21 އޯގަސްޓް 2022 - 06:09
ބުދަ ދުވަހާ ގުޅޭ
"ކިހާ ބޮޑު ***" ޖަދުވާންގެ އަނގަ ހުޅުވައިލުމާ އެކު މާތައް އޮހިގަތެވެ.
އެއީ، އަހަންނާ މުހާތިބުކޮށް އެ ފަދަ ބަހުރުވަޔަކުން މީހަކު ވާހަކަދެއްކި ފުރަތަމަ ފަހަރެވެ. ވަރަށް ލަދުގަތެވެ. ބިރު ވެސް ގަތެވެ. އެ ފެންވަރުގެ މީހުންނާ އަހަރެން ވާހަކަދައްކައެއް ނޫޅެމެވެ. އެ ކަން ވެސް ކުރީ އުސައިދަށް ޓަކައެވެ.
"އަހަރެން މި ދައްކާ ވާހަކަ އަޑުއަހާ..." އަހަންނަށް ބުނެވުނީ އެ ހިސާބަށެވެ.
"ކޮން ކަކަކަކާއްސެއް!" ޖަދުވާން ހަޅޭއްލަވައިގެންފައި ފޯނުކަނޑައިލިއެވެ.
އަހަރެން ހަމައަކަށްއެޅެން އިރުކޮޅެއް ނެގިއެވެ. ހިތުވިންދު ހުރީ ބާރުވެފައެވެ. ސިކުނޑިއަކަށް އެކައްޗެއް ވެސް ނުވިސްނެއެވެ. އަހަންނަކީ މުއްސަންޖެއް ނަމަ، ފައިސާ ދީގެން ނަމަވެސް ޖަދުވާން އެއްބަސްކުރުވީމުހެވެ. އުސައިދުގެ އުފަލަށް ޓަކައެވެ. ވިއްސަކަށް މިނެޓު ފަހުން އަހަރެންގެ ފައިތިލަ ބިމުގައި ޖެހުނެވެ. ހިތަށްއެރިއެވެ. ޖަދުވާނަށް ގުޅައިގެން އާދޭސްކުރާނީއެވެ. އެހެން ގޮތެއް ނެތެވެ. އޭނައަށް ގުޅި އިރު އަހަރެންގެ ނަންބަރު ހުރީ މަތަކޮށްފައެވެ.
މުޅި ދުވަހު އަހަރެން އެ ކަމާ ވިސްނީމެވެ. ގޭގެ އެއްވެސް ކަމަކަށް ސަމާލުކަމެއް ނުދެވުނެވެ. ރޭގަނޑު ކާން އިށީނީ އެންމެން އެއްކޮށެވެ. އަހަރެން އިނީ ތަށްޓަށް އެއްޗެހި އަޅަން ވެސް ހަނދާންނެތިފައެވެ.
"އަހަރެން ބުނީމެއްނު އަހަރެން ބޭނުމީ ފިޝް އެންޑް ޗިޕްސްއެކޭ!" އުސައިދު ބުންޏެވެ.
ހީވާ ކަހަލައެވެ. އަހަރުމެން ތިބީ ރެސްޓޯރަންޓެއްގައެވެ. ތެދެކެވެ. އުސައިދު އޮތީ އެހެން ބުނެފައެވެ. އަހަރެން ހަނދާންނެތުނީއެވެ. ކިތައް ކަންތަކާ އަހަރެން ވިސްނަންޖެހޭކަމެއް އުސައިދަކަށް ނޭނގޭނެއެވެ. އަމިއްލަ ނަފުސާ މެދު ވިސްނައިލާނެ ފުރުސަތެއް ވެސް އަހަންނަކަށް ނުލިބެއެވެ.
"މަންމަ އޯޑަރުކޮށްލަންތަ؟" ހުރިހައި ފިކުރެއް ދިރުވާލައިފައި އަހަރެން ބުނީމެވެ. "މާ ގިނަ އިރެއް ނުވާނެ. މަންމަ ހަމަ ހަނދާންނެތުނީ."
"ދައްތަމެން ބުނި ނަމަ މަންމަ ހަނދާންހުންނާނެ،" ވިސްނައިލުމެއް ނެތި އުސައިދު ބުންޏެވެ. "އަހަންނަކީ މަންމަގެ ދަރިއެއް ނޫންވީމަ.."
އެ ހިސާބަށް އުސައިދު ބުނި ތަނާ އަލްވާން ނިކަން ބާރަށް މޭޒުމަތީގައި ޖެހިއެވެ. އަހަރެން ވެސް ދިޔައީ ސިއްސައިގެންނެވެ. އަލްވާން އެއްޗެއް ބުނުމުގެ ކުރިން އަހަރެން އަލްވާން ހުއްޓުވީމެވެ. ލޮލުގެ އިޝާރާތުންނެވެ. ކެތްނުކުރެވިގެން އަލްވާން ތެދުވެގެން ގޮސް ކޮޓަރިއަށް ވަނެވެ. ފަހަތުން އަހަރެން ދިޔައީމެވެ. ކޮޓަރިއަށް ވަދެފައި ދޮރުލެއްޕީމެވެ.
"އޭނަ އެހެން ބުނި އެއްޗެއް ނޫނޭ އެއީ." އަހަރެން ބުނީމެވެ.
"އަހަންނަށް ވަރިހަމަ އަހަންނާ ދިމާއަށް އޭނަ ކޮންމެ އެއްޗެއް ކިޔަސް،" ރުޅިއައިސްފައި، މަޑުމަޑުން އަލްވާން ބުންޏެވެ. "އެކަމަކު ހައިބާއާ ދިމާއަށް އިރުއިރުކޮޅާ އިރުއިރުކޮޅާ.. ބޮޑުވަރު! ހަމަ އޭނަގެ މައިންބަފައިންގެ ލޭ އެހެރީ! ވިސްނާލަބަލަ އޭނަޔާ ހެދި ހައިބާ އުޅޭ ވަރު. ހިތަށްއަރާ.."
"އޭނަ ހަވީރުއް ސުރެ ފިޝް އެންޑް ޗިޕްސް ކާ ހިތްވެގެން އުޅުނީ،" ހިތާމަޔާ އެކުގައި އަހަރެން ބުނީމެވެ. "ދެން ނުލިބުނީމަ ދެރަވާނެއްނު! ކުޑަކުއްޖެއް ވިއްޔަ!"
"ކޯޗެއް ކުޑައީ؟ އޭނ؟" އަލްވާން އެހިއެވެ. "ގޮތްކުޑައީ. ލަދުކުޑައީ. އަހަންނަކަށް ނުފެނޭ އޭނަގެ ސަބަބުން ހައިބާއަށް ލިބުނު ހިތްހަމަޖެހުމެއް. ކޮންމެ ކަމެއްގަ ވެސް ހައްދެއް އޮންނާނެ. އޭނައަށް ޓަކާ އަހަރުމެން މި ތިބެނީ ދަރާވިކިފަ."
"އަޅެ އޭނަޔާ ދިމާއަށް އެއްޗެއް ނުބުނައްޗޭ!" އަހަރެން އެދުނީމެވެ.
އަލްވާން އަހަރެން ގައިގައި ބައްދައިލިއެވެ. ބުރަކަށީގައި ފިރުމައިލިއެވެ. ހިތަށްއެރިއެވެ. އެ ފަދަ ފިރިއެއް ނުލިބުނު ނަމަ އަހަންނަށް ވާނީ ކިހިނެއް ހެއްޔެވެ؟ ކަންތައް ވަމުންދިޔައީ އަހަރެން އުންމީދުކުރި ގޮތަކަށް ނޫނެވެ. އަލްވާން ބުނި ގޮތަށެވެ. އެކަމަކު އަލްވާން އިރުއިރުކޮޅާ އެ ވާހަކައެއް ނުދައްކައެވެ.
"އަޅެ އަހަރެން ކިހިނެއްތަ ހަދާނީ އަލްވާން؟" އަހަރެން ބުނީމެވެ. "އުސައިދުގެ ބައްޕަ އެންމެ ފަހަރަކު ވެސް އުސައިދާ ބައްދަލުކުރާކަށް ބޭނުމެއް ނުވިއޭ! މިހާރު އަހަރެންގެ ނަންބަރު ވެސް ބްލޮކްކޮށްލައިފި. އަލްވާން ގުޅަންވީނު."
އަލްވާން އަހަރެންގެ އަތުގައި ހިފައިގެން ގެނެސް އެނދުގައި ބޭންދިއެވެ. އަހަންނަށް ވިސްނައިދިނެވެ. އޭނަ ބުނީ ތެދެކެވެ. އަލްވާން ގުޅައިފިއްޔާ އަލްވާންގެ ނަންބަރަށް ވެސް ވާނީ އަހަރެންގެ ނަންބަރަށް ވީ ގޮތެވެ. ހިސާބަށް ވުރެ ގޮތްކުޑަ މީހުންނަކާ ވާހަކައެއް ނުދެއްކޭނެއެވެ.
"އެކަމަކު އެބަ އޮތް އައިޑިޔާއެއް،" ކަރުކެހިލައިފައި އަލްވާން ބުންޏެވެ. "ނޭނގެ ހައިބާއަށް ކަމުދާނެ ކަމެއް. އުސައިދަކަށް ދުވަހަކު ވެސް އޭނަގެ ބައްޕައެއް ނުފެނޭ. ފޮޓޯއެއް ވެސް ނުފެނޭ. އަހަރެންގެ ފްރެންޑެއް ގެނެސް އުސައިދާ މީޓްކުރުވީމަ ނިމުނީނު."
"އޭރުންނޯ؟" އަހަންނަށް ބުނެވުނެވެ. "ބޮޑު ދޮގެއްނު އެ ހެދުނީ."
"ހަގީގަތް އަޑުއަހާނެ ހިތްވަރެއް އުސައިދުގެ ނުހުންނާނެ،" އަލްވާން ބުންޏެވެ. "އުސައިދު ބައްޕަ ގަބޫލެއް ނުކުރޭ އުސައިދަކީ އޭނަގެ ދަރިއެއްކަމަކަށް. އެޔެއްނު ތެދަކީ؟ އަހަރުމެން މި އުޅެނީ އޭނައަށް ދެރައެއް ދޭކަށް ނޫން. އޭނައަށް ވިސްނޭ ވަރުވީމަ ބުނާނީ މިހެންމިހެންނޭ ވީ. އެހެންވެގެންނޭ މިހެން ކަންތައްކުރީ."
އަހަރެން ވިސްނައިލީމެވެ. ހިތަށްއެރިއެވެ. އެ ވަގުތަށް އެއަށް ވުރެ މޮޅު ގޮތެއް ނެތެވެ. މީހަކަށް ނޭނގޭނެއެވެ. އުސައިދުގެ "ބައްޕަ" ބެހެއްޓީ ލަންކާގައެވެ. ދެބަފައިން ގުޅުވީ ވީޑިއޯ ކޯލަކުންނެވެ. ބައްދަލުކުރިޔަ ނުދޭންވެގެންނެވެ. ގިނަގިނައިން ގުޅިޔަ ވެސް ނުދޭންވެގެންނެވެ. އަހަރެން ހީކުރީ ބައްޕަޔާ ކުރާނެ ގިނަ ސުވާލުތަކަކާއި ޝަކުވާތަކެއް ހުންނާނެކަމަށެވެ. އެހެނެއް ނުވިއެވެ. ވާހަކަދެއްކުމަށް ވުރެ ބޮޑަށް އުސައިދު ބޭނުންވީ ބައްޕަ ދެކިލާށެވެ. މާ ބޮޑު އުފަލެއް ވެސް އުސައިދުގެ މޫނުމައްޗަކުން ނުފެނުނެވެ. ގިނަ ވާހަކަދެއްކީ "ބައްޕަ" އެވެ. މުޅި ކޯލަށް ހޭދަވީ އަށާރަ މިނެޓެވެ.
ބައްޕަޔާ ބައްދަލުވުމުން އުސައިދު ހިތްހަމަޖެހުނެވެ. އެހެނަސް މަންމަޔާ ބައްދަލުކުރަން ބުނުމުން ދިމާއަށް އިންކާރުކުރިއެވެ. އަހަރެން ހިތަށްއެރިއެވެ. މަލްސާއަށް ވީ ވައުދު އަހަރެން ފުއްދަންޖެހޭނެއެވެ. ވީމާ، ދުރާލައި މަލްސާއަށް ގުޅީމެވެ. އޭނަ ބޭނުންވާ ގޮތް އެހީމެވެ. ބޭނުމިއްޔާ ގެއަށް އައިސް ދަރިފުޅާ ބައްދަލުކުރަންވީއެވެ. ނުވަތަ މަލްސާ ބުނާ ތާކަށް އުސައިދު ގޮވައިގެން ދާން ވެސް އަހަރެން ހުށައެޅީމެވެ. އަހަރެން ހީކުރީ އެ ވަގުތުން އެ ވަގުތަށް މަލްސާ ގޮތެއް ނިންމާނެ ކަމަށެވެ.
"އަހަރެން ބޭނުމީ އަހަރެން ބުނާ ތާކަށް ދަރިފުޅު ގެނެސްދޭން،" މަލްސާ އެދުނެވެ. "މިހާރަކު ނޫން. އުފަންދުވަހު. އޯކޭތަ؟"
އަހަރެން ހިތަށްއެރިއެވެ. އުފަންދުވަސް ވިއްޔާ ވާނީ ކީއް ހެއްޔެވެ؟ ދަރިފުޅު ގޮވައިގެން ދާނީ އަހަންނެވެ. ޔަގީނުން ވެސް އޭނަ ދޫކޮށްލާފައެއް އަހަންނެއް ނާންނާނަމެވެ. މަލްސާ ފެންނަ އިރަށް އުސައިދު ބޭނުންވާނީ ގެއަށް އަންނާށެވެ. އައީމަ ނިމުނީއެވެ.
"އާނ އޯކޭ! އެކަމަކު އަހާލާ ހިތްވޭ އުފަންދުވަހު ކީއްވެގެންތޯ؟" އަހަރެން ސުވާލުކުރީމެވެ. "އަދި އެއް މަސް އެބަ އޮތް."
"އަހަރެން ބޭނުން ދަރިފުޅަށް ސަޕްރައިޒެއް ދޭން." މަލްސާ ބުންޏެވެ.
އަހަރެންގެ ބޮލުގަރިއްސައިލިއެވެ. އެހައި ދުރާލައި މަލްސާ ސަހަލުކަމެއް ނުރާވާނެއެވެ.
"ކޮން ސަޕްރައިޒެއްތޯ ނާހާތި!" ހީނގެންފައި މަލްސާ ބުންޏެވެ. "އެއީ ހައިބާއަށް ވެސް ސަޕްރައިޒެއް. އަހަރެން ކައިރިއަށް ގެންދާކަން ދަރިފުޅަށް ނާންގާ ގެންނާނީ. ގެންނަންވީ ތަން ފަހުން ބުނާނަން."
އޭގެ ފަހުން އެންމެ ފަހަރަކު ވެސް މަލްސާ ނުގުޅައެވެ. އެ ކަމާ ވެސް އަހަރެން ވަރަށް ކަންބޮޑުވިއެވެ. އިރުއިރުކޮޅާ އަލްވާނާ ސުވާލުކުރެވެއެވެ. މަލްސާ ކުރަން އެ އުޅެނީ ކީއް ހެއްޔެވެ؟ އަލްވާން ހިތްވަރުދިނެވެ. ބޭނުން ނަމަ، އަހަންނާ އެކުގައި ދާން ވެސް އޭނަ ހުރީ ތައްޔާރަށެވެ. އަލްވާނަށް ހީވަނީ އުސައިދުގެ ބައްޕަ ގެންނަން އުޅެނީހެންނެވެ. އަހަރުމެން އެހެން ބައްޕައެއް ދެއްކިކަމެއް މަލްސާއަކަށް ނޭނގޭނެއެވެ. އަހަރެން ވަރަށް ޔަގީންކަންދިނީމެވެ. ޖަދުވާނެއް ނާންނާނެއެވެ. ނުގެނެވޭނެއެވެ. އޭނަކީ އެ ވަރުގެ ބައްޕައެއް ނޫނެވެ. އަލްވާން ބުނި ގޮތުގައި، ގެއަކަށް އަންނަން ބުނެފިއްޔާ އަހަންނާ އެކުގައި އަލްވާން ދާނެވެ.
އުސައިދުގެ އުފަންދުވަސް ކައިރިވަމުންއައި އިރު އަހަރެން އުޅުނީ އުސައިދު ގައިގައި ތަތްކޮށްލައިގެންނެވެ. އަގު ބޮޑެތި ހަދިޔާއެއް އަހަންނަކަށް ނުގަނެދެވޭނެއެވެ. އެކަމަކު އަހަރެން ކިހައި ލޯބިވާކަން އުސައިދަށް ދެއްކީމެވެ. ކުޅޭނެ ވަރަކަށް ގޭމުކުޅެންވީއެވެ. ބަލާނެ ވަރަކަށް ޓީވީބަލަންވީއެވެ. ނިދާނެ ވަރަކަށް ނިދަންވީއެވެ. އެއްވެސް އިމެއް، ހުރަހެއް ނެތެވެ. ދޮށީ ދަރިން ޝަކުވާކުރިއެވެ. އިވޭކަމަށް ވެސް އަހަރެން ނަހަދަމެވެ. އަހަރެން ކުރިމަތިލާން ޖެހޭނީ ކޮން ފަދަ އިމުތިހާނަކާކަމެއް އެ ކުދިންނަކަށް ނޭނގޭނެއެވެ. އަހަންނަށް ހީވީ އުސް ހަރުފަތަކަށް އަހަރެން އަރާހެންނެވެ. ދުވާލަކު ހަރުފަތެކެވެ.
މަލްސާ ގުޅީ އުފަންދުވަހު ހެނދުނުއެވެ. އުސައިދު ގެންނަން އެދުނީ ހެދިގޮނޑުދޮށަށެވެ. ހަވީރު ފަހެއްޖަހާ އިރުއެވެ. އަހަރެން ވަރަށް ހިތްހަމަޖެހުނެވެ. އެ ތަނުގައި މީހުން ގިނަވާނެކަން އެނގޭތީއެވެ. އުފަންދުވަހުގެ މުނާސަބަތުގައި އަހަރުމެން ކޭކެއް ފެޅީމެވެ. ފަސް ސަތޭކަ ފަންސާސް ރުފިޔާއަށް ދޭ ހަދިޔާއެއް ވެސް ދިނީމެވެ. އަހަންނަށް އެއީ ވަރަށް ބޮޑު އަދަދެކެވެ. އަމިއްލަ ދަރިޔަކަށް ވެސް އެ ވަރުގެ އަގުހުރި ހަދިޔާއެއް ނުދެވެއެވެ.
ހަވީރު ހަތަރުގަޑި ބައިވި އިރު ގެއިން ނުކުތީމެވެ. އަހަންނާއި އުސައިދެވެ. އަހަރެން ބުނީ ހިނގާލަންދަނީކަމުގައެވެ. އަހަރެންގެ އަމިއްލަ ނަފުސުގެ މައްޗަށް އޮތް އިތުބާރު ވަރަށް ބޮޑެވެ. މަލްސާ ފެންނަ އިރަށް އުސައިދު އަނެއް ފަރާތަށް އެނބުރޭނެކަން އަހަންނަށް ޔަގީނެވެ. އެހައި ޔަގީންކަން ނުލިބުނު ނަމައެވެ. ހެދިގޮނޑުދޮށަށް ދިޔަ ތަނާ މަލްސާ ގުޅިއެވެ.
"އެބަ ފެނޭ! ތި އަންނަ ގޮތަށް ކުރިޔަށް އާދޭ!" މަލްސާ އެދުނެވެ.
ފަހަރެއްގައި ވެސް އަހަރެންގެ މޫނުމަތީގައި ހާސްކަމެއް ހުރި ނަމަ، ވަގުތުން ފިލުވައިލީމެވެ. ހިނިތުންވެލީމެވެ. ސާބިތުކަމާ އެކުގައި ކުރިޔަށް ހިނގީމެވެ. ކުއްލިއަކަށް އުސައިދު ހުއްޓުނެވެ. އަހަރެން އުސައިދަށް ބަލައިލީމެވެ. އުސައިދު ބަލަހައްޓައިގެން ހުރި ދިމާއަށް ބަލައިލީމެވެ. އަހަރެންގެ ހިތް ވެސް ހުއްޓުނު ކަހަލައެވެ. ކުރިމަތީގައި ހިނިތުންވެލައިގެން ހުރީ މަލްސާއެވެ. އެހެނަސް އަހަރެން ކުރިން ދުށް މަލްސާއެއް ނޫނެވެ. މާ ތާޒާ، ޒުވާން، ރީތި މަލްސާއެކެވެ. ކުރިން އަބަދު ވެސް އޭނަ ލައިގެން ހުންނަ ޓީޝާޓާއި ޖިންސުގެ ބަދަލުގައި އޭނަ ލައިގެން ހުރީ ވަރަށް ލޯބި ހެދުމެކެވެ. އިސްތަށިގަނޑު ހުރީ މަޑު މުށިކުލައަކުން ފަވާފައެވެ. އޭނައަކީ އެއްވެސް އިރެއްގައި ޑުރަގު ބޭނުންކުރި ކުއްޖެކޭ އެކަކު ވެސް ނުބުނާނެއެވެ. ފަރި ގޮތަކަށް ހިނގާލާފައި އައިސް އުސައިދަށް ދިއްކޮށްލީ، ޕާރުސަލު ނުކޮށް އޮތް އައިޕެޑެކެވެ.
"ހެޕިބާތުޑޭ ހޭންޑްސަމް ބޯއި!" މަލްސާ ބުންޏެވެ.
ނުނިމޭ