10 ސެޕްޓެމްބަރ 2022 - 09:16
ބާސެލޯނާ (ސެޕްޓެމްބަރު 10) - މި ހޫނު މޫސުމުގައި ކްލަބުގެ ފިކުރީ މުދާ ވިއްކައިގެން ހޯދި ފައިދާ އާއެކު، ލަ ލީގާ އިން ބާސެލޯނާ އަށް މި ސީޒަނުގައި ހަރަދުކުރަން ކަނޑައަޅާއިފައިވާ މިންވަރުން ގާތްގަނޑަކަށް 800 މިލިއަން ޔޫރޯ އިތުރު ކޮށްދީފި އެވެ.
ބާސެލޯނާ އިން ވަނީ ކުރިއަށް އޮތް 25 އަހަރަށް އެ ކުލަބުގެ ޑޮމެސްޓިކް ޓީވީ ރައިޓްސްގެ 25 ޕަސެންޓު ވިއްކާލުމުގެ އިތުރުން، ކުލަބުގެ މެމްބަރުންގެ ރުހުމާ އެކު ވަނީ ގާތްގަނޑަކަށް 700 މިލިއަން ޔޫރޯގެ އަގަކަށް ބާސާ ސްޓޫޑިއޯސްގެ 49 ޕަސެންޓު ހިއްސާ ވިއްކާލައިފަ އެވެ.
މިއާ އެކު ބާސެލޯނާ އިން ވަނީ މި ސީޒަނުގައި ރޮބާޓް ލެވަންޑޯސްކީ އާއި ރަފީނިއާ އަދި ޔޫލުސް ކޫންޑޭ ގަންނަން 150 މިލިއަން ޔޫރޯ ހޭދަކުރުމުގެ ފުރުސަތު ހޯދައިފަ އެވެ. ބާސާ އިން އަންޑްރެސް ކްރިސްޓެންސެން އާއި ފްރޭންކް ކެސިއޭ އާއި ހެކްޓާ ބެލެރިން އަދި މާކޮސް އޮލޮންސޯ ކުލަބަށް ގެނައީ ހިލޭ ޓްރާންސްފާގަ އެވެ.
ލަ ލީގާ އިން ބާސެލޯނާ އަށް ސީޒަނަކަށް ހަރަދުކުރުމަށް ހުއްދަ ދީފައިވާ މިންވަރު 96 މިލިއަން ޔޫރޯ އަށް ކުޑަކުރުމާ ގުޅިގެން އެޓީމަށް ވަނީ މިދިޔަ ސީޒަނުގައި ލިއޮނެލް މެސީ ދޫކޮށްލަން ޖެހިފަ އެވެ. އަދި ފަހުން މިދިޔަ ޖެނުއަރީ ގައި ވަނީ އެ މިންވަރު -144 ޔޫރޯ އަށް އިތުރަށް ކުޑަ ކޮށްފަ އެވެ. އެހެން ނަމަވެސް މި ކުރިއެރުމާ އެކު ލަ ލީގާ އިން ވަނީ މި ސީޒަނުގައި 656.5 މިލިއަން ޔޫރޯ ހޭދަކުރުމުގެ ހުއްދަ ބާސެލޯނާ އަށް ދީފަ އެވެ.
ބާސެލޯނާ އަށް ވުރެ ގިނައިން ލަ ލީގާގައި ހަރަދު ކުރުމުގެ ހުއްދަ އޮތީ ރެއާލް މެޑްރިޑަށެވެ. މި ސީޒަނުގައި ހަރަދުކުރަން ރެއާލް އަށް ހުއްދަ ދީފައި ވަނީ 683.5 މިލިއަން ޔޫރޯ އެވެ.
"ބާސެލޯނާގެ ލިމިޓަކީ 656 މިލިއަން ޔޫރޯއާ ހަމައަށް، އެ މީހުން އެ އަދަދު ވަރަށް ބޮޑަށް ބޭނުންވި. އެހެން ވެގެން ކުޅުންތެރިން ރަޖިސްޓްރީ ކުރުމުގެ މަސައްކަތްތައް އެންމެ ފަހު ވަގުތުގައި އެޓީމުން ކުރިއަށް ގެންދިޔައީ،" ލަ ލީގާގެ ރައީސް ހާވިއޭ ޓެބާސް ވިދާޅުވި އެވެ.
"އިތުރަށް މުދާ ނުވިއްކައި، އަންނަ ސީޒަނުގައި މި ލިމިޓު މިހާ ބޮޑު ނުވެދާނެ. ހަރަދުތަކުން ވެސް ގާތްގަނޑަކަށް 200 މިލިއަން ޔޫރޯ ކުޑަކުރަން ޖެހިދާނެ ކުޅުންތެރިން ވިއްކައިގެން ވެސް. އަހަރެންނަށް ހީވަނީ ބާސާގެ ނައިބު ރައީސް އެޑުއާޑް ރޮމެއޫ ހާމަ ކުރިހެން، އެމީހުން ބޭނުންވަނީ ގާތްގަނޑަކަށް 400 ޔޫރޯގައި ލިމިޓު ހިފަހައްޓަން ކަން. އެކަމަކު އެމީހުންނަށް އެނގޭނެ މިހާރު ހުއްދަ ދީފައިވާ ލިމިޓުގައި ހިފާއްޓާލަން އެމީހުނަށް އުނދަގޫ ވާނެ އަންނަ ސީޒަނާ ކުރިމަތި ލާއިރު."
މީގެ އިތުރުން ޓެބާސް ވިދާޅުވީ ބާސެލޯނާ އަށް ވަކި ހާއްސަ ދީލަތިކަމެއް ދައްކާފައި ނުވާނެ ކަމަށާއި، ސްޕެއިންގެ ހުރިހާ ކުލަބަކަށް ވެސް ކަންކަން ކޮށްދެނީ އޮންނަ އުސޫލުގެ ދަށުން އެއްވެސް ތަފާތުކުރުމެއް ނެތި ކަމަށެވެ. އަދި ބާސެލޯނާ އިން ކޫންޑޭ ރަޖިސްޓްރީ ކުރަން ޓީމުގެ ރައީސް ޔޮއާން ލަޕޯޓާގެ ޕާސަނަލް ގެރެންޓާއެއްގެ ބޭނުން ވެސް ކުރަން ޖެހުނު ކަމަށް ޓެބާސް ވިދާޅުވި އެވެ.
"އަހަރެންގެ ނަޒަރުގައި ބާސެލޯނާ ބަނގުރޫޓުވުމަށް ފުރުސަތެއް ނެތް. ކުޅުންތެރިންގެ މުސާރަ، ކުލަބުގައި ބޮޑު ނަމަވެސް މުސާރަތައް ހަމަޖައްސާފައި ވަނީ ވަރަށް އިންސާފުވެރިކޮށް. ހަމައެއާ އެކު ކުޅުންތެރިންގެ މުސާރަ އިތުރަށް ކުޑަ ކުރަން ޖެހިފައި ވާކަމަށް ރޮމެއޫ ވަނީ އެއްބަސް ވެފައި."
ބާސެލޯނާ އާއި ރެއާލް މެޑްރިޑަށް ފަހު، ލަ ލީގާ ގައި އެންމެ ގިނައިން ހަރަދުކުރުމުގެ ހުއްދަ އޮންނަނީ އެތުލެޓިކޯ މެޑްރިޑަށެވެ. އެތުލެޓިކޯ އަށް ހަރަދުކުރުމުހެ ހުއްދަ ލިބިފައި ވަނީ 341 މިލިއަން ޔޫރޯ އެވެ. މިއީ ބާސާ އާއި ރެއާލްގެ ލިމިޓުގެ ގާތްގަނޑަކަށް ދެބައިކުޅަ އެއްބައެވެ. ސެވިއްޔާ އަށް 200 މިލިއަން ޔޫރޯގެ ލިމިޓެއް ހަމަޖައްސާފައި ވާއިރު، 151 މިލިއަން ޔޫރޯގެ ލިމިޓަކާ އެކު ފަސްވަނައިގައި އޮތީ ވިޔަރެއާލް އެވެ.
ލަލީގާގައި ހަރަދުތަކަށް އެންމެ ކުޑަ ލިމިޓެއް ހަމަޖެހިފައި އޮތީ ގިރޯނާ އާއި އެލްޗޭ އަށެވެ. ދެ ޓީމުގެ ލިމިޓކީ ވެސް ގާތްގަނޑަކަށް 42 މިލިއަން ޔޫރޯ އެވެ.