް ނަގަން އުޅެނިކޮށް ތަނެއްގައި އަޅައިގަތުމުން، ޖާޔާ ވަނީ އެމީހާ ވެއްޓޭތޯ އުއްމީދުކުރި ކަމަށް ބުނެފަ އެވެ.
ޖާޔާގެ ފަރާތުން ފެނުނު އެ އަމަލުތަކުގެ ސަބަބުން އާންމުންގެ ފާޑުކިޔުން ވަރަށް ބޮޑަށް ކުރިމަތިވެ އެވެ. ފިލްމުތައް ޕްރޮމޯޓްކުރަންވީމާ ހެވިފައި ޕަޕަރާޒީންގެ ކުރިމަތިގައި އުޅުމަށް ފަހު، ފިލްމުތަކުގެ މަސައްކަތް ނެތް ދުވަސްވަރު އެހާ ދަށް ބައެއްގެ ގޮތުގައި އެމީހުންނާ މެދު ދެކޭތީ ގިނަ ބަޔަކު ވަނީ އޭނާއަކީ ވަރަށް ފޮނި މީހެއްގެ ގޮތުގައި ސިފަކޮށްފަ އެވެ.
މި ނުހުރުންތަކާ ގުޅިގެން ޖާޔާ ބުނަނީ އޭނާއަކީ ވެސް އިންސާނެއް ކަމަށެވެ.