08 ޖޫން 2016 - 03:10
އޭޝިއަން ކަޕް ކޮލިފައިން ޕްލޭ އޮފްގެ ދެ ވަނަ ލެގުގައި މިރޭ ޔަމަން އަތުން 2-0 އިން ބަލިވެ ރާއްޖެ އަށް ކޮލިފައިން ގްރޫޕް ސްޓޭޖުން ފުރުސަތު ނުލިބި ޕްލޭ އޮފް ދެ ވަނަ ބުރުގައި ވާދަކުރަން ޖެހިއްޖެ އެވެ.
ފުރަތަމަ ލެގުން ވެސް ޔަމަން 2-0 އިން މޮޅުވިއިރު ދެ ލެގުގެ އެގްރިގޭޓުން 4-0 އިން ކުރި ހޯދައި ޔަމަން ވަނީ ކޮލިފައިން ގްރޫޕް ސްޓޭޖުން ޖާގައެއް ހޯދައިފަ އެވެ. ޕްލޭ އޮފް ދެ ވަނަ ބުރުގައި ރާއްޖެ ނުކުންނާނީ ޕްލޭ އޮފް ފުރަތަމަ ބުރުން އިންޑިއާ އަތުން ބަލިވި ލާއޯސްއާ ދެކޮޅަށެވެ.
ޕްލޭ އޮފް ދެ ވަނަ ބުރުގެ ފުރަަތަމަ ލެގު އޮންނާނީ އަންނަ ސެޕްޓެމްބަރު މަހު 6 ވަނަ ދުވަހު މާލޭގަ އެވެ. ދެ ވަނަ ލެގު އޮންނާނީ އޮކްޓޫބަރު 11 ވަނަ ދުވަހު ލާއޯސްގަ އެވެ. އެ ދެ މެޗުން ކުރި ހޯދިއްޖެ ނަމަ ރާއްޖެ އަށް ގްރޫޕް ސްޓޭޖުން ފުރުސަތު ލިބޭނެ އެވެ، އެކަމަކު ބަލިވެއްޖެނަމަ ރާއްޖެ އަށް 2019 ވަނަ އަހަރު ޔޫއޭއީގައި އޮންނަ އޭޝިއަން ކަޕަށް ކޮލިފައިވުމުގެ ފުރުސަތު ގެއްލޭނެ އެވެ.
ގައުމީ ޓީމުގެ ކޯޗުކަމުން ރިކީ ހާބަޓް ވަކިކޮށްފައިވާއިރު މިރޭގެ މެޗުގައި ރާއްޖެ ކުޅުނީ އެސިސްޓަންޓް ކޯޗު އިސްމާއިލް މަހަފޫޒް (އިންމަ) ގެ ބެލުމުގެ ދަށުންނެވެ. ގަތަރުގެ ވެރިރަށް ދޯހާގައި މިރޭ ކުޅުނު ދެ ވަނަ ލެގުގެ މެޗަށް ރާއްޖެ ނުކުތީ ތިން ބަދަލަކާ އެކު އެވެ. ފުރަތަމަ ލެގުގައި މާލޭގައި ކުޅުނު އިމްރާން ނަޝީދާއި މުހައްމަދު ރަޝީދު (ހޮކޭ) އަމްދާން އަލީ (އެންޑީ) ގެ ބަދަލުގައި ޓީމުގެ ފުރަތަމަ އެގާރައިގައި ހިމެނީ ސަމޫހް އަލީ (ސަމުއްޓޭ) އާއި މުހައްމަދު އުމެއިރު އަދި މުހައްމަދު ސަމްދޫހެވެ.
ޔަމަނުން މިރޭގެ މެޗުގައި ލީޑުނެގީ ފުރަތަމަ ހާފްގެ 21 ވަނަ މިނިޓްގަ އެވެ. ދެ ވަނަ ލަނޑު ޖެހީ ދެ ވަނަ ހާފްގަ އެވެ.