25 ސެޕްޓެމްބަރ 2022 - 10:33
އެމްޕީއެލްގެ "ޕޯޓްޑިޖިޓަލްކޮށް" ކެމްޕެއިނުގެ ދަށުން އޮންލައިން ތިން ހިދުމަތެއް ރޭ ތައާރަފުކޮށްފި އެވެ.
އެ ކުންފުނީގެ 36 ވަނަ އަހަރީ ދުވަހުގެ މުނާސަބަތުގައި ބޭއްވި ރަސްމިއްޔާތުގައި ތައާރަފުކުރީ "އެމްޕީއެލް ޖޮބް ޕޯޓަލް" އާއި "އެމްޕީއެލް ސްޓާފް އެޕް" އަދި "އޮކްޝަން ޕޯޓަލް" އެވެ.
އެމްޕީއެލުން ހުސްވެފައިވާ ވަޒީފާތައް ޖޮބް ޕޯޓަލުން ބެލޭނެ ކަމަށާއި އެ ވަޒީފާތަކަށް އޮންލައިންކޮށް ހުށަހެޅޭނެ ކަމަށް އެ ކުންފުނިން ބުންޏެވެ. އެ މީހަކު ބޭނުންވާ ވަޒީފާއާ ގުޅޭ ކަންކަމުގައި އެމްޕީއެލުން ނިންމާ ގޮތްތައް ވެސް އެ އެޕްލިކޭޝަން މެދުވެރިކޮށް ފެންނާނެ އެވެ.
އެމްޕީއެލްގެ މުވައްޒަފުންނަށް އަމާޒުކޮށްގެން، ފަސޭހަގޮތްތަކެއް ހޯދައިދިނުމަށް ތައާރަފުކުރި "އެމްޕީއެލް ސްޓާފް އެޕް" މެދުވެރިކޮށް އެ ކުންފުނީގެ މުވައްޒަފުންގެ ވަނަވަރާއި ހާޒިރީ ރިޕޯޓާއި މުސާރައިގެ ތަފުސީލު ވެސް ބެލޭނެ އެވެ. އަދި މުވައްޒަފުންގެ ޗުއްޓީގައި ބާކީ ދުވަސްތަކާއި ޗުއްޓީ އަށް އެދި ހުށަހެޅުމުގެ ކަންކަން ވެސް އެ އެޕް މެދުވެރިކޮށް ކުރެވޭނެ ކަމަށް އެ ކުންފުނިން ބުނެ އެވެ.
"އޮކްޝަން ޕޯޓަލް" ގެ ބޭނުމަކީ އެމްޕީއެލުން ބުނިގޮތުގައި، ރާއްޖެ އަށް އެތެރެކުރުމަށް ފަހު، ކްލިއާ ނުކޮށް ގިނަދުވަސްވެފައިވާ މުދާ ނީލަން ކިޔުމެވެ. ނީލަން ކިޔަން ހަމަޖެހިފައިވާ މުދަލުގެ ތަފުސީލާއި ނީލަމަށް އަގު ހުށަހެޅުމާއި ނީލަމުގެ ޕްރޮގްރެސް އެ ޕޯޓަލުން ވަގުތުން ބެލޭނެ އެވެ. އެ ހިދުމަތާއެކު، ނީލަން ކިޔާ މުދާ ބީލަމަށް ލުމަށް އެމްޕީއެލް ސަރަހައްދަށް ދާކަށް ނުޖެހޭނެ އެވެ.
އޮންލައިން ހިދުމަތްތައް ތައާރަފްކުރުމުގެ އިތުރުން، ރޭގެ ޖަލްސާގައި އެމްޕީއެލްގެ ބައެއް މުވައްޒަފުންނަށް ދާއިރާއާ ގުޅޭ މަތީ ތައުލީމަށް ކިޔަވަން ސްކޮލަޝިޕްތައް ދިނެވެ. އަދި އެމްޕީއެލްގެ ސީއެސްއާރުގެ ދަށުން ކޮމިއުނިޓީ ފަންޑެއް އިފުތިތާހުކޮށް، އެ ކުންފުނީގެ ދުވަސްވީ މުވައްޒަފުންނަށް ހަނދާނީ ފިލާ ދިނެވެ.