03 ޖެނުއަރީ 2017 - 13:21
ހެނޮއި (ޖެނުއަރީ 3) - އޮޕަރޭޝަނެއް ކުރަނިކޮށް ވިއެޓްނާމުގެ މީހެއްގެ ބަނޑަށް ދޫވި ކަތުރެއް 18 އަހަރު ފަހުން އެ ގައުމުގެ ޑޮކްޓަރުން ނަގައިފި އެވެ.
ވިއެޓްނާމުގެ އުތުރުގެ ތައި ނުގެޔެން ޕްރޮވިންސްގެ 54 އަހަރުގެ ފިރިހެނެއްގެ ބަނޑުން ކަތުރު ނެގީ ވެރިރަށް ހެނޮއީ އިން ޚާއްސަ ޑޮކްޓަރުން ގޮސްގެންނެވެ. އޭނާގެ ބަނޑުގައި ތޫނު އެއްޗެއް އޮތްކަން އެނގުނީ އެކްސިޑެންޓެއް ވެގެން ހޮސްޕިޓަލަށް ގޮސް ބަނޑުގެ ސްކޭނެއް ހެދުމުންނެވެ. ދެ ވަނަ ސްކޭނެއް ހެދުމުން ވަނީ ބަނޑުގައި އޮތީ އޮޕަރޭޝަން ކުރަން ބޭނުންކުރާ ކަހަލަ ކަތުރެއްކަން ޔަގީންވެފަ އެވެ. ވިއެޓްނާމުގެ ނޫހަކުން ބުނީ ބަނޑުގައި އޮތް ކަތުރުގެ ދިގުމިނުގައި ހަ އިންޗި ހުރި ކަމަށެވެ.
ބަނޑުގައި ކަތުރު އޮތް މާ ނަން ނާތު ނަމަކަށް ކިޔާ މީހާ ބުނީ އެއީ 1998 ވަނަ އަހަރު ބެކް ކަން ޖެނެރަލް ހޮސްޕިޓަލުގައި ކުރި ބަނޑުގެ އޮޕަރޭޝަނެއްގެ ތެރޭގައި އޭނާގެ ބަނޑަށް ދޫކޮށްލި ކަތުރެއް ކަމަށް ލަފާކުރެވޭ ކަމަށެވެ. އެފަހަރު ވެސް އޮޕަރޭޝަން ކުރީ އެކްސިޑެންޓެއް ވެގެންނެވެ. ނަމަވެސް އޭގެ ފަހުން އެއްވެސް އުނދަގުލެއް ނުވާ ކަމަށް ބުންޏެވެ. އެކަމަކު ދާދި ފަހުން ބަނޑުގައި ރިއްސަން ފެށި ކަމަށް އޭނާ ބުންޏެވެ.
ކަތުރު ނެގުމަށް ތިން ގަޑިއިރުގެ އޮޕަރޭޝަން ކުރި ޑޮކްޓަރުންގެ ޓީމުން ބުނީ ކަތުރުގައި ހިފަން ބޭނުންކުރާ ބައި ދަބަރު ޖަހާ އަދި އެ ބައި ވަނީ ބައެއް ގުނަވަންތަކުގައި ހިފައިފައި ކަމަށެވެ.
ވިއެޓްނާމުގެ ހެލްތު މިނިސްޓްރީން ވަނީ ބެކް ކަން ޖެނެރަލް ހޮސްޕިޓަލުގައި މާ ނަންގެ އޮޕަރޭޝަން ކުރި ޑޮކްޓަރުގެ ނަން މި ހަފުތާ ނިމުމުގެ ކުރިން ފޮނުވުމަށް އަންގައިފަ އެވެ. ހޮސްޕިޓަލުގެ ޑިރެކްޓަރު ޓްރިން ތި ލުއޮން ބުނީ އެ މައުލޫމާތު ފޯރުކޮށްދޭން ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ. އެކަމަކު އެ ހޮސްޕިޓަލުގެ ޑޮކްޓަރުން ބުނީ އެ ތަނުގައި 15 އަހަރަށް ވުރެ ގިނަ ދުވަސްވަން ދެން ރެކޯޑް ބެހެއްޓުމަކީ ވަރަށް ނުކުރާ ކަމެއް ކަމަށެވެ.