22 އޯގަސްޓް 2022 - 13:22
މަސްތުވާތަކެތީގެ ބޮޑެތި ދައުވާތަކެއް ލިބޭ ރެޕް ލަވަކިޔުންތެރިޔާ އިސްމާއިލް އިފްހާމް މުހައްމަދު (ޕެސްޓް) އާ ދެކޮޅަށް ފުލުހުން ހެކީގެ ގޮތުގައި ހުށަހެޅި ބޭންކް ސްޓޭޓްމަންޓް ހޯދާފައިވަނީ ގާނޫނާ ހިލާފަށް ކަމަށް ކްރިމިނަލް ކޯޓުން ނިންމި ނިންމުން ހައި ކޯޓުން ބާތިލްކޮށް އެ ސްޓޭޓްމަންޓް ހެކީގެ ގޮތުގައި ބަލައިގަތުމަށް އަންގައިފި އެވެ.
މިގޮތަށް ނިންމީ ފަނޑިޔާރު މުހައްމަދު ނިޔާޒް، ފަނޑިޔާރު ޝުއައިބް ހުސައިން ޒަކަރިއްޔާ އަދި ފަނޑިޔާރު ފާތިމަތު ފަރުހީޒާގެ އިއްތިފާގުން އިއްވި ހުކުމުގަ އެވެ.
ޕެސްޓާއި އެ މައްސަލައިގައި ދެން ދައުވާ ލިބޭ ހަތަރު މީހުންގެ ބޭންކް ސްޓޭޓްމަންޓްތައް ހޯދީ މަސްތުވާތަކެއްޗާ ބެހޭ ގާނޫނާ ހަވާލާދީ ކަމަށް ވިޔަސް، އެ ގާނޫނުގައި އެ ގޮތަށް ބޭންކް ސްޓޭޓްމަންޓް ދިނުމަށް އެންގުމުގެ ބާރު ފުލުހުންނަށް ނެތް ކަމަށް ކްރިމިނަލް ކޯޓުން އޮތީ ނިންމައިފަ އެވެ.
މި ނިންމުން ދައުލަތުން އިސްތިއުނާފް ކުރުމުން ހައި ކޯޓުން ނިންމީ ހެކި ހޯދާފައިވަނީ ޕެސްޓުގެ ބޭންކް ސްޓޭޓްމަންޓް ހޯދީ ގާނޫނާ ހިލާފަށް ކަމަށް އެނގެން ނެތް ކަމަށެވެ. ހުކުމުގައި ވަނީ ބޭންކިން ގާނޫނުގައި ބުނާ "ކަސްޓަމަރުންގެ އެކައުންޓްތަކާ ބެހޭ އެއްވެސް މައުލޫމާތެއް" ގެ މާނައިގެ ތެރޭގައި އެކައުންޓް ސްޓޭޓް މަންޓް ނުހިމެނޭ ކަމަށެވެ.
ޕެސްޓު ހައްޔަރު ކުރިއިރު، ވޮލެޓުގެ ތެރެއިން 24،580ރ. ފެނުނު ކަމަށް ދައުލަތުން ބުނެފައިވެ އެވެ. އަދި މަސްތުވާތަކެތީގެ ވިޔަފާރިކުރަން ބޭނުން ކުރި ކަމަށް ބުނާ ގެއަކުން ފެނުނު ކަރުދާސް ފޮއްޓަކުން 14،000ރ. ފެނުނު ކަމަށް ވެސް ބުންޏެވެ.
މެތެމްފެޓަމިން ރެސިމޭޓް (މެތު) ވެސް މި މައްސަލާގައި ފާސްކުރި ގެއެއްގެ އަލަމާރިއެއްގެ ތެރެއިން ފެނުނެވެ. ކަރުދާސްކޮޅެއްގައި ހުރި ދެ ޖޫސްޕެޓީ ކޮތަޅަކުން 199 ގްރާމުގެ މެތު ފެނިފައިވާ ކަމަށާއި ހަމަ އެތަނުން ފެނުނު 10 ރަބަރު ޕެކެޓުގައި 49 ގްރާމް މެތު ފެނިފައިވާ ކަމަށް ދައުލަތުގެ ވަކީލުން ވިދާޅުވި އެވެ.
ޕެސްޓުގެ އިތުރުން އެ މައްސަލައިގައި ދެން ދައުވާކޮށްފައިވާ ލ. ގަން، ތުނޑި، އަބަދަށްއުފާ މުހައްމަދު ސުއިއަދުގެ މައްޗަށް ޑްރަގް ޓްރެފިކިންގެ ތިން ދައުވާއެއް އުފުލާފައިވެ އެވެ. އެއީ ކެނަބިސް ޓްރެފިކް ކުރުމުގެ ދައުވާ އާއި ޑައިމޯފިން ޓްރެފިކް ކުރުމުގެ ކުށުގެ ދައުވާގެ އިތުރުން ޖަދުވަލު އެކެއްގައިވާ މަސްތުވާއެއްޗެއް ޓްރެފިކް ކުރުމުގެ ދައުވާ އެވެ. އޭގެ އިތުރުން ކެނަބިސް ބޭނުން ކުރުމުގެ ދައުވާ އާއި ކުށްކޮށްގެން ހޯދާފައިވާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރު ކުރުމުގެ ދައުވާ ވެސް އުފުލި އެވެ. ކުށް ކޮށްގެން ހޯދާފައިވާ ފައިސާގެ ދައުވާ އެ ދެ މީހުންގެ އިތުރުން ލ. ގަން، ތުނޑި ހަނދުވަރީހިޔާ އަހުމަދު ޝަމްއޫންގެ މައްޗަށް ވެސް ކުރެ އެވެ.
ޕެސްޓާއި ސުއައިދަށް ކެނަބިސް ޓްރެފިކް ކުރުމުގެ ދައުވާ އުފުލާފައިވާއިރު، ފުލުހުން ހޯދި ކެނަބިސްގެ ޖުމުލަ ބަރުދަން އެއް ކިލޯއަށް ވުރެ ގިނަ އެވެ. އޭޭގެ އިތުރުން ޕެސްޓާއި ސުއައިދު ބޯޓަކަށް އެރުވި ކަމަށް ބުނާ ފަންކާއެއްގެ ތެރޭގައި ރަބަރު ޕެކެޓަކަށް އެހެން ރަބަރު ޕެކެއްޓެއް ލައި ފޮރުވާފައި ހުރި 242 ގްރާމުގެ ކެނަބިސް ފެނިފައިވެ އެވެ.
އެ ދެ މީހުންގެ މައްޗަށް ޑައިމޯފިން ޓްރެފިކް ކުރުމުގެ ކުށުގެ ދައުވާ ކުރީ ހެރޮއިން ވިއްކި ކަމުގެ ތުހުމަތުގަ އެވެ. ކަބަޑެއްގެ ތެރެއިން ފެނުނު ޖޫސްޕެޓީ ކޮތަޅުތަކެއްގައި ގާތްގަނޑަކަށް 400 ގްރާމުގެ ހެރޮއިން ފެނިފައިވެ އެވެ.
ޓްރެފިކިންގެ ތިން ދައުވާ ކޮށްފައިވާއިރު އެއިން ކޮންމެ ދައުވާއެއްގެ ވެސް އަދަބަކީ އުމުރަށް ޖަލަށްލުމާ އެކު 100،000 އިން ފެށިގެން 10 މިލިއަން ރުފިޔާގެ އަދަދަކުން ޖޫރިމަނާ ކުރުމެވެ.