17 ޖުލައި 2022 - 17:51
ގދ. ގައްދޫގައި ގާތްގަނޑަކަށް ބަނދެ ނިމިފައި އޮތް ދޯންޏެއްގައި އަލިފާން ރޯވެ މިއަދު ވަރަށް ބޮޑަށް އަނދައިފި އެވެ.
ކައުންސިލްގެ މެމްބަރު އައިމިނަތު ފަރުހާނާ "މިހާރު" އަށް ވިދާޅުވީ މީގެ 45 ވަރަކަށް މިނިޓް ކުރިން ދޯނީގައި އަލިފާން ހިފައި ވަރަށް ބޮޑަށް އަނދާފައިވާ ކަމަށެވެ. އެހެންވެ، ފުލުހުންނާއި ރަށުގެ މީހުން ގުޅިގެން އަލިފާންގަނޑު ނިއްވުމުގެ މަސައްކަތްކުރަމުން އަންނަ ކަމަށް އޭނާ ވިދާޅުވި އެވެ.
ދޯނީގައި އަލިފާން ރޯވީ، އެ ތަނުގައި މަސައްކަތުގައި އުޅުމަށް ފަހު މީހުން ދިޔަތަނާ މާގިނަ އިރުތަކެއް ނުވެ ކަމަށް ފަރުހާނާ ވިދާޅުވި އެވެ.
އޭނާ ލަފާކުރައްވާ ގޮތުގައި ދޯނީގައި ރޯވީ، ކަރަންޓު ޝޯޓެއް ވެގެންނެވެ. މިހާރު ދޯނީގެގެގަނޑު ހިމެނޭ ސަރަހައްދު އެއްކޮށް އަނދާފައިވާ ކަމަށް ވިދާޅުވި އެވެ.
"އަދިވެސް ވަރަށް ބޮޑަށް ދުން އަރަމުން ދަނީ. ދެ ހޮޅިން ފެން ޖަހަމުން އެބަދޭ. ހަރުގޭގެ ވަށައިގެން ޓިނު ޖަހާފައި ހުރީމާ ޓިނުތައް ނައްޓުވައިގެން ފެން ޖެހޭތޯ މަސައްކަތް ކުރަމުން އެ ދަނީ،" އެ ސަރަހައްދުގައި މިހާރު ހުރި ފަރުހާނާ ވިދާޅުވި އެވެ.
އަލިފާންގަނޑު މިހާރު ކޮންޓްރޯލް ކޮށްފައިވާއިރު، އެ ސަރަހައްދާ ގާތްގަނޑަކަށް 40 ފޫޓުގެ ދުރުގައި އިތުރު އެހެން ދޯންޏެއް ވެސް އެބައޮތް ކަމަށް އޭނާ ވިދާޅުވި އެވެ. އެކަމަކު އެހާ ހިސާބަށް އަލިފާންގަނޑު ނުފެތުރޭ ކަމަށް ވިދާޅުވި އެވެ.
އޭނާ ވިދާޅުވީ، މިއަދަކީ އެ ސަރަހައްދަށް ހެނދުނުއްސުރެ ވަރަށް މޫސުން ގޯސް ދުވަހެއް ކަމަށާއި ވަރަށް ވައި ބާރު ކަމަށެވެ. އެހެންވެ މުޅި ސަރަހައްދަށް ދުންގަނޑު ފެތުރިފައިވާ ކަމަށް ވިދާޅުވި އެވެ.