29 އޯގަސްޓް 2022 - 18:31
ވެލާނާ އިންޓަނޭޝަނަލް އެއާޕޯޓުން ދެ ބިދޭސީއަކު ހައްޔަރުކުރީ އެ މީހުން ގެންގުޅުނު ލަގެޖެއް އެއާޕޯޓްތެރެއަށް ދޫކޮށްލާފައި އޮތުމުން އެ ބަލައި ފާސްކުރި އިރު ދަބަހުގައި އޮތް ގަމީހަކުން ބަޓަން ކެމެރާއެއް ފެނިގެން ކަމަށާއި އެ މީހުންގެ ބަންދަށް ކްރިމިނަލް ކޯޓުން 10 ދުވަސް ދީފައިވާ ކަމަށް ފުލުހުން ބުނެފި އެވެ.
ފުލުހުން ބުނީ އެއާޕޯޓުގައި ފުލުހުން ހަރަކާތްތެރިވީ ވެރިއަކު ނެތި ދޫކޮށްލާފައިވާ ލަގޭޖެއް ހުރި ކަމަށް ރިޕޯޓްކުރުމުން ކަމަށެވެ.
އެ ލަގެޖުގައި އޮތް ގަމީހެއްގައި ބަޓަން ކެމެރާއެއް އިންކަން އެނގުމާ އެކު ލަގެޖް ބެހެއްޓީ ކާކުކަން ބެލުމަށް ފަހު، އިތުރު ބައެއްކަންކަން ސާފުކުރުމަށް އެ ލަގޭޖާ ގުޅުންހުރި ދެ ބިދޭސީން ހައްޔަރުކުރީ ކަމަށް ފުލުހުން ބުންޏެވެ. އެނގިފައިވާ ގޮތުގައި އެއީ އިންޑިއާ ދެ މީހުންނެވެ.
އެ މައްސަލަ ތަހުގީގުކުރަމުންދާތީ އެކަމާ ގުޅޭ ތަފްސީލެއް ފުލުހުން ނުދެ އެވެ.