01 ސެޕްޓެމްބަރ 2022 - 11:08
މާލެއިން ފުރައިގެން ނ. އަތޮޅަށް ދަތުރުކުރަނިކޮށް، އިއްޔެ ހެނދުނު ލަންދޫ ބޯޓު ފަރު މައްޗަށް އަރުވާލަން ޖެހުނީ ގިނަ އަދަދެއްގެ މުދާ ބޯޓުގައި ހުރުމުން ސަލާމަތްކުރުމަށް ކަމަށާއި އެ ހާދިސާގައި ބޯޓަށް ލިބުނު ގެއްލުމުގެ އަގު 8 މިލިއަން ރުފިޔާ އަށް އަރާނެ ކަމަށް ދޯނީގެ ވެރިފަރާތުން ބުނެފި އެވެ.
އެ ދޯނީގެ ވެރިޔާގެ ދަރިފުޅު އަދި ބޯޓުގެ ކަންކަމާ ހަވާލުވެ ހުރި އިބްރާހިމް ސައުދު، "މިހާރު" އަށް ބުނި ގޮތުގައި މީގެ 13 ވަރަކަށް އަހަރު ކުރިން މާލެއާ ދެމެދު ދަތުރުކުރަން ފެށި އެ ބޯޓުގެ އަގަކީ ވެސް 7.8 މިލިއަން ރުފިޔާ އެވެ.
އެ ދަތުރުގައި ލަންދޫގެ އިތުރުން މަނަދޫ އާއި މާފަރު އަދި މާޅެންދު އަށް ބޭނުންވާ ގިނަ އަދަދެއްގެ މުދާ ބޯޓަށް ބަރުކޮށްފައި އޮތެވެ.
"ގެދޮރު ހެދުމަށް ބޭނުންވާނެ ސާމާނާ ދިރިއުޅުމަށް ބޭނުންވާނެ ހުރިހާ ވައްތަރެއްގެ އެއްޗެހި ބޯޓަށް ބަރުކޮށްފައި އޮތް. އެ މުދާތަކުގެ އަގާއި ބޯޓުގެ އަގާއެކު ބޮޑު ގެއްލުމެއް ލިބުނު."
ސައުދު ބުނީ، އެ ބޯޓަކީ އިންޝުއަރެންސް ކޮށްފައި އޮންނަ ބޯޓަކަށް ވިޔަސް އެ ހާދިސާ ހިނގިއިރު އޭގެ މުއްދަތު އޮތީ ހަމަވެފައި ކަމަށެވެ.
ހާދިސާ ހިނގި ވަގުތު ބޯޓު ދުއްވަން އިން އޭނާގެ ބައްޕައާ ހަވާލާދީ ސައުދު ކިޔައިދިން ގޮތުގައި އެ ހާދިސާ ހިނގާފައި ވަނީ ބޯޓުގެ އިންޖީނަށް ދިމާވި މައްސަލައެއް ހައްލުކޮށްގެން ފުރިތާ މާގިނަ އިރުތަކެއް ނުވެ އެވެ.
"އިންޖީނުގެ މައްސަލައެއް ދިމާވެގެން އެ މައްސަލަ ހައްލުކޮށްގެން ފުރީ، ތަންކޮޅެއް ދިޔަވަރު ހިކިފައި އޮތީމަ ތަންކޮޅެއް ރަނގަޅުވާނެ ކަމަށް ބަލައިގެން. އެކަމަކު ހަތަރު ވަރަކަށް މޭލަށް ދަތުރުކުރި ފަހުން ގަދަވީ. ނެގި ރާޅެއްގައި ބޯޓުގެ ކުރީކޮޅުން ތަންކޮޅެއް ބިންދައިގެންދިޔައީ."
ސައުދު ބުނީ ވަކި ހިސާބަކަށް ދަތުރުކުރިތަނާހެން ކުއްލިއަކަށް ވަރަށް ބޮޑަށް ގަދަވުމުން އޭނާގެ ބައްޕަ މަސައްކަތްކުރީ ބޯޓު އަނބުރާލާފައި ގާފަރު ފަޅަށް ވައްދަން ކަމަށެވެ. އެކަމަކު އޭގެ ކުރިން ބޯޓު ދިޔަވެ އިންޖީނުން އެލާމް އަޅަން ފެށުމުން އެ ހިސާބަށް ނުދެވޭނެކަން ޔަގީންވެ، ގާފަރު ފަރަށް ބޯޓު އަރުވާލީ މީހުންނާއި މުދާ ރައްކާކުރެވޭނެ ހަމައެކަނި ގޮތަކީ އެއީ ކަމަށްވާތީ ކަމަށް ސައުދު ބުންޏެވެ.
"އެލާމް އަޅަން ފެށީމަ އެނގިއްޖެ ދެން އެ ހިސާބަށް ނުދެވޭނެކަން. ސީދާ ކަނޑު އެތެރެއަށް ބޯޓު އަޑިއަށް ގޮސްފިއްޔާ މީހުންނާއި މުދާތައް ވެސް އެއްކޮށް ސަލާމަތް ކުރަން އުނދަގޫވާނެތީ ފަރު މައްޗަށް ބީއްސާލަން ޖެހުނީ."
އެ ހާދިސާ ހިނގިއިރު ބޯޓުގައި ތިރީހަކަށް މީހުން ތިއްބެވެ. އޭގެ ތެރޭގައި ހިމެނެނީ 11 ބިދޭސީންނާއި ދިވެހިންނެވެ. އެ އެންމެން ސަލާމަތުން ގާފަރަށް ގެންދިޔައީ އެ ރަށުގެ މީހުންނާއި އެ ސަރަހައްދުން ދަތުރުކުރި އެހެން އުޅަނދުތަކުންނެވެ. އެ އެންމެންގެ ހާލު ވެސް ރަނގަޅެވެ.
އެ ހާދިސާ ހިނގިއިރު ލަންދޫގައި ހުރި ސައުދު އާއި އެރަށުގެ ރައްޔިތުންތަކެއް ވަނީ ބޯޓު ފުންކުރުމުގެ މަސައްކަތަށް ގާފަރަށް ގޮސްފަ އެވެ.
"ބޯޓު ފުންކުރުމުގެ މަސައްކަތް ފަށައިގެން މިއުޅެނީ. އެއިން ބައެއް ވިޔަފާރިވެރިންގެ މުދާ އަދިވެސް ސަލާމަތްކުރެވޭނެހެން ހީވާތީ އެ މަސައްކަތް ފަށަން މިހާރު މިއުޅެނީ." ގާފަރު ފަޅު ކައިރީ ބޯޓު ފުންކުރަން ގޮސް ހުރި ސައުދު ބުންޏެވެ.
ދޯނި ނަގައި އޭގެ އެކި ބައިތައް ބޭނުންކުރެވޭނެކަމަށް އެމީހުން އުއްމީދުކުރެ އެވެ. ވަރަށް އަވަހަށް ދަތުރުތައް އަލުން ފެށޭތޯ މަސައްކަތްކުރާނެ ކަމަށް ވެސް ސައުދު ބުނެ އެވެ.
ބޯޓު އަޑިއަށް ގޮސް އޭގައިވާ މުދާތައް ސަލާމަތްކުރުމުގެ މަސައްކަތްކުރަމުން އަންނައިރު ބައެއް މުދާތައް އޮޔާވެސް ދިޔަ އެވެ. ސައުދު ބުނި ގޮތުގައި އެ ދަނޑިވަޅުގައި ރިސޯޓެއްގެ ދޯންޏަކުން ވަަނީ އެ ދޯނީގެ މުދާތައް ވަގަށް ނަގައިގެން ވެސް ގޮސްފަ އެވެ.
މި ދުވަސްވަރަކީ ރާއްޖޭގެ މޫސުން ވަރަށް ގޯސް ދުވަސްވަރެކެވެ. މޫސުމާ ބެހޭ އިދާރާއިން ހއ. އިން ތ. އަތޮޅާ ހިސާބަށް އިއްޔެ ނެރުނު ވައިޓް އެލާޓް ވެސް ވަނީ މިއަދު 1:30 ހަމައަށް ދަންމާލައިފަ އެވެ. ވިލާގަނޑުގައި ގާތްގަނޑަކަށް 45 މޭލަށް ވައިގަދަވެ، ކަނޑުތައް ވަރަށް ގަދަވާނެ ކަމަށް މެޓުން ލަފާކުރެ އެވެ.