19 އޯގަސްޓް 2022 - 22:30
ހެލްސިންކީ، (އޯގަސްޓް 19) - ޕާޓީކުރަނިކޮށް ނަގާފައިވާ ވީޑިއޯއެއް އާންމުވުމެ އިދިކޮޅު ފަރާތްތަކުން ތުހުމަތުތައް ކުރާތީ ޑުރަގް ޓެސްޓް ހައްދަވާފައިވާ ކަމަށް ފިންލެންޑްގެ ބޮޑުވަޒީރު ސަނާ މާރިން ވިދާޅުވެއްޖެ އެވެ.
ފިންލެންޑްގެ ޕޮޕް ލަވަ ކިޔުންތެރިޔަކާ އެކު މާރިން، 36، ނައްޓަވައި ޕާޓީ ކުރައްވާ ވީޑިއޯ އެއް އާންމުވުމުން އެ ގައުމުގެ އިދިކޮޅު ފަރާތްތަކުން ވަނީ އޭނާ މަސްތުވާތަކެއްޗަށް ޓެސްޓްކުރަން ގޮވާލައިފަ އެވެ.
މިއަދު ބޭއްވި ޕްރެސް ކޮންފަރެންގައި މާރިން ވިދާޅުވީ މިއަދު އޭނާ ޑުރަގަށް ޓެސްޓް ކޮށްފައިވާ ކަމަށާއި އަންނަ ހަފުތާގައި ނަތީޖާ ލިބޭނެ ކަމަށެވެ.
ކުރިން ވެސް އޭނާ ވަނީ ތުހުމަތުތައް ދޮގުކުރައްވައިފަ އެވެ. މިއަދު ނޫސްވެރިންގެ ބައްދަލުވުމުގައި ވެސް ވިދާޅުވީ ގާނޫނާ ހިލާފު އެއްވެސް ކަމެއް ނުކުރައްވާ ކަމަށެވެ.
ގައުމުތަކުގެ ވެރިންގެ ތެރެއިން އެންމެ ޒުވާން ލީޑަރުންގެ ތެރޭގައި ހިމެނޭ މާރިން ވަނީ ޕާޓީކޮށް ނެއްޓެވި ކަމަށް ވިދާޅުވެފަ އެވެ. އެކަމަކު އޭނާ ތަކުރާރުކޮށް ވިދާޅުވީ މަސްތުވާތަކެތި ބޭނުން ނުކުރައްވާ ކަމަށެވެ.
"އަޅުގަނޑުގެ ފުރާވަރުގައި ވެސް މަސްތުވާތަކެއްޗެއް ބޭނުމެއް ނުކުރަން،" އޭނާ ވިދާޅުވި އެވެ.
ޕާޓީ ކުރައްވަން ވަޑައިގެންނެވި ދުވަހަކީ ރަސްމީ އެއްވެސް މަސައްކަތެއް ނެތް ދުވަހެއް ކަމަށް ވެސް 2019 އިން ފެށިގެން ފިންލެންޑްގެ ބޮޑުވަޒީރުކަން ކުރައްވާ މާރިން ވިދާޅުވި އެވެ.
"އަޅުގަނޑަށް ޔަގީން އާންމުން ގަބޫލު ކުރާނެކަން މަސައްކަތުގެ ވަގުތާއި ހުސް ވަގުތު އެއީ ވަކި ކުރެވިފައި އޮންނަ ދެ ކަމެއްކަން،" އޭނާ ވިދާޅުވި އެވެ.
މާރިން، ޕާޓީ ކުރެއްވީ ފިންލެންޑްގެ ލަވަ ކިޔުންތެރިޔަ އަދި ފިލްމީ ތަރި އޮލާވީ ޔޫސިވިރްޓާއާ އެކު އެވެ. އޭނާ، މާރިންގެ ކަރަށް ބޮސް ދެއްވި ކަމަށް ބުނެ ނޫސްވެރިޔަކު ސުވާލު ކުރުމުން މާރިން ވަނީ އެކަން ދޮގު ކުރައްވައިފަ އެވެ.
"އަޅުގަނޑަކަށް ހީއެއް ނުވޭ ބޮސް ދިން ހެނެއް. އަޅުގަނޑާ ކައިރިވެލާފައި އެއްޗެއް ބުނަނީ،" އޭނާ ވިދާޅުވި އެވެ.
ނައިޓް ކްލަބެއްގައި ޕާޓީ ކުރައްވަނިކޮށް، ކޮވިޑް-19 އަށް ޕޮޒިޓިވް މީހަކާ، މާރިން ކޮންޓެކްޓިވި މައްސަލަ ވެސް މިދިޔަ އަހަރު ފެންމަތިވި އެވެ. އޭނާ ވަނީ ފަހުން އެ މައްސަލައާ ގުޅިގެން މާފަށް އެދި ވަޑައިގެންފަ އެވެ.