08 ޖެނުއަރީ 2017 - 06:35
އޮޓޯ ރިކްޝޯ ދުއްވުމުގެ މަސައްކަތްކުރި ބަންގްލޭޝްގެ 27 އަހަރުގެ އަބުލް ބަޖެންދުރަ އަކީ އެޕިޑޯމިއާޑިސްޕްލޭސިއާ ވެރިޔުސްސިފޯމިސް ކިޔާ ވަރަށް ބިރުވެރި އެހާމެ ވޭން ހުރި ބައްޔެއް ޖެހިފައިވާ މީހެކެވެ. މުޅި ދުނިޔޭގައި ވެސް މި ބަލި ޖެހިފައިވާ ކަމަށް ރެކޯޑްތަކުން ދައްކަނީ ބަޖެންދުރައާ އެކު ހަތަރު މީހެކެވެ.
"ޓްރީ މޭން" ނުވަތަ ގަސް މީހާގެ ނަމުން ބަޖެންދުރަ އަށް މީހުން މުޚާތަބު ކުރަނީ ބަލީގެ ސަބަބުން އޭނާގެ އަތާއި ފައިގައި ގަހެއްގެ ގޮފިތައް ފަދައިން އުފެދި ބޮޑުވެފައި ހުރި ބައިތަކެއްގެ ސަބަބުންނެވެ.
އަންބަކާއި ކުޑަ ދަރިއެއް ބެލުމުގެ މަސްއޫލިއްޔަތު އަދާކުރަންޖެހިފައިވާ ބަޖެންދުރަގެ ފަގީރުކަމުން އޭނާގެ ބައްޔަށް ފަރުވާ ކުރެވޭނެ ތަނަވަސްކަމެއް ނެތި ގޮތް ހުސްވެފައި ވަނިކޮށް ބައިނަލްއަގުވާމީ މީޑިއާގެ ސަމާލުކަން އޭނާއަށް ލިބުނެވެ. އަދި އޭނާގެ ވާހަކަ ނޫސްތަކުގައި ޖެހުމުން ބަންގްލަދޭޝްގެ ސަރުކާރުން އޭނާގެ ފަރުވާގެ ޚަރަދު ކޮށްދޭން އެއްބަސްވި އެވެ.
ބަޖެންދުރަ އަށް ކިރިޔާ ވެސް އުންމީދެއް ލިބުނީ ފެބްރުއަރީ 19، 2015 ގައި ޑާކާ މެޑިކަލް ކޮލެޖުގައި ނުވަ ޑޮކްޓަރުންގެ ޓީމަކުން އޭނާގެ އޮޕަރޭޝަން ކޮށްދިނުމަށް ނިންމުމުންނެވެ. އޭނާގެ ފުރަތަމަ އޮޕަރޭޝަނަށް ވެސް ތިން ގަޑިއިރު ހޭދަވި އެވެ. ބަޖެންދުރަގެ އަތާއި ފައިގައި އުފެދިފައި ހުރި ބައިތައް ނެގުމަށް 16 އޮޕަރޭޝަނެއް މިހާތަނަށް ކޮށްފި އެވެ. އަދި ފަސް ކިލޯގެ ބަރުދަން ހުރި ބައިތައް ޑޮކްޓަރުން ވަނީ ބަޖެންދުރަގެ ހަށިގަނޑާ ވަކިކޮށްފަ އެވެ.
އޮޕަރޭޝަންގެ ކުރިން ބަޖެންދުރަ ބުނީ އޭނާ މި ބަލީގެ ވޭނުގައި އުޅޭތާ 10 ވަރަކަށް އަހަރު ވެއްޖެ ކަމަށެވެ. އަދި އެހެން މީހުން ފަދައިން އާދައިގެ ދިރިއުޅުމެއް އުޅެން ބޭނުން ކަމަށާއި ދަރިފުޅު އުރާލަން ބޭނުންކަމަށް އޭނާ ބުނެފައިވެ އެވެ. އަދި އަމިއްލަ އަތުން ކާލަން ލިބޭ ދުވަހަކަށް ވެސް އިންތިޒާރުކުރާ ކަމަށް ބަޖެންދުރަ ސީއެންއެންއަށް އޭރު ދިން އިންޓަވިއުއެއްގައި ބުންޏެވެ.
ބަޖެންދުރަގެ އޮޕަރޭޝަން ކުރެއްވި ޑޮކްޓަރުންގެ ޓީމުން ބުނަނީ އޭނާގެ ބައްޔަށް ކުރެވުނު ފަރުވާއަކީ ބޭސްވެރިކަމުގެ ތާރިހުގައި ވެސް ފާހަގަ ކޮށްލެވޭނެ ފަރުވާއެއް ކަމަށާއި ބަޖެންދުރަ ފަސޭހަވަމުން އަންނަނީ ވެސް ހީވެސް ނުކުރާހާ އަވަހަށް އެހާމެ ރަނގަޅަށް ކަމަށެވެ.
"އަހަރެމެން 16 ފަހަރެއްގެ މަތިން އޮޕަރޭޝަންކޮށް ބަޖެންދުރަގެ އަތާއި ފައިގައި ހުރި ވާޓްސްތައް ނަގައިފިން. މިހާރު އޭނާގެ އަތާއި ފައި މުޅިން ރަނގަޅު. އަދި 30 ވަރަކަށް ދުވަހުގެ ތެރޭގައި ގެއަށް ފޮނުވާލާނަން. އެއީ އޭނާގެ އަތުގެ ބައްޓަން ގެއްލިފައިވާ ތަންތަން ރީތި ކުރުމަށްޓަކައި ކުރަންޖެހޭ އާދައިގެ ކުދިކުދި އޮޕަރޭޝަންތަކެއް އަދި ހުރުމުން،" ޑޮކްޓަރު ވިދާޅުވި އެވެ.
ޑޮކްޓަރު ގަބޫލުކުރާ ގޮތުގައި ބަޖެންދުރަ އަކީ މި ބަލި ޖެހި މުޅިން ފަސޭހަކުރެވުނު ފުރަތަމަ މީހާ އެވެ. އޭނާގެ ބަލި އެނބުރި ނާންނާނެކަމަށް ޑޮކްޓަރު އުންމީދު ކުރެ އެވެ.
ބަޖެންދުރަ ބުނީ އޭނާއަށް މިހާރު ވަރަށް ބޮޑަށް ލުއިވެ ހިތްހަމަޖެހުން ލިބިފައިވާ ކަމަށެވެ. އަދި ދަރިފުޅު އުރާލައި އުނގުގައި ބައިންދައިގެން ދަރިފުޅާއެކު ކުޅެލާނެ ފުރުސަތު ލިބުމުން ވަރަށް އުފާވެއްޖެ ކަމަށް ވެސް އޭނާ ބުންޏެވެ.
ބަޖެންދުރަގެ މި ބިރުވެރި ބަލީގެ ސަބަބުން އަވަށްޓެރިން ވެސް އޭނާ ފެންނަ ހިސާބަށް ނައިސް އުޅެމުންދިޔަ އެވެ. ނަމަވެސް އެ ގައުމުގެ ޓީވީތަކުން ވެސް ބަޖެންދުރަގެ ޚަބަރުތައް ދައްކަން ފެށުމުން މިހާރު އޭނާއަކީ މުޅި ބަންގްލަދޭޝް އަށް ވެސް މަޝްހޫރު މީހަކަށް ވަނީ ވެފަ އެވެ.
ބަޖެންދުރަ އަށް އޭނާގެ އަންހެނުން ހަލީމާ ޚާތޫން އާ ބައްދަލުވީ މި ބަލި ޖެހުމުގެ މާ ކުރިންނެވެ. ނަމަވެސް އެ ދެ މީހުން ކައިވެނިކުރިތަނާ ބަލީ ފެތުރެން ފެށި އެވެ. ބަޖެންދުރައާ ހަލީމާ ކައިވެނިކުރަން ހަލީމާގެ އާއިލާއިން ގަބޫލެއް ނޫނެވެ. ނަމަވެސް ބަޖެންދުރަގެ ބަލިހާލާއެކު ވެސް ހަލީމާ ބަޖެންދުރައާ ކައިވެނިކޮށްގެން ދެ މީހުން އެކުގައި ދިރިއުޅެން ފެށި އެވެ.
ބަޖެންދުރަގެ އޮޕަރޭޝަންތައް މީގެ އަހަރެއްހާ ދުވަސް ކުރިން ކުރަން ފެށީއްސުރެ ބަޖެންދުރަ އާއި ހަލީމާ އަދި އެމީހުންގެ ދަރިފުޅު ދިރިއުޅެމުންދަނީ ހޮސްޕިޓަލުގައި ބަޖެންދުރަ އޮންނަ ވޯޑުގަ އެވެ.
ބަޖެންދުރަ އަށް މި ބަލި އެންމެ ފުރަތަމަ ފާހަގަ ކުރެވުނީ ކަކުލަށް ލިބުނު އަނިޔާއަކަށް ފަހުގަ އެވެ. އެއީ އޭނާގެ ޓީންއޭޖް ދުވަސްވަރަށް ވާތީ ކަކުލުގައި އިން ތަންކޮޅެއް އެއީ މާ ބޮޑު ކަމަކަށް އޭނާ ނުހަދަ އެވެ. ނަމަވެސް ބޮޑުވަރުވަމުން ގޮސް 10 އަހަރުވީއިރު އޭނާ ނުކުޅެދޭ ހާލަތަށް ބަދަލުވާވަރަށް އެ އެއްޗެހިތައް ވަނީ އުފެދިފަ އެވެ.
އެޕިޑޯމިއާޑިސްޕްލޭސިއާ ވެރިޔުސްސިފޯމިސް އަކީ މަދުން ނަމަވެސް ޖެހޭ ވާރުތަވާ ބައްޔެކެވެ. މި ބަލީގެ ސަބަބުން ހަމުގައި ޓިއުމަރުތަކެއް ނަގަ އެވެ.
ދުނިޔޭގައި މިބަލި ޖެހިފައި ތިބި މަދު މީހުންގެ ތެރޭގައި ރޫމޭނިޔާގެ އިއޯން ޓޮއޭޑާ އާއި އިންޑޮނީޝިއާގެ ޑޭޑޭ ކޮސްވާރާ ނަމަކަށް ކިޔާ މީހަކު ހިމެނެ އެވެ. މީގެ ތެރެއިން ކޮސްވާރާ މިހާރު ވަނީ މަރުވެފަ އެވެ.
ބަލި މުޅިން ފަސޭހަވުމުން ބަޖެންދުރަ ގަސްތުކުރަނީ އޭނާއަށް އެ ރަށުގެ މީހުންނާއި ދުނިޔޭގެ އެކި ހިސާބުތަކުގެ މީހުން ކޮށްފައިވާ ޚައިރާތު ފައިސާއިން ކުޑަ ވިޔަފާރިއެއް ފެށުމަށެވެ.
"ތިން އަހަރުގެ ކުޑަކުޑަ އަންހެން ދަރިފުޅުގެ މުސްތަގްބަލަށްޓަކައި އަހަރެން ވަރަށް ކަންބޮޑުވި. މި ސުންޕާ ބަލި އެނބުރި ނާންނާނެކަމަށް އުންމީދުކުރަން،" ބަޖެންދުރަ ބުންޏެވެ.