08 ޖެނުއަރީ 2017 - 11:43
ޓިއުރިން (ޖެނުއަރީ 8) – ޗައިނާ ކްލަބަކުން ބޮޑު އޮފާއެއް ހުށަހެޅި ކަމަށާއި އެ ކްލަބުން ހުށަހެޅި މުސާރަ ބޮޑުކަމުން އެކަމާ ވިސްނައި އެތައް ރެޔެއްގެ ނިދި ނަގާލަން ޖެހުނު ކަމަށް ޓޮރިނޯގެ ކޯޗު ސާބިއާގެ ސިނިސާ މިހަލޮވިޗް ބުނެފި އެވެ.
ޗައިނާގެ ކްލަބްތަކުން ޔޫރަޕުގައި ކުޅޭ މަޝްހޫރު ކުޅުންތެރިން ރެކޯޑް އަގުތަކެއްގައި ގަންނަމުން އަންނައިރު މަޝްހޫރު ކޯޗުންނަށް ވެސް އަންނަނީ ކަޅި އަޅަމުންނެވެ.
އޭސީ މިލާނުގެ ކޯޗުކަމުން ވަކިކުރުމުން މިދިޔަ ސީޒަނުގައި ޓޮރިނޯއާ ހަވާލުވި މިހަލޮވިޗުގެ ކޯޗުކަމުގެ ދަށުން އެ ޓީމު އޮތީ އިޓާލިއަން ލީގުގެ އަށް ވަނައިގަ އެވެ. ޑިސެމްބަރު ޗައިނާ އިން ލިބުނު އޮފާ އޭނާ ގަބޫލުކުރި ނަމަ ކުރު މުއްދަތެއްގެ ތެރޭގައި ޓޮރިނޯ އިން ވަކިވާން ޖެހުނީހެވެ.
"އަހަންނަށް ވަރަށް ބޮޑު އޮފާއެއް ލިބުނީ. އެކަމަކު އަހަރެން ބޭނުންނުވީ މަސައްކަތުގެ އެއްބައި ނިންމާފައި ދާން. އެހެންވެ އެ އޮފާ އަށް ފުރަގަސްދިނީ،" މިލާނުގައި 2.3 މިލިއަން ޔޫރޯގެ މުސާރައެއް ލިބުނު މިހަލޮވިޗް ބުންޏެވެ. "ހަގީގަތަކަށް ބުނަންޏާ ބުނެވޭނީ ޗައިނާ އިން ހުށަހެޅި މުސާރައާ މެދު ވިސްނަން ހަދައިގެން އަހަންނަން ނުދިނި އެތައް ރެޔެއް ދިޔަަ. އެހާ ވެސް މުސާރަ ބޮޑު."
މިހަލޮވިޗް ބުނީ ބޮޑު މުސާރައަށް ޗައިނާ އަށް ބަދަލުވާ ކުޅުންތެރިން ކުށްވެރިން ކޮށްގެންނުވާނެ ކަމަށާއި ފުޓްބޯޅަ ކެރިއަރަކީ ކުރު އެއްޗެއް ކަމަށާއި އެހެންވެ ފައިސާ ވެސް މުހިއްމު ކަމަށެވެ. އަދި ޔޫރަޕުގައި ލިބޭ މުސާރައިގެ ހަ ގުނަ މުސާރައެއް ޗައިނާ އިން ލިބޭތީ އެކަމަށް ގިނަ ކުޅުންތެރިން ޝައުގުވެރިވާނެ ކަމަށް އޭނާ ބުންޏެވެ.
"ގަތަރާއި އެމެރިކާ އިން ގެންދަނީ ރިޓަޔާމަންޓުގައި ތިބި ކުޅުންތެރިން އެކަމަކު ޗައިނާ އިން މިގެންދަނީ ޒުވާން ކުޅުންތެރިން،" މިހަލޮވިޗް ބުންޏެވެ.