13 ސެޕްޓެމްބަރ 2022 - 11:11
ވެރިކަން ލިބުމާ އެކު ކޮންމެ ވެރިޔަކު ވެސް ކޯލިޝަންގެ މަތިން ހަނދާން ނައްތާލާ ކަމަށާއި ރައީސް އިބްރާހިމް މުހައްމަދު ސޯލިހް އިންތިހާބުކުރަން އިއްތިހާދުވެ ހެދި އެއްބަަސްވުމުގެ 90 ޕަސެންޓް ކަންކަން ފުރިހަމަނުވާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް މިއަދު ވިދާޅުވެއްޖެ އެވެ.
މި ސަރުކާރު ހިންގާ ކޯލިޝަން އެކުލަވާލީ އެމްޑީޕީ އާއި ޖުމްހޫރީ ޕާޓީ އާއި އަދާލަތު ޕާޓީގެ އިތުރުން އެމްއާރުއެމް ހިމެނޭ ގޮތުންނެވެ. ކޯލިޝަންތައް ރޫޅުމުގެ ތަޖުރިބާ އިޔާދަވިޔަ ނުދޭން މި ޕާޓީތަކުގެ ލީޑަރުން އެއްބަސްވި ކަންތައްތަކެއް ހުއްޓެވެ. އޭގެތެރޭގައި ސަރުކާރުގައި ޕާޓީތައް ހިއްސާވާނެ ނިސްބަތް ކަނޑައަޅައި އިންތިހާބުތަކުގައި އެކުގައި ވާދަކުރުމާއި ކޯލިޝަން ވެރިކަމަށް ގާނޫނީ ބާރުވެރިކަން ދިނުން ހިމެނެ އެވެ.
އެކަމަކު ލީޑަރުންގެ ފަރާތްޕުޅުން ސޮއިކުރި އެއްބަސްވުމަށް އަމަލުކުރަން، ވެރިކަމުގެ ކުރީކޮޅު އެމްޑީޕީން ވަނީ ދެކޮޅު ހަދައިފަ އެވެ.
މި ހިތްހަމަނުޖެހުން ފާޅުކުރައްވައި ގާސިމް ރާއްޖެ ޓީވީގައި މިއަދު ވިދާޅުވީ އެއީ އަބަދުވެސް ސަރުކާރުތަކުން ކަން ކުރަމުންދާ ގޮތް ކަމަށެވެ. ކޯލިޝަނަކާ ނުލައި އެއްވެސް ބަޔަކަށް ވެރިކަމަށް ނާދެވޭ ހަގީގަތް ގަބޫލުކުރިއަސް ވެރިކަން ލިބުމާ އެކު ވައުދާއި އަހުދުތައް އިހްތިރާމް ނުކުރާ ކަމަށް އޭނާ ވިދާޅުވި އެވެ.
އޭނާ ވިދާޅުވީ މި ވެރިކަމުގައި މިހާތަނަށް ކޯލިޝަން އުވާނުލިޔަސް ވެރިކަން ކުރަމުން އަންނަނީ "ކޯލިޝަން އޮތުމެކޭ، ނެތުމެކޭ އެއްގޮތަށް" ކަމަށެވެ.
"ސަރުކާރުން [މި ކޯލިޝަން] ދަމަހައްޓާ... ނޫނެކޭ އަޅުގަނޑު ނުބުނަމޭ. ސަރުކާރަކުން އަދި ނުއެއް ބުނޭ، އެމްޑީޕީއަކުންނެއް ވެސް ރަސްމީ ސިފައެއްގައި ކޯލިޝަނެއް ނެތެކޭ ނުބުނޭ. އެކަމަކު ހަގީގަތަކީ އެއްބަސްވެފައި އޮތް އެއްބަސްވުމާ ގާތަކަށް 90 ޕަސެންޓް ވެސް އޮތީ ފުލް ފިލް ނުވެއޭ. ޓެން ޕަސެންޓް ފުލް ފިލްކޮށް މިދަނީ. އެއީ ސަރުކާރެއް އައީމަ އެކަން އޮންނަ ގޮތް،" އޭނާ ވިދާޅުވި އެވެ.
މިއީ، ގާސިމް ވިދާޅުވި ގޮތުގައި، ކޮންމެ ސަރުކާރެއްގައި ވެސް އޭނާ ތަޖުރިބާކުރައްވަން ޖެހިވަޑައިގަތް ކަމެކެވެ. އެކަމަކު ކޯލިޝަންގެ މި ވެރިކަން، ކުރީގެ ރައީސް މުހައްމަދު ނަޝީދާއި ކުރީގެ ރައީސް އަބްދުﷲ ޔާމީންގެ ސަރުކާރަށް ވުރެން ރަނގަޅު ކަމަށް ވިދާޅުވި އެވެ.
"އެހެން ނުބުނެ އެބަ ދަމަހައްޓާ. އެހެންވީމަ [ރައީސް] އިބްރާހިމް މުހައްމަދު ސޯލިހަށް އެގޮތުން ކްރެޑިޓް އަޅުގަނޑުމެން އެބަދޭންޖެހޭ. ކޮންމެވެސް މިންވަރެއްގެ. އެކަމަކު އެ ބޭފުޅާ ވެސް އެއްބަސްވެވަޑައިގެން ސޮއިކުރެއްވި ސޮއިކުރެއްވުމާ އެއްގޮތަކަށް، އޭގެ ކައިރިއަށް 90 ޕަސެންޓް މިދަނީ އެއްގޮތް ނުވެ."
މި ސަރުކާރު ހިންގާ ކޯލިޝަން "ނަމެއްގައި" އޮތް ކަމަށް ވިދާޅުވި އެވެ.
ގާސިމް ވިދާޅުވި ގޮތުގައި ކޯލިޝަން ޕާޓީތަކަށް މަގާމްތަކާއި ވަޒީފާތަކަށް ހަމަޖައްސަންވެގެން އެމްޑީޕީ ބާކީކޮށްފައިވާ ކަމަށް އެ ޕާޓީގެ އިސް ބޭފުޅުން ވިދާޅުވާ ވާހަކައިގައި ހަގީގަތެއް ނެތެވެ. މަގާމްތައް ގިނައީ އެމްޑީޕީގައި ކަން ފެންނަން އޮތް ކަމަށް ވިދާޅުވި އެވެ.
އޭނާ ވިދާޅުވީ ޖުމްހޫރީ ޕާޓީ އާއި އެމްއާރުއެމަށް ވެސް އެއްބަސްވި މިންވަރާ ގާތަކަށް ކަންކަން ފުރިހަމަވެފައި ނުވާ ކަމަށެވެ.
އެމްޑީޕީގެ އަރައިރުންބޮޑުވެ ކުރިއަށް އޮތް ރިޔާސީ އިންތިހާބަށް އެކަމުގެ އަސަރުކޮށްފާނެ ކަމަށް ދެއްކުމަކީ "ބޮޑު ޑްރާމާ"އެއްގެ ގޮތުގައި ގާސިމް ސިފަކުރެއްވި އެވެ. ރިޔާސީ ކެންޑިޑޭޓް ކަނޑައަޅާ ހިސާބުން އެ ބޭފުޅެއްގެ ފަހަތަށް މުޅި އެމްޑީޕީ އަރާނެ ކަމަށާއި އެއީ އެ ޕާޓީގެ ވެރިކަން ގެއްލެން ބޭނުން ނުވާނެތީ ކަމަށް ވިދާޅުވި އެވެ.
އެމްޑީޕީގެ ޕްރައިމަރީގައި ރައީސް އިބްރާހިމް މުހައްމަދު ސޯލިހް އާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވާދަކުރައްވާނެ ކަމަށް ކުރިން ވާހަކަ ދެކެވިފައި އޮތް ކަން ފާހަގަކުރައްވައި ވިދާޅުވީ ބޮޑަށް ބުރަވެވޭ ގޮތުގައި ޓިކެޓް ހޯއްދަވާނީ ރައީސް އިބްރާހިމް މުހައްމަދު ސޯލިހް ކަމަށެވެ.
އެ ހިސާބުން އެމަނިކުފާނުގެ ފަހަތްޕުޅުގައި ނަޝީދު ވެސް ހުންނަވާނެ ކަމަށް ގާސިމް ލަފާކުރައްވަ އެވެ.
ގާސިމް ވިދާޅުވި ގޮތުގައި ކުރިއަށް އޮތް ރިިޔާސީ އިންތިހާބުގައި ޖުމްހޫރީ ޕާޓީން ކޯލިޝަން ހެދުމާ ގުޅޭ ގޮތުން މިހާތަނަށް އެއްވެސް ސިޔާސީ ބޭފުޅަކާ ވާހަކައެއް ނުދައްކަވަ އެވެ. އެކަން ނިމިގެންދާނީ ޖުމްހޫރީ ޕާޓީގެ ކައުންސިލުން ނިންމާ ގޮތެއްގެ މައްޗަށް ކަމަށް ވިދާޅުވި އެވެ.