25 އޯގަސްޓް 2022 - 16:13
ރައީސް އިބްރާހިމް މުހައްމަދު ސޯލިހު، އަންނަ ހޮނިހިރު ދުވަހު މ. އަތޮޅަށް ވަޑައިގަންނަވަން ނިންމަވައިފި އެވެ.
ބައެއް މަޝްރޫއުތައް ފެށުމަށާއި ނިމުން ފާހަގަކުރުމަށް ދެ ދުވަހަށް ކުރައްވާ މި ދަތުރުފުޅުގައި ރައީސް ވަޑައިގަންނަވާނީ ދިއްގަރު ދާއިރާގައި ހިމެނޭ ފަސް ރަށަށެވެ. އެއީ، ދިއްގަރުގެ އިތުރުން ރަތްމަންދޫ، މަޑުއްވަރީ، ވޭވަށް އަދި މުލި އެވެ.
އެގޮތުން، އަންނަ ހޮނިހިރު ދުވަހު އެ މަނިކުފާނު އެންމެ ފުރަތަމަ ވަޑައިގަންނަވާނީ ރަތްމަންދު އަށެވެ. އެންމެ ފަހު މަންޒިލެއްގެ ގޮތުން މުއްޔަށް ވަޑައިގެން އަންނަ އާދިއްތަ ދުވަހު ރައީސް މާލެ ވަޑައިގަންނަވާނެ އެވެ.
އެ ރަށްރަށަށް ވަޑައިގެން ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ އަދި ރައްޔިތުންނާ ބައްދަލުކުރައްވާނެ އެވެ.
އެކި ކަންކަމުގައި އާއްމުންގެ ހިޔާލު ހޯދުމަށް މި ސަރުކާރުން ކުރިއަށްގެންދާ "ޖަޒީރާ ހޮޅުއަށި" ގެ ބައްދަލުވުމެއް އަންނަ މަހު ލ. އަތޮޅުގައި ބާއްވަން ވެސް ސަރުކާރުން ވަނީ ނިންމައިފަ އެވެ.