24 އޯގަސްޓް 2022 - 21:17
ޖިނާއީ މައްސަލަތަކުގައި ތުހުމަތުކުރެވޭ މީހުންނާ މެދު އަނިޔާވެރި އަމަލުތައް ހިންގުމަކީ ވަރަށް ކަންބޮޑުވާ ކަމެއް ކަމަށާއި އެފަދަ ކުށްތައް ކުރާ މީހުންގެ މައްސަލަތައް ވެސް ބަލާ ފިޔަވަޅު އަޅާނެ ކަމުގެ އިންޒާރު ފުލުހުން ދީފި އެވެ.
ފުލުހުން އެގޮތަށް ބުނެފައި ވަނީ ކުއްޖަކަށް ޖިންސީ ގޯނާކުރި ކަމަށް ބުނެ ހިޔާ ފްލެޓްތައް ކައިރީ ރުކެއްގެ ދޮށުގައި މީހަކު ބަހައްޓާ އޭނާއާ ދިމާލަށް އެއްޗެހި ގޮވައި، އަތްފައިން އޭނާގެ ގައިގައި ތަޅާ ވީޑިއޯއެއް ރޭ އާންމު ވެފައިވަނިކޮށެވެ.
އޭނާ ކުއްޖާއާ ބެހުނު ކަމަށް އެއްބަސްވުމަށާއި އެކަން ހިނގި ގޮތް ކިޔައިދިނުމަށް ގޮވަމުން އެ މީހާގެ ގައިގައި ތަޅާ ވީޑިއޯ އާންމުވެފައިވަނިކޮށް ފުލުހުން ބުނީ ކުށަށް އަރައިގަންނަ ފަރާތްތަކާއި މައްސަލަތަކުގައި ތުހުމަތުކުރެވޭ ފަރާތްތަކުގެ މައްސަލަތައް ތަހުގީގުކޮށް އަދަބު ދެވޭނެ ގޮތްތައް ގާނޫނުތަކާއި ގަވާއިދުތަކުގައި ކަނޑައަޅާ ބަޔާންކޮށްފައިވާ ކަމަށެވެ.
އެކަމަކު އިންސާފު ހޯދުމަށް ކަމަށް ބުނެ ޖިނާއީ މައްސަލަތަކުގައި ތުހުމަތުކުރެވޭ މީހުންނާ މެދު ރާއްޖޭގެ ގާނޫނުތަކާ ހިލާފު އަނިޔާވެރި އަމަލުތައް ހިންގުމަކީ ފުލުހުން ވަރަށް ކަންބޮޑުވާ އަދި މުޖުތަމައުގެ މަސްލަހަތު ވެސް ގެއްލިގެންދާ މައްސަލަތަކެއް ކަމަށް ފުލުހުން ބުންޏެެވެ.
އެކަން ތަކުރާރުނުކުރުމަށް އިލްތިމާސްކޮށް ފުލުހުން ވަނީ އެފަދަ ކުށްތައް ހިންގާ ފަރާތްތަކުގެ މައްސަލަ ތަހުގީގުކޮށް ގާނޫނީ ފިޔަވަޅު އަޅާނެ ކަމުގެ އިންޒާރުދީފަ އެވެ.
މިފަހަކަށް އައިސް އާންމުން ނިކުމެ ތުހުމަތުކުރެވޭ މީހުންނަށް އަނިޔާކޮށްފައި ވަނީ ޖިންސީ ގޯނާގެ މައްސަލަތަކާއި ވައްކަމުގެ މައްސަލަތަކާ ގުޅިގެންނެވެ.
އެފަދަ މައްސަލަތަކާ ގުޅިގެން ތުހުމަތުކުރެވޭ މީހުން ބަރަހަނާކޮށް އެކި މީހުންނަށް ވަރަށް ބޮޑަށް އަނިޔާކޮށްފައި އެބަ ހުއްޓެވެ.