31 އޯގަސްޓް 2022 - 09:07
ޖުމްހޫރީ ޕާޓީ (ޖޭޕީީ) ގައި ކުރިން ތިބުމަށް ފަހު، އެކި ސަބަބުތަކާ ހުރެ މިހާރު ދުރުގައި ތިބި މީހުންނަށް ވެސް އެ ޕާޓީ އޮތީ ހުޅިވިފައިވާ ކަމަށާއި އެ މީހުންނަށް މަރުހަބާ ކިޔާނެ ކަމަށް ޖޭޕީގެ ޑެޕިއުޓީ ލީޑަރު އަމީން އިބްރާހިމް ރޭ ވިދާޅުވެއްޖެ އެވެ.
އެ ޕާޓީން ބޭއްވި މީޑިއާ ބްރީފިންއެއްގައި އޭނާ ވިދާޅުވީ ޖޭޕީއަކީ އެ ޕާޓީ އަށް އެހީތެރިކަން ފޯރުކޮށްދޭ މީހުންނަށް އަބަދުވެސް މަރުހަބާ ކިޔާ ބައެއް ކަމަށެވެ.
"ކުރިން [ޖޭޕީގައި] މަސައްކަތް ކުރައްވާފައި، ދޭތެރެއަކުން އަޅުގަނޑުމެންނާއެކު މަސައްކަތް ކުރައްވަން ދަތިފުޅުވެގެން ނޫނީ އެހެން ގޮތަކުން ވެސް އަޅުގަނޑުމެންނާ ތަންކޮޅެއް ދުރަަށް ވަޑައިގެންފައި، އަލުން އަނބުރާ އަޅުގަނޑުމެންނާއެކު މަސައްކަތް ކުރައްވަން ބޭނުންފުޅުވާ ހަމަ ކޮންމެ ބޭފުޅަކަށް ޕާޓީގެ ޕްލެޓްފޯމު އޮތީ ހުޅުވިފައި. ޕާޓީގެ ދޮރުތައް ވަނީ ހުޅުވިފައި،" މޭ ޑޭގެ މުޒާހަރާއާ ގުޅިގެން 2015 އިން ފެށިގެން އިނގިރޭސި ވިލާތުގައި އަރުވާލެވިގެން ހުންނެވުމަށް ފަހު، މިދިޔަ ހަފުތާގައި ރާއްޖެ ވަޑައިގެން ޖޭޕީގެ މަސައްކަތުގައި އަމަލީ ގޮތުން އުޅުއްވާ އަމީން ވިދާޅުވި އެވެ.
އޭނާ ވިދާޅުވިގޮތުގައި، ޖޭޕީގެ ލީޑަރު ގާސިމް އިބްރާހިމަކީ ހުރިހާ އެންމެންނާއެކު ވެސް މަސައްކަތް ކުރެއްވޭނެ އަދި އެ ކަމަށް ގާބިލް ބޭފުޅެކެވެ.
"އެހެންވީމާ އަޅުގަނޑުމެންގެ ޕާޓީގައި މަސައްކަތް ކުރައްވާ، ދެން ތިއްބެވި ހުރިހާ ބޭފުޅުން ވެސް ހަމަ އެ މަނިކުފާނުގެ އެ ވިސްނުންފުޅު ކުރިއަށް ގެންދެވޭތޯ، އެ ގޮތަށް މަސައްކަތް ކުރިއަށް ގެންދެވޭތޯ ބަލަމާ. އަޅުގަނޑުމެންނަށް ނުރައްޓެހި، ބީރައްޓެހި ބަޔަކު ނޫޅޭނެ. އަޅުގަނޑުމެންނަކީ ހުރިހާ އެންމެންނާ ވެސް ރައްޓެހި، ގާތް، ރަހުމަތްތެރި ބައެއް،" ކުރީގެ ޓްރާންސްޕޯޓް މިނިސްޓަރުކަން ވެސް ކުރެއްވި އަމީން ވިދާޅުވި އެވެ.
އޭނާގެ ވާހަކައިގައި ވަނީ ޖޭޕީގައި ކުރިން މަސައްކަތްކުރި އެންމެން ވެސް އަލުން ގުޅެން ބޭނުން ނަމަ އެ ފުރުސަތު އޮތްކަން ތަކުރާރުކޮށް ވިދާޅުވެފަ އެވެ.
އަމީން ވިދާޅުވީ، ގާސިމްގެ ސިގްނަލެއްގެ އިންތިޒާރުގައި މިހާރު ވެސް އެތައް ބަޔަކު އެކި ރަށްރަށުގައި އެބަތިބި ކަމަށެވެ. އެއީ މީގެ އެތައް އަހަރެއް ކުރިން، ދެގޮތެއް ނުވެ ޖޭޕީގައި ތިބި ބައެއް ކަމަށް އޭނާ ވިދާޅުވި އެވެ.
"...ހާއްސަކޮށް މި ހުރިހާ ދުވަހު އަޅުގަނޑުމެންނާއެކު ތިއްބެވި ބޭފުޅުންނަށް، ޖުމްހޫރީ ފިކުރުގައި ދެމިތިއްބެވި ބޭފުޅުންނަށް، ޖުމްހޫރީ ޕާޓީގެ އެކި މަސައްކަތްތަކަށް ޝައުގުވެރިވާ ބޭފުޅުންނަށް، ޕާޓީގެ އެކި ކަންކަމުގައި މީގެ ކުރިން ވެސް އެހީތެރިކަން ފޯރުކޮށްދެއްވާ އަދި ކުރިއަށް އޮތްތާނގައި ވެސް އަޅުގަނޑުމެންނާއެކު ކުރިއަށް ވަޑައިގަތުމުގެ ރޫހު ހުރި ހުރިހާ ބޭފުޅުންނަށް އަޅުގަނޑުމެން މިރޭ މި ދަންނަވަނީ އަޅުގަނޑުމެންގެ ޕާޓީ އާ ރޫހަކާއެކު މަސައްކަތް މި ފަށައިގަތީއޭ،" އަމީން ވިދާޅުވި އެވެ.
"އެހެންވީމާ ހުރިހާ ބޭފުޅުން ވެސް އަޅުގަނޑުމެންނާއެކު މި މަސައްކަތުގައި ބައިވެރިވެވަޑައިގަންނަވާށޭ."
ޖޭޕީން މިހާރު މަސައްކަތް ކުރަނީ އެ ޕާޓީގެ ކޮންގްރެސް އަންނަ ޑިސެމްބަރުމަހު ބޭއްވުމަށެވެ. ރަށްރަށުގެ ގޮފިތައް އެކުލަވައިލުމާއި އެހެނިހެން ތައްޔާރީތައް ވެސް އެ ޕާޓީން މިހާރު އަންނަނީ ކުރަމުންނެވެ.
ޖޭޕީގެ ޑެޕިއުޓީ ލީޑަރު އަދި ފިޝަރީޒް މިނިސްޓަރު ޑރ. ހުސައިން ރަޝީދު ހަސަން ވިދާޅުވީ، އިލެކްޝަންސް ކޮމިޝަންގެ ދަފްތަރަށް އެކަނި ބަލާ ނަމަ އެ ޕާޓީގެ މެމްބަރުންގެ އަދަދު މަދުކޮށް ފެނުނަސް އިނގިލީގެ ނިޝާން ނުޖެހިގެން ޕާޓީއާ ނުގުޅިފައި ތިބީ ވެސް ޖޭޕީގެ މެމްބަރުން ކަމަށެވެ.
"އެ ބޭފުޅުން އަބަދުމެ އަޅުގަނޑުމެންނަށް ދެއްވާ ތާއީދަށްޓަކައި މިރޭ ވެސް އަޅުގަނޑު ޝުކުރު އަދާކުރަން،" އޭނާ ވިދާޅުވި އެވެ.