ލަންކާ އަށް ޖެހުނު ހާލު ރާއްޖެ އަށް ޖެހިދާނެތޯ ކުރެވޭ ސުވާލު!

24 ޖުލައި 2022 - 07:22

ދައުލަތުގެ، ފައިސާގެ ކަންކަން މެނޭޖްކުރުމުގައި ވަރަށް އިސް މަގާމެއްގައި ހުންނެވި ބޭފުޅަކާ ދާދިފަހުން ދެކެވުނު ވާހަކައެއްގައި ވިދާޅުވި އެއް ވާހަކައަކީ މި އެވެ؛

"ހަގީގަތުގައި ރާއްޖެ އަށް ވެސް މި އޮތީ އިގްތިސާދީ ކާރިސާ އައިސްފައި. ތެލާއި ގޭހާއި ކާބޯތަކެތި ލިބި، ރައްޔިތުންގެ އަތްމަތީގައި ފައިސާ ހުރީ ސަރުކާރުން ލޯނު އެއްޗެހި ނަގައިގެން ވިޔަސް ބަރާބަރަށް މުސާރަ އެއްޗެހި ދޭތީ. އެހެން ނޫން ނަމަ ގައުމު އޮންނާނީ ވަރަށް ހާލުގައި،" އޭނާ ވިދާޅުވި އެވެ.

"ދައުލަތުން މުސާރަ ދޭ ގާތްގަނޑަކަށް 27،000 މީހުން އެބަތިބި. ކޮންމެ އާއިލާއަކަށް އޭގެ ފައިދާ އެބަ ކުރޭ. އެހެންވެ ނުސީދާ ގޮތުން ވެސް އެ ފައިސާ ޕްރައިވެޓް ސެކްޓާގެ ތެރެއަށް ވެސް ގޮސް، ދައުރުވެ އިގްތިސާދުގެ ތެރޭގައި ފައިސާ އެބަ ދައުރުވޭ."

އޭނާ ވިދާޅުވި ގޮތުގައި ރާއްޖެ އަކީ އާބާދީ ކުޑަ ގައުމަކަށް ވާތީ، ދަރަންޏަށް ފައިސާ ނަގައިގެން ވިޔަސް، އެވަރު ކޮށްލެވެނިކޮށް ރާއްޖެ އޮންނާނީ "އެ ވަގުތަށް" ހަމައަކަށް އެޅިފަ އެވެ. އެ ސަބަބާ ހުރެ، ވަރަށް ގިނަ ތަޖުރިބާކާރުން ވިދާޅުވާ ގޮތުގައި ދުނިޔޭގެ އެހެން ގައުމުތަކާ އަޅާ ބަލާއިރު ރާއްޖެ އަކީ، ކުރު މުއްދަތެއްގައި ލިބޭ ގެއްލުމަކުން އެހާ ފަސޭހައިން ބަނޑަށް ޖެހޭނެ ގައުމެއް ނޫނެވެ. ދާދިފަހުން ބީބީސީ އާއި ރޮއިޓާސް އިން ހަދާފައިވާ އިގްތިސާދީ ރިޕޯޓަކާ ހަވާލާދީ އޭނާ ވިދާޅުވި ގޮތުގައި، ދެ ރިޕޯޓްގައި ދެ ގޮތަކަށް ރާއްޖެއާ ބެހޭ ގޮތުން އޮތީ ވެސް އެހެންވެ އެވެ.

"ރާއްޖެ އަކީ އިގްތިސާދު މެނޭޖްކުރަން އެހާ އުނދަގޫ ގައުމެއް ނޫން. ބީބީސީގެ ރިޕޯޓްގައި އެލާމިން ގައުމުތަކުގެ ތެރޭގައި ރާއްޖެ ހިމެނުނު އިރު ރޮއިޓާސްގެ ލިސްޓަކު ރާއްޖެއެއް ނެތް. އެކަމަކު ދެ ރިޕޯޓްގައި ވެސް އެކައްޗެއް ފާހަގަކޮށްފައިވޭ. ނާޒުކު އިގްތިސާދެއް އޮތް ގައުމެއްކަން. އަނެއްކޮޅުން އިގްތިސާދު ފަހަރެއްގައި ރަނގަޅު ވެސް ވެދާނެކަން އެއް ރިޕޯޓެއްގައި އެބަ ބުނޭ،" އޭނާ ވިދާޅުވި އެވެ.

"ރާއްޖޭގައި އިގްތިސާދީ މާ ބޮޑު ހަރަކާތްތަކެއް ނުހިނގާ. އިގްތިސާދަށް ލޮޅުމެއް އަޔަސް އަންނާނީ ޓޫރިޒަމްގެ ސަބަބުން އެކަނި. މާދަމާ ވެސް މީހުން ނާންނަން ފަށައި ވަރަށް ދިގު ލައިގެން ހިނގައްޖެ ނަމަ އެއީ ވަރަށް ސީރިއަސް މައްސަލައެއް. އެކަމަކު ކޮންމެވެސް ވަރަކަށް ޓޫރިސްޓުން އައިސް، ރިސޯޓްތަކުގެ އޮކިއުޕަންސީ އެންމެ 40 ޕަސެންޓްގައި ހުއްޓަސް އެއީ ހިތްހަމަޖެހުމެއް."

އެކަމަކު އެ ހިތްހަމަޖެހުން އޮންނާނީ ޓޫރިސްޓުން އަންނަ ނަމަ އެވެ. ސަރުކާރުން ވެސް، އަދި އިކޮނޮމިކް މިނިސްޓަރާއި އެމްއެމްއޭ އާއި ފިނޭންސް މިނިސްޓަރު ވެސް ވިދާޅުވަނީ ހިތްހަމަޖެހުން އޮތީ ޓޫރިސްޓުން އަންނާތީ އެވެ. ނާންނަ ނަމަ، ދެން އޮތީ ހުސް މައްސަލަ އެވެ. ރާއްޖޭގެ ނަސީބަކީ، ދުނިޔޭގެ ބައެއް ގައުމުތަކުގައި ބާރަށް ކޮވިޑް ފެތުރެމުން ދިޔަ އިރު ވެސް ރާއްޖެ އަށް ޓޫރިސްޓުން އައުމެވެ. އަދި ރަޝިޔާ އާއި ޔޫކްރެއިން ހަނގުރާމައިގައި އެ ދެ ގައުމުން ޓޫރިސްޓުން މަދުވި އިރު އެހެން ގައުމުތަކުން އެބައި ފޫބެއްދުމެވެ.

އެއީ މިހާރު އެކަން ހިނގާ ގޮތެވެ. އެކަމަކު މަންޒަރު ދެން ބަދަލުވެދާނެ ގޮތަކާ ދޭތެރޭ ތިބެން ޖެހޭނީ ވިސްނައިގެންނެވެ.

ރާއްޖޭގެ އިގްތިސާދާ ބެހޭ ގޮތުން، އެމްއެމްއޭ އިން ވެސް މިހާތަނަށް ބުނެފައި ވަނީ ރާއްޖޭގައި އިގްތިސާދީ ކާރިސާއެއްގެ ބިރު ނެތް ކަމަށެވެ. އެ ބޭފުޅުން އެ މިންގަނޑު ޖައްސަވަނީ ހަމައެކަނި ރާއްޖެ އިން އަދާކުރަން ޖެހޭ ލޯނުތަކާއި އިގްތިސާދީ މައި ހަރަކާތް، ޓޫރިޒަމަށް ބަލައިފަ އެވެ.

އެމްއެމްއޭގެ ގަވަރުނަރު އަލީ ހާޝިމް ވިދާޅުވެފައިވާ ގޮތުގައި ކުރު ރާސްތާގެ އިގްތިސާދީ ތަސައްވަރު އަދި އޮތީ ރަނގަޅަށެވެ. އެކަމަކު، އޭނާގެ ކަންބޮޑުވުން އޮތީ ދުރުރާސްތާގެ ތަސައްވުރާ ދޭތެރޭ އެވެ. ނުވަތަ ދުރަށް ރަނގަޅު/ ހަރުދަނާ ޕްލޭނެއް ނެތުމެވެ.

ދުނިޔޭގައި އިގްތިސާދީ ކާރިސާއެއް ފެށިގެން މި އުޅޭ މައިގަނޑު ސަބަބަކީ މީގެ ދެ އަހަރު ކުރިން ދުނިޔެ އަށް ކުރިމަތިވި ކޮވިޑެވެ. އޭގެ ސަބަބުން ގައުމުތައް ހިންދަމާނުލެވިގެން އުޅެނިކޮށް ރަޝިޔާ އާއި ޔުކްރެއިންގެ ހަނގުރާމަ ފެށުން ވެގެން ދިޔައީ ބަލި އިގްތިސާދުތަކަށް ރިހޭ ފައި މައްޗަށް ފޮއި ވެއްޓުން ކަހަަލަ ކަމަކަށެވެ. ބައެއް ގައުމުތައް މިހާރު ވެސް އޮތީ ވަރަށް ހާލުގަ އެވެ. އޭގެ ތެރޭގައި ތިން ވަނަ ދުނިޔޭގެ ގައުމުތަކާއި ތަރައްގީވަމުން އަންނަ ގައުމުތައް ވެސް ހިމެނެ އެވެ. ރަޝިޔާ އާއި ޔުކްރެއިން އަކީ ވެސް މުއްސަނދި، އަދި އެކްސްޕޯޓް ބިޔަ ދެ ގައުމަށް ވާތީ، އޭގެ އަސަރު ދުނިޔޭގެ މުޅި އިގްތިސާދަށް ވަރަށް އަވަހަށް ކުރި އެވެ. ހާއްސަކޮށް ގައުމުތަކުގެ ފައިސާ އަގު ކުރުމުގަ އެވެ.

އެކަމަކު ނާޒުކު އިގްތިސާދެއް އޮތް ރާއްޖެ އަށް ކޮވިޑްގެ ސަބަބުން ކުރިމަތިވި ހީނަރުކަން ހީކުރި ވަރަށް މާ ކުޑަ ކަމަށް އިގްތިސާދީ ބޭފުޅުން ވިދާޅުވެ އެވެ. އޭގައި ސަބަބުތައް އެބަހުއްޓެވެ. އެއް ކަމަކީ، ލޯނު ނަގައިގެން ވިޔަފާރިތަކަށް އެހީވުމެވެ. އަނެއް ކަމަކީ، ހާލުގައި ޖެހޭނެ ކަމަށް ބެލެވުނު ވަރަށް ގިނަ ބަޔަކަށް ލޯނުގެ ގޮތުގައި ނުވަތަ އެހީގެ ގޮތުގައި ފައިސާ ދިނުމެވެ. އޭގެ ސަބަބުން ބަނގުރޫޓު ވެދާނެ ކަމަށް ބެލެވުނު ވިޔަފާރިތައް ވެސް ކޮންމެ ވެސް ސިފައެއްގައި ދެމެހެއްޓި އެވެ. އަދި އޭރު ދޫކުރި ލޯނުތަކުން ބައެއް މީހުން އިތުރު އިންވެސްޓްމަންޓްތައް ކޮށް، ކާމިޔާބު ވެސް ހޯދި އެވެ.

ރައީސް އިބްރާހިމް މުހަންމަދު ސޯލިހު ދާދިފަހުން ވިދާޅުވެފައިވާ ގޮތުގައި ކޮވިޑްގެ ސަބަބުން ދައުލަތަށް ގެއްލުން ވެފައި ވަނީ އަށްޑިހަ ވަރަކަށް ބިލިއަން ރުފިޔާ އެވެ.

އެއީ ގައުމުގެ އެއް އަހަރުގެ އުފެއްދުންތެރިކަމުން ލިބޭ އާމްދަނީ އެވެ. އަދި އެއީ ދައުލަތަށް ގާތްގަނޑަކަށް ތިން އަހަރުގެ އާމްދަނީ އެވެ. އެކަމަކު މާލީ ދިރާސާ ކުރައްވާ ބައެއް ބޭފުޅުން ވިދާޅުވާ ގޮތުގައި، ރައީސް އެހެން ވިދާޅުވިޔަސް، ދައުލަތަށް ސީދާ ލިބޭނެ ގެއްލުން ފައިސާގެ ގޮތުން ބަލައިފިއްޔާ އެއަށް ވުރެ މާ ކުޑަވާނެ އެވެ.

"ކޮވިޑްގައި ދައުލަތުގެ ބަޖެޓް ފޫބައްދަން ދައުލަތަށް ލިބުނީ ގާތްގަނޑަކަށް 270-300 ވަރަކަށް މިލިއަން ޑޮލަރު. ދެން އައީ އެތެރޭގެ ދަރަނި ނުވަތަ އެމްއެމްއޭ އިން ދިން ހަތަރު ވަރަކަށް ބިލިއަން ރުފިޔާ. މާނައަކީ ގާތްގަނޑަކަށް 300 ވަރަކަށް މިލިއަން ޑޮލަރު އިގްތިސާދުގެ ތެރެއަށް ޕަމްޕް ކޮށްލީމަ ރާއްޖޭގެ އިގްތިސާދު އޮތް ވަރުގައި އެބަ ދެމެހެއްޓެއޭ،" ސަރުކާރުގެ އޮފިޝަލަކު، ނަން ހާމަނުކުރަން އެދިވަޑައިގެން ވިދާޅުވި އެވެ.

"ރާއްޖޭގައި މިހާރު ދުވާލެއްގެ މައްޗަށް އެބަ އާދޭ އެވްރެޖްކޮށް 4،500 ޓޫރިސްޓުން. އަޅުގަނޑުމެން ހިސާބު ޖަހާލި އިރު، ދުވާލަކު އެވްރެޖްކޮށް 1500-2000 ވަރަކަށް ޓޫރިސްޓުން އަޔަސް ދިވެހިންނަށް ބޭނުންވާ އަސާސީ ހުރިހާ ހިދުމަތެއް ދީ، ކައިބޮއިގެން އުޅެވޭނެ."

ލަންކާ އިން މި އަހަރަށް ކަނޑައަޅާފައިވާ ދައުލަތުގެ ބަޖެޓްގެ ޖުމްލަ އަކީ 4 ޓްރިލިއަން ރުޕީސް (10 ބިލިއަން ޑޮލަރު) އެވެ. އޭގެ ތެރެއިން ދެބައިކުޅަ އެއްބަޔަކީ ޑެފިސިޓެވެ.

ދެހާސް 19 ވަނަ އަހަރުން ފެށިގެން ލަންކާ އަށް އައީ އިގްތިސާދީ ދަތިތައް ކުރިމަތި ވަމުންނެވެ. އެ ގައުމުގެ ރިޔާސީ އިންތިހާބާ ދިމާކޮށް، ޓެކްސްތަކަށް ގެނައި ބަދަލުތަކުގެ ސަބަބުން ދައުލަތަށް ވަންނަ އާމްދަނީ ވަރަށް ބޮޑަށް މަދުވި އެވެ. އޭގެ އިތުރުން ދަނޑުވެރިންނަށް ބޭނުންވާ ކެމިކަލް ގެނައުމުގައި ހެދި ސިޔާސަތާއި އެޕްރީލް 2019 ގައި ލަންކާގައި ލަގްޒަރީ ތިން ހޮޓަލެއްގައި ބޮން ގޮއްވާލުމާ ގުޅިގެން ޓޫރިސްޓުން އައުން މަދުވުމާއި މާ ގިނަ އަދަދަކަށް ފައިސާ ޖެހުމާއި ކޮވިޑްގެ ވަބާ ހިމެނެ އެވެ. މީގެ އިތުރުން ސަރުކާރުގެ ތެރޭގައި އޮތް ކޮރަޕްޝަން ވެސް ހިމެނެ އެވެ.

ލަންކާގައި އިގްތިސާދީ ހަރުދަނާ ސިޔާސަތުތަކެއް ކަނޑައަޅާއިރަށް އޮންނަނީ އެހެން ކަމެއް ލައިގެންފަ އެވެ. މިދިޔަ އަހަރު ނިމުނު އިރު ބޭރުގެ ދަރަނީގެ އަދަދު 50 ބިލިއަން ޑޮލަރުން މައްޗަށް ވަނީ އަރައިފަ އެވެ.

ކޮވިޑް ލައިގަނެ، މުޅި ލަންކާ އެއްކޮށް ބަންދުވި އިރު ދައުލަތަކު ފައިސާއެއް ނެތެވެ. ވިޔަފާރިއަކަށް އެހީވެވޭކަށް ނެތެވެ. ބޭރުގެ ދަރަނި ދެއްކޭކަށް ވެސް ނެތެވެ. ދަރަނި ނުދައްކާ އޮތުމުން، ބޭރުގެ މާލީ އިދާރާތަކުން ވެސް ލަންކާގެ ހުށަހެޅުންތަކަށް އެކަށީގެންވާ އިޖާބައެއް ނުދެ އެވެ.

ލިބޭ އެއްޗަކުން ގައުމު ހިންގުމަކީ ރާއްޖޭގެ އެއްވެސް ސަރުކާރެއްގެ ސިޔާސަތެއް ނޫނެވެ. މި ސަރުކާރުގެ ފަސް އަހަރު ވެސް ނިމިގެން މި ދަނީ، ކުރިއެކޭ އެއްގޮތަށް އާމްދަނީ އިތުރުކުރުމަށް އުފެއްދުންތެރި އެއްވެސް ކަމެއް ތައާރަފު ނުކުރެވި އެވެ. މި ސަރުކާރު ވެސް ބަރޯސާވީ ހަމައެކަނި ޓޫރިޒަމަށެވެ.

ރާއްޖޭގެ ފައިސާގެ ސިޔާސަތުގެ ތެރޭގައި ކަންބޮޑުވުން އޮތް އެންމެ ބޮޑު އަނެއް މައްސަލައަކީ ހަރަދު ބޮޑުވުމެވެ. މިއީ ހަރަދު ކުޑަކުރުމަށް ޓަކައި ސަރުކާރުން ވަރުގަދަ ނިންމުންތަކެއް ނިންމަން ޖެހޭ ވަގުތެކެވެ. އޭގެ ބައެއް ސަބަބުތައް އިގްތިސާދީ ބޭފުޅަކު ކިޔައިދެއްވި އެވެ.

"އެއް ކަމަކީ ދިރިއުޅުމުގެ ހަރަދުތައް ނުވަތަ މުދަލާއި ހިދުމަތުގެ އަގުތައް ބޮޑުވުން. އޭގެ މާނައަކީ އޭގެ ގެއްލުން އެންމެ އާދައިގެ މީހާ އަށް ޔަގީނުން ވެސް ކުރާނެއޭ. އެކަން ފޫބައްދަން ސަރުކާރުން އަނެއްކާ ވެސް ލޯނެއް ނަގައިފައި ނުވަތަ ފައިސާ ޗާޕްކޮށްފައި މުސާރަ ބޮޑުކޮށްފާނެ. އެ ހިސާބުން ޕްރައިވެޓް ސެކްޓަރަށް މަޖުބޫރު ވާނެ މުސާރަ ބޮޑުކުރަން. މައްސަލަ ދިމާވާނީ މި ހިސާބުން،" އޭނާ ވިދާޅުވި އެވެ.

"ނުލިބޭ އާމްދަނީއަކުން ޕްރައިވެޓް ސެކްޓަރަށް މުސާރަތައް ބޮޑުކުރެވޭކަށް ނޯންނާނެ. ކުންފުނި ބަނގުރޫޓުވާނެ. އެ ހިސާބުން އިގްތިސާދީ އަސްލު ކާރިސާ ފެށޭނީ. ސަބަބަކީ އިގްތިސާދު މި ހިނގަނީ ޕްރައިވެޓް ސެކްޓަރާ އެކު. އަދި ހާއްސަކޮށް ޓޫރިޒަމް އިންޑަސްޓްރީ އަކީ ޕްރައިވެޓް ސެކްޓަރު."

ރާއްޖޭގައި މުދަލުގެ އަގު ނުވަތަ އިންފްލޭޝަން މިހާރު ވެސް ދަނީ މަހުން މަހަށް އުފުލެމުންނެވެ. އެމްއެމްއިން އެންމެ ފަހުން އާންމުކުރި ހިސާބުތައް ދައްކާ ގޮތުން މި އަހަރުގެ ފުރަތަމަ ކުއާޓަރުގައި އިންފްލޭޝަން ވަނީ 0.6 ޕަސެންޓު މައްޗަށް ގޮސްފަ އެވެ. އޭގެ ކުރީ ކުއާޓަރުގައި އިންފްލޭޝަން މައްޗަށް ދިޔައީ 0.1 ޕަސެންޓުންނެވެ. އަނެއްކޮޅުން ތެލުގެ އަގު މައްޗަށް ދިއުމަކީ، ހުރިހާ ހިދުމަތެއް އަގު ބޮޑުވާނެ އަނެއް ސަބަބެވެ. މިއަށް ވުރެ މައްޗަށް އިންފްލޭޝަން މައްޗަށް ދާ ނަމަ، އެއީ ވަރަށް ބޮޑަށް ވިސްނަން ޖެހޭ ކަމެކެވެ.

އެ ސަބަބާ ހުރެ އެންމެ މުހިންމީ ހަރަދު ކުޑަކުރުމެވެ. ރާއްޖެ އަށް ވަންނަ ފައިސާ އިން ފުއްދުމެވެ. ބޭކާރު ހަރަދުތައް ހުއްޓާލުމެވެ.

"މުސާރަތައް ކުޑައެއް ނުކުރެވޭނެ. އިނާޔަތްތަކެއް ނުވެއް ކަނޑާލެވޭނެ. އެކަމަކު މުޅި ގައުމުގެ އެންމެންނަށް އަސަރު ނުކުރާނެ ވަރަށް ބައިވަރު ބިލިއަނުން ގުނާލެވޭވަރުގެ ހަރަދުތަކެއް ސަރުކާރުގައި އެބަ ހިނގާ. އެއީ ގައިމު ވެސް ހުއްޓާލެވޭނެ ކަންކަން،" އިގްތިސާދީ ތަޖުރިބާކާރަކު ވިދާޅުވި އެވެ.

ރާއްޖެ އަށް ކުރިމަތިވެފައިވާ އެންމެ ބޮޑު ބިރަކީ، އެހެން ގައުމުތަކެކޭ ވެސް އެއްގޮތަށް ދަރަންޏަށް ފައިސާ ހޯދުމުގައި އޮތް އުނދަގޫތަކެވެ. މިއީ، ސަރުކާރުން ވެސް ވަރަށް ސީރިއަސް މައްސަލައެއްގެ ގޮތުގައި ފާހަގަކޮށްފައިވާ ކަމެކެވެ. ފިނޭންސް މިނިސްޓަރު އިބްރާހިމް އަމީރު އެންމެ ފަހުން ބޭއްވެވި ނޫސްވެރިންގެ ބައްދަލުވުމުގައި ވެސް، އަދި އެންމެ ފަހުން ރައްޔިތުންގެ މަޖިލީހުގެ ކޮމެޓީގައި ވެސް އެ ކަންބޮޑުވުން ފާޅުކުރެއްވި އެވެ.

ރާއްޖެ އަކީ ޖީޑީޕީގެ ނިސްބަތުން ދަރަނި ބޮޑު ގައުމެކެވެ. ރާއްޖޭގެ ދަރަނި މިހާރު އެހުރީ އުފެއްދުންތެރިކަމުގެ ނިސްބަތުން 116 ޕަސެންޓްގަ އެވެ. އެއީ ވަރަށް މަތީ އަދަދެކެވެ. އެކަމަކު، ރާއްޖޭގެ ދަރަނި އަންނަނީ ސަރުކާރުން މެނޭޖްކޮށް ދައްކަމުންނެވެ. އޭގެ އެއްވެސް ބިރެއް ނެތް ކަމަށް ސަރުކާރުން ބުނެ އެވެ. ދަރަނި ނުދައްކައި، ފަހުން ދައްކާ ގޮތަށް ހަމަޖައްސައިފި ނަމަ، ފިނޭންސް މިނިސްޓަރު އަމީރު ވިދާޅުވާ ގޮތުގައި އެއީ ކުރިއަށް އޮތް ތާނގައި ސަރުކާރަށް ވެސް އަދި އަމިއްލަ ވިޔަފާރިތަކަށް ގެއްލުން ހުރި ގޮތެވެ. އެހެންވެ، ދަރަނި ރީސްޓްރަކްޗާ ކުރުމަށް ވުރެ ދަރަނި މެނޭޖްކުރުން މާ މުހިންމު ކަމަށް އޭނާ ވިދާޅުވި އެވެ.

"އެހެން ނޫނީ މާކެޓަށް ފެންނާނީ ރާއްޖެ ޓެކްނިކަލް ޑިފޯލްޓަކަށް ގޮސްފައި އޮތްތަން. އަޅުގަނޑުމެން ރީސްޓްރަކްޗާ ކުރަން ހިފައިފި ނަމަ ދަތިތަކާ ކުރިމަތިވާނެ ފައިސާ ހޯދަން. އެގޮތަށް ދެވޭނީ ވެސް އައިއެމްއެފްގެ ޕްރޮގްރާމެއްގެ ދަށުން. އޭރުން ނަތީޖާއަކަށް ވާނީ މާލީ ނިޒާމަށް އޮތް އިތުބާރު ގެއްލުން. ހިލޭ އެހީ އާއި ލޯނު ހޯދުން އުނދަގޫވާނެ. ޕްރައިވެޓް ސެކްޓާ އަށް ވެސް ލޯނު ހޯދަން އުނދަގޫވާނެ. އެހެންވެ އަޅުގަޑުމެންނަށް ކުރެވޭނެ ކަމަކީ މާކެޓް ފްރެންޑްލީ ގޮތަކަށް ދަރަނި މެނޭޖްކުރުން،" އެންމެ ފަހުން ބޭއްވި، ރައްޔިތުންގެ މަޖިލީހުގެ ކޮމެޓީގައި އޭނާ ވިދާޅުވި އެވެ.

ބޮޑެތި ބިޔަ ގައުމުތައް ވެސް އިގްތިސާދީ ބިޔަ ވަޅުގަނޑަަކަށް ވެއްޓިފައި މި އޮތީ ރަނގަޅު ނިންމުންތައް ނިންމަން ފަސް ޖެހުމާ ގުޅިގެންނެވެ. ރާއްޖޭގައި މި އުޅޭ ގާތްގަނޑަކަށް ފަސް ލައްކައެއްހާ މީހުން މެނޭޖްކުރުމަކީ ހަގީގަތުގައި އުނދަގޫ ކަމެއް ނޫނެވެ. ވިސްނުންތެރި ކަމާ އެކު އެކަން ރަނގަޅަށް، އަދި ހެޔޮ ނިޔަތުގައި ކޮށްފިއްޔާ ރާއްޖެ އަކީ މި އިގްތިސާދީ ކާރިސާ އިން ސަލާމަތް ވެވޭނެ ގައުމެއް ކަމަށް އެންމެން ވެސް ގަބޫލު ކުރެ އެވެ.

އެކަމަކު ބޭނުމަކީ ކެރިގެން ފިޔަވަޅު އެޅުމެވެ. އެކަން ކުރާނެ ހިތްވަރު ސަރުކާރުގައި ހުންނަން ޖެހެ އެވެ.