09 ޖެނުއަރީ 2017 - 11:43
ހަތްދިހަ ހަތަރު ވަނަ ގޯލްޑެން ގްލޯބް އެވޯޑްސްގައި މިއުޒިކަލް/ކޮމެޑީ "ލާ ލާ ލޭންޑް" އެ ފިލްމް ވާދަ ކުރި ހުރިހާ ކެޓަގަރީއަކުން އެވޯޑް އުފުލާލައި، އެވޯޑް ހަފުލާގައި ވިދުން ގަދަކޮށްފި އެވެ.
އެ ފިލްމަށް އެންމެ މޮޅު މިއުޒިކަލް/ކޮމެޑީގެ އެވޯޑާ އެކު މިއުޒިކަލް އިން އެންމެ މޮޅު އެކްޓަރުގެ އެވޯޑް ރަޔަން ގޮސްލިން، މިއުޒިކަލް އިން އެންމެ މޮޅު ބަތަލާގެ އެވޯޑް އެމާ ސްޓޯން ވަނީ ހޯދައިފަ އެވެ.
"ލާ ލާ ލޭންޑް" އުފުލައިލި އިތުރު އެވޯޑްތަކުގެ ތެރޭގައި އެންމެ މޮޅު ޑައިރެކްޓަރާއި އެންމެ މޮޅު ސްކްރީންޕްލޭގެ އެވޯޑް އެ ފިލްމުން ޑެމިއެން ޗެޒެލް ވަނީ ހޯދައިފަ އެވެ.
އެންމެ މޮޅު އޮރިޖިނަލް ސްކޯ އާއި އޮރިޖަނަލް ސޯންގަކަށް ހޮވުނީ ވެސް "ލާ ލާ ލޭންޑް" ގެ "ސިޓީ އޮފް ސްޓާޒް" އެވެ.
ފަސް މިލިއަން ޑޮލަރުގެ ކުޑަ ބަޖެޓަކުން، މަޝްހޫރު ނޫން ތަރިންތަކެއް ހިމަނައިގެން ބެރީ ޖެންކިންސް ޑައިރެކްޓް ކުރި "މޫންލައިޓް" ގޯލްޑެން ގްލޯބްސްގެ ހަ ކެޓަގަރީއަކުން ވާދަ ކުރި އިރު، ޑްރާމާ ކެޓަގަރީން އެންމެ މޮޅު ފިލްމަކަށް ހޮވުނީ އެ ފިލްމެވެ.
ޑްރާމާ ކެޓަގަރީން އެންމެ މޮޅު އެކްޓަރަކަށް "މެންޗެސްޓަ ބައި ދަ ސީ" އިން ކޭސީ އެފްލެކް އުފުލައިލި އިރު، އެންމެ މޮޅު ބަތަލާގެ އެވޯޑް ހާސިލް ކުރީ "އެލީ" އިން އީސަބެލް ހަޕަޓެވެ.
ޑްރާމާ ކެޓަގަރީން އެންމެ މޮޅު ސަޕޯޓިން އެކްޓަރަކަށް ހޮވުނީ "ނޮކްޓާނަލް އެނިމަލް" އިން އާރޮން ޓޭލާ-ޖޯންސަން އެވެ. އެންމެ މޮޅު ސަޕޯޓިން އެކްޓްރެސްއަކަށް ހޮވުނީ "ފެންސެސް" އިން ވަޔޮލާ ޑޭވިސް އެވެ.
ބެސްޓް ފޮރިން ލެންގްއޭޖް ފިލްމަކަށް ފްރާންސްގެ "އެލީ" ހޮވުނު އިރު އެންމެ މޮޅު އެނިމޭޓެޑް ފިލްމަކަށް ހޮވުނީ ޑިސްނީގެ "ޒޫޓޯޕިއާ" އެވެ.